ମହିଳାଙ୍କ ଫ୍ୟାଶନେବଲ ଆସେସରିଜ୍ ମଧ୍ୟରେ ହାଣ୍ଡବ୍ୟାଗ୍ ଅନ୍ୟତମ। ଅକେଜନ୍ ଅନୁସାରେ ହାଣ୍ଡବ୍ୟାଗ୍ର ପ୍ରକାର ବି ବଦଳିଥାଏ। ହେଲେ କେବେ ଭାବିଛନ୍ତି କି କେବେଠାରୁ ଏହାର ବ୍ୟବହାର ଆରମ୍ଭ ହୋଇଛି? ଯଦିଓ ଏହାର ଠିକ୍ ସମୟ ଜଣା ନାହିଁ, ତେବେ ନିକଟରେ ଉଦ୍ଧାର ହୋଇଛି ସବୁଠାରୁ ପୁରୁଣା ହାଣ୍ଡବ୍ୟାଗ୍। ଅନୁମାନ କରାଯାଉଛି ଏହା ୭୦୦ ବର୍ଷ ପୁରାତନ। ଲଣ୍ଡନର କୋର୍ଟଉଲ୍ଡ ଗ୍ୟାଲେରିରେ ଏହାକୁ ପ୍ରଦର୍ଶିତ କରାଯାଇଥିଲା। ବ୍ୟାଗଟି ଉତ୍ତର ଇରାକର ମୋସୁଲ ସହରର ବୋଲି କୁହାଯାଉଛି। ବ୍ରାସ୍ର ଏହି ବ୍ୟାଗ୍ ଏକ କ୍ଲଚ୍ ବ୍ୟାଗ୍ ଭଳି ଦେଖାଯାଏ। ପ୍ରଥମେ ଉକ୍ତ ବ୍ୟାଗକୁ ଘୋଡ଼ାଚାଳନା କରୁଥିବା ପୁରୁଷଙ୍କର ସ୍ୟାଡଲ୍ବ୍ୟାଗ୍ ଅବା ପୁରୁଷଙ୍କର ଓ୍ବାଲେଟ୍ ବୋଲି ଅନୁମାନ କରାଯାଉଥିଲା। କିନ୍ତୁ ଏବେ ମିଳିଥିବା କିଛି ପ୍ରମାଣରୁ ଜଣାପଡୁଛି ଯେ, ଏହା ମହିଳାଙ୍କ ହାଣ୍ଡବ୍ୟାଗ୍। ଏଥିରେ ହୋଇଥିବା କାରୁକାର୍ଯ୍ୟ ବେଶ୍ ଉଚ୍ଚକୋଟୀର। ଏଥିରେ ମଙ୍ଗୋଲ ଦରବାରର ଦୃଶ୍ୟ ଦେଖିବାକୁ ମିଳେ। କାରୁକାର୍ଯ୍ୟରେ ଦେଖିପାରିବେ ଦାମୀ ପୋଷାକ ପିନ୍ଧିଥିବା ପୁରୁଷ ଓ ମହିଳା ମଝିରେ ଥିବା ଖାଇବା ଟେବୁଲରେ ବସିଛନ୍ତି ଓ ତାଙ୍କ ଚାରିପଟେ ମଙ୍ଗୋଲ ପୋଷାକ ପିନ୍ଧିଥିବା ଆଟେଣ୍ଡାଣ୍ଟ ତାଙ୍କୁ ଖାଦ୍ୟ ଓ ପାନୀୟ ଯୋଗାଉଛନ୍ତି। ତାଙ୍କ ପାଖରେ ଜଣେ ମହିଳା ହାତରେ ଦର୍ପଣ ଧରିଥିବା ସହ ଡାହାଣ କାନ୍ଧରୁ ଛାତି ଦେଇ ବାମ ଅଣ୍ଟା ଆଡକୁ ଝୁଲୁଥିବା ଏକ ବ୍ୟାଗ ଦେଖିବାକୁ ମିଳେ। ଏଇଥିରୁ ଅନୁମାନ କରାଯାଉଛି ଯେ, ଏହି ହାଣ୍ଡବ୍ୟାଗ ମହିଳାଙ୍କର ବୋଲି।