Categories: ଫୁରସତ

୭୪ ବର୍ଷରେ ଅଣ୍ଡାଦେଲା ସବୁଠୁ ବୟସ୍କ ପକ୍ଷୀ

ଓ୍ବାଶିଂଟନ: ସମସ୍ତ ପ୍ରକାରର ଅସୁବିଧାକୁ ସାମ୍‌ନା କରି ବିଶ୍ୱର ସବୁଠାରୁ ବୟସ୍କ ବଣୁଆ ପକ୍ଷୀ ଏକ ଅଣ୍ଡା ଦେଇଛି। ଓ୍ବିଜ୍‌ଡମ ନାମକ ଏହି ଲେସନ ଅଲବାଟ୍ରସ୍‌ ଜାତୀୟ ଏହି ପକ୍ଷୀ ଆମେରିକାର ହାଓ୍ବାଇ ଦ୍ୱୀପପୁଞ୍ଜର ଉତ୍ତର ଦିଗରେ ଅବସ୍ଥିତ ମିଡ୍‌ଓ୍ବେ ଏଟୋଲ ନ୍ୟାଶନାଲ ଓ୍ବାଇଲ୍ଡ ଲାଇଫ୍‌ ଆଶ୍ରୟସ୍ଥଳରେ ଏକ ଅଣ୍ଡା ଦେଇଥିବା ସହ ଏହାର ଦେଖାଶୁଣା କରୁଥିବାର ରେକର୍ଡ ହୋଇଛି। ଏନେଇ ‘ଆମେରିକା ମସ୍ତ୍ର୍ୟ ଏବଂ ବନ୍ୟପ୍ରାଣୀ ସେବା(ୟୁଏସ୍‌ଏଫ୍‌ଡବ୍ଲ୍ୟୁଏସ୍‌)-ପ୍ରଶାନ୍ତ ମହାସାଗର ଅଞ୍ଚଳ’ ପକ୍ଷରୁ ଗୁରୁବାର ଏକ୍ସ’ରେ ସୂଚନା ଦିଆଯିବା ସହ କିଛି ପୋଷ୍ଟ ମଧ୍ୟ ଶେୟାର କରାଯାଇଛି। ଲେସନ୍‌ ଅଲବାଟ୍ରସ୍‌ ଜାତୀୟ ପକ୍ଷୀ ସାଧାରଣତଃ ୧୨ରୁ ୪୦ ବର୍ଷ ପର୍ଯ୍ୟନ୍ତ ଜୀବିତ ରହିଥାନ୍ତି। ତେବେ ଓ୍ବିଜ୍‌ଡମ ଏତେ ଦିନ ଧରି ବଞ୍ଚିବା ସହ ବୟସ୍କ ଅବସ୍ଥାରେ ଅଣ୍ଡା ଦେବା ଘଟଣାକୁ ୟୁଏସ୍‌ଏଫ୍‌ଡବ୍ଲ୍ୟୁଏସ୍‌ ଦୁର୍ଲଭ ବୋଲି କହିଛି। ଓ୍ବିଜ୍‌ଡମକୁ ପ୍ରଥମଥର ପାଇଁ ୧୯୫୬ରେ ଚିହ୍ନଟ କରାଯାଇଥିଲା। ସେତେବେଳେ ଏହାର ବୟସ ମାତ୍ର ୬ ବର୍ଷ ହୋଇଥିଲା।

Share