କୋରେଇ,୯ା୯(ଡି.ଏନ.ଏ.):କୋରେଇ ମଣ୍ଡଳ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଲାଗି ରହିଥିବା ସର୍ବ ପୁରାତନ ଶିକ୍ଷା ଅନୁଷ୍ଠାନ କୋରେଇ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ ନାହିଁନାହିଁରେ ଚାଲିଛି। ଏଠାରେ ୫୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଶିକ୍ଷାଗ୍ରହଣ କରୁଥିବା ବେଳେ ଆବଶ୍ୟକ ଶିକ୍ଷକ ନାହାନ୍ତି। ଫଳରେ ପିଲାମାନଙ୍କର ଶିକ୍ଷା ଦାନରେ ବହୁତ ଅସୁବିଧା ହେଉଥିବା ପରିଲକ୍ଷିତ ହେଉଛି। ଭଙ୍ଗା ଦଦରା ଘରେ ପାଠ ପଢା ଚାଲିଛି। ବିଭିନ୍ନ ଗୃହର କାନ୍ଥ, ଛାତ ଆଦି ଫାଟି ଆଁ କରିଛି। ଯାହାକି ଛାତ୍ରୀଛାତ୍ରଙ୍କ ପାଇଁ ବିପଦାପନ୍ନ ବୋଲି ମତପ୍ରକାଶ ପାଇଛି। ଏହି ଅନୁଷ୍ଠାନର ପାଚେରି ଭାଙ୍ଗି ଯାଇଥିବାରୁ ବାହାର ଲୋକମାନଙ୍କ ଅବାଧ ପ୍ରବେଶ ହେଉଛି। ପିଲାଙ୍କ ପାଇଁ ଭଲ ଶୌଚାଳୟ ନାହିଁ। ଏ ନେଇ ଅଭିଭାବକ ଓ ବିଦ୍ୟାଳୟ ଶିକ୍ଷା କମିଟି ବିଧାୟକ ଅଶୋକ ବଳ ଓ ମଣ୍ଡଳ ଶିକ୍ଷା ଅଧିକାରୀଙ୍କୁ ଭେଟି ସମସ୍ୟା ଜଣାଇଥିଲେ ମଧ୍ୟ କିଛି ସୁଫଳ ମିଳି ପାରି ନାହିଁ। ସରକାର ୫-ଟି ମାଧ୍ୟମରେ ଅନେକ ଉନ୍ନତ ମାନର ବିଦ୍ୟାଳୟକୁ ଅନ୍ତର୍ଭୁକ୍ତ କରି ଲକ୍ଷାଧିକ ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏଠାରେ ବ୍ଲକର ସର୍ବ ପୁରାତନ ଶିକ୍ଷା ଅନୁଷ୍ଠାନ ଅବହେଳିତ ହୋଇ ପଡି ରହିଛି ବୋଲି ଅଭିଯୋଗ ହେଉଛି। ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟି ଦେଇ ଭଙ୍ଗା ଘରଗୁଡିକୁ ବିପଦ ସଂକୁଳ ଘୋଷଣା କରି ପିଲାଙ୍କ ପାଇଁ ନୂତନ ଶ୍ରେଣୀ ଗୃହ ଯୋଗାଇ ଦେବାକୁ ଅଞ୍ଚଳବାସୀ ଦାବି କରିଛନ୍ତି।