ଆନସିଏଣ୍ଟ ଅଲିମ୍ପିଆ, ୧୭ା୪ (ପି.ଟି.): ଆସନ୍ତା ପ୍ୟାରିସ୍ ଅଲିମ୍ପିକ୍ସ ୨୦୨୪ ଉପଲକ୍ଷେ ପ୍ରଜ୍ୱଳିତ ହୋଇଛି ଅଲିମ୍ପିକ୍ସ ମଶାଲ। ମଙ୍ଗଳବାର ଦକ୍ଷିଣ ଗ୍ରୀସ୍ର ଏଥେନ୍ସରେ ଥିବା ପୁରାତନ ଗେମ୍ସ ଭେନ୍ୟୁରେ ପ୍ରତିକୂଳ ପାଗ ସତ୍ତ୍ୱେ ଅଲିମ୍ପିକ୍ସ ମଶାଲରେ ଅଗ୍ନି ସଂଯୋଗ କରାଯାଇଛି। ପ୍ରାଚୀନ ଗ୍ରୀସ୍ର ସୂର୍ଯ୍ୟ ଦେବତା ତଥା ଆପୋଲୋଙ୍କ ଅନୁପସ୍ଥିତିରେ ମଶାଲରେ ଅଗ୍ନି ସଂଯୋଗ କରାଯାଇଥିଲା। ଆକାଶ ମେଘାଚ୍ଛନ୍ନ ଥିବାରୁ ପାରମ୍ପରିକ ଢଙ୍ଗରେ ଏହି ପ୍ରକ୍ରିୟା ସମ୍ଭବ ହୋଇ ନ ଥିଲା। ଜଣେ ଅଭିନେତ୍ରୀ ପୂଜକଙ୍କ ପୋଷାକରେ ଆପୋଲୋଙ୍କୁ ପୂଜା କରିବା ପରେ ହିଁ ଅଗ୍ନି ସଂଯୋଗ ହୋଇଥାଏ। ତେବେ ଆକାଶ ମେଘାଚ୍ଛନ୍ନ ଥିବାରୁ ବିକଳ୍ପ ବ୍ୟବସ୍ଥା ଆପଣାଇଥିଲେ ଆୟୋଜକ। ସାଧାରଣତଃ ଅଗ୍ନି ଏକ ମାଟିପାତ୍ରରେ ରଖାଯାଇଥାଏ। ସୂର୍ଯ୍ୟକିରଣ ଏକ ଦର୍ପଣରୁ ପ୍ରତିଫଳିତ ହୋଇ ଏହି ପାତ୍ର ଉପରେ ପଡିବା ପରେ ଏହାକୁ ମଶାଲରେ ସଂଯୋଗ କରାଯାଏ। ତେବେ ସୂର୍ଯ୍ୟ ଦୃଶ୍ୟମାନ ହୋଇ ନ ଥିବା କାରଣରୁ ସିଧାସଳଖ ମଶାଲରେ ଅଗ୍ନି ସଞ୍ଜୋଗ କରାଯାଇଥିଲା। ତେବେ ଏହି ଅଗ୍ନି ସଂଯୋଗ କାର୍ଯ୍ୟକ୍ରମର କିଛି ମିନିଟ ପରେ ପାଗ ସୁଧୁରିବା ସହ ସୂର୍ଯ୍ୟ ଦୃଶ୍ୟମାନ ହୋଇଥିଲେ। ପ୍ୟାରିସ ଅଲିମ୍ପିକ୍ସ ଆସନ୍ତା ଜୁଲାଇ ୨୬ରୁ ଅଗଷ୍ଟ ୧୧ ପର୍ଯ୍ୟନ୍ତ ଅନୁଷ୍ଠିତ ହେବ।
ଗ୍ରୀସ୍ରୁ ବାହାରିଥିବା ଅଲମ୍ପିକ୍ସ ମଶାଲ ଶୋଭାଯାତ୍ରା ୩୧୦୦ ମାଇଲ ବା ୫୦୦୦ କି.ମି. ଯାତ୍ରା କରିବା ପରେ ଏପ୍ରିଲ ୨୬ରେ ଏଥେନ୍ସରେ ପ୍ୟାରିସ ଆୟୋଜକଙ୍କୁ ହସ୍ତାନ୍ତର କରାଯିବ। ଆନ୍ସିଏଣ୍ଟ ଅଲିମ୍ପିଆରେ ଏହି ଘଟଣା ଆମକୁ ଅତୀତ ଓ ଭବିଷ୍ୟତ ସମ୍ପର୍କରେ ଅବଗତ କରାଉଛି ବୋଲି କହିଛନ୍ତି ଅନ୍ତର୍ଜାତୀୟ ଅଲିମ୍ପିକ୍ସ କମିଟି ମୁଖ୍ୟ ଥୋମାସ୍ ବାକ୍। ବର୍ତ୍ତମାନ ସମଗ୍ର ବିଶ୍ୱ ଯୁଦ୍ଧର ବିଭୀଷିକାରେ ଆତଙ୍କିତ ହେଉଥିବା ବେଳେ ଘୃଣା ଓ ନକାରାତ୍ମକତାରେ ଲୋକମାନେ ହତୋତ୍ସାହିତ ହୋଇପଡିଛନ୍ତି। ଏହି ମଶାଲ ଯାତ୍ରା ଲୋକଙ୍କ ମନରେ ଏକ ସକାରାତ୍ମକ ଭାବନା ସୃଷ୍ଟି କରିବ ବୋଲି କହିଛନ୍ତି ବାକ୍। ଖ୍ରୀଷ୍ଟପୂର୍ବ ୭୭୬ରୁ ୩୯୩ ଖ୍ରୀଷ୍ଟାବ୍ଦ ଯାଏ ଆନ୍ସିଏଣ୍ଟ ଅଲିମ୍ପିଆରେ ଅଲିମ୍ପିକ୍ସ ଗେମ୍ ଆୟୋଜିତ ହୋଇଥିଲା। ମଙ୍ଗଳବାର କାର୍ଯ୍ୟକ୍ରମରେ ସମଗ୍ର ବିଶ୍ୱର ହଜାର ହଜାର ଲୋକ ଏହି କାର୍ଯ୍ୟକ୍ରମ ଦେଖିବାକୁ ଉପସ୍ଥିତ ଥିଲେ।
୨୦୨୧ ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣ ବିଜେତା ଗ୍ରୀସ୍ ରୋୟର ଷ୍ଟେଫାନୋସ ଡୋସକୋସ ପ୍ରଥମ ବାହକ ଭାବରେ ଅଲିମ୍ପିକ୍ସ ମଶାଲ ଧରିବାର ଗୌରବ ଅର୍ଜନ କରିଥିଲେ। ଏଥେନ୍ସର ଐତିହାସିକ ଫ୍ରେଞ୍ଚ ବାରନ୍ ପିଅର୍ ଡି କୁବେର୍ଟିନ୍ ପର୍ଯ୍ୟନ୍ତ ସେ ମଶାଲ ବାହକ ହୋଇଥିଲେ। ୨୦୦୪ ଏଥେନ୍ସ ଅଲିମ୍ପିକ୍ସରେ ୩ ପଦକ ବିଜୟିନୀ ଫ୍ରାନ୍ସର ଲୌରେ ମାନାଉଡୋଉ ଦ୍ୱିତୀୟ ଆଥଲେଟ ଭାବରେ ମଶାଲ ଧରିଥିଲେ। ପରେ ୟୁରୋପିଆନ୍ ୟୁନିୟନ ଅଧିକାରୀ ମାର୍ଗାରିଟିସ୍ ଶିନାସଙ୍କୁ ଏହା ହସ୍ତାନ୍ତର କରାଯାଇଥିଲା। ଏହି ମଶାଲଟି ଏଥେନ୍ସରୁ ପୋର୍ଟ ଅଫ୍ ପିରାଉସ୍ ଯାତ୍ରା କରିବା ପରେ ୧୮୯୬ରେ ନିର୍ମିତ ଜାହାଜରେ ଏହାକୁ ପ୍ୟାରିସ୍ ନିଆଯିବ। ମେ ୮ ତାରିଖରେ ଏହା ପ୍ୟାରିସ୍ରେ ପହଞ୍ଚିବା ଲକ୍ଷ୍ୟ ରଖାଯାଇଛି।
