ଭୁବନେଶ୍ୱର,୨୬।୭(ବ୍ୟୁରୋ): ରାଜ୍ୟରେ ଋଣଭାରକୁ ନେଇ ବିଧାନସଭାରେ ବିରୋଧୀ ସରକାରଙ୍କୁ ଘେରିଛନ୍ତି। ଏବେ ଋଣଭାର ୧ ଲକ୍ଷ ୨୭ ହଜାର କୋଟି ଟଙ୍କା ଟପିଲାଣି। ମା’ ପେଟର ଛୁଆ ଉପରେ ମୁଣ୍ଡପିଛା ଋଣ ୨୨ହଜାର ଟଙ୍କା ହେଲାଣି। ରାଜ୍ୟର ବିକାଶ ନାମରେ ବିନାଶ ହୋଇଛି ବୋଲି ମଙ୍ଗଳବାର ଗୃହରେ ବିରୋଧୀଙ୍କ ତୁମ୍ବିତୋଫାନ ଦେଖିବାକୁ ମିଳିଛି। ‘ଋଣଭାରରେ ବୁଡ଼ିଛି ଓଡ଼ିଶା’ ଶୀର୍ଷକ ମୁଲତବୀ ପ୍ରସ୍ତାବ ଆଣି ବିରୋଧୀ ସରକାରଙ୍କୁ ଘେରିଛନ୍ତି।
ମୁଲତବୀର ଜବାବରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ଭାରତ ବର୍ଷରୁ ବିହାରକୁ ଛାଡ଼ିଦେଲେ ଅନ୍ୟ ରାଜ୍ୟ ତୁଳନାରେ ଆମର ସ୍ଥିତି ଭଲ ଅଛି। ପଡ଼ୋଶୀ ଛତିଶଗଡ଼ର ମୁଣ୍ଡପିଛା ଋଣ ୩୮ହଜାର ୭୩୧ ଥିବା ବେଳେ ପଶ୍ଚିମବଙ୍ଗର ୫୭ ହଜାର ୩୪୫, ପଞ୍ଜାବର ୯୩ ହଜାର ୨୩୫ ରହିଛି। ୨୦୨୦-୨୧ରେ ରାଜ୍ୟର ଋଣ ଭାର ୧ ଲକ୍ଷ ୪ ହଜାର ୪୫୨ କୋଟି ଥିବା ବେଳେ ୨୦୨୧ରେ ଏହା ୫୭ହଜାର ୨୦୫ କୋଟିକୁ କମିଛି। ଏଫ୍ଆର୍ବିଏମ୍ ଆଇନ୍ ଅନୁଯାୟୀ ଜିଏସ୍ବିପିର ୨୫% ମଧ୍ୟରେ ଋଣ ଭାର ରହିବା ଆବଶ୍ୟକ। ରାଜ୍ୟରେ ଋଣ ଭାର ଜିଏସ୍ବିପିର ୧୫.୨%ରେ ରହିଛି। ତେଣୁ ରାଜ୍ୟର ଋଣକୁ ନେଇ ବିରୋଧୀ ସଦସ୍ୟମାନେ କୌଣସି ଆଶଙ୍କା କରିବା ଉଚିତ ନୁହେଁ ବୋଲି ମନ୍ତ୍ରୀ କହିଛନ୍ତି। ମନ୍ତ୍ରୀଙ୍କ ଉତ୍ତରରେ ଅସନ୍ତୁଷ୍ଟ ହୋଇ ଭାଜପା ଏବଂ କଂଗ୍ରେସର ସଦସ୍ୟମାନେ ବିଧାନସଭା କକ୍ଷଛାଡ଼ି ଚାଲିଯାଇଥିବା ଦେଖାଯାଇଛି।