ବରଗଡ଼ ଅଫିସ,୨୭ା୫: ବରଗଡ଼ ଜିଲାରେ ରବିଋତୁ ଧାନ ସଂଗ୍ରହ ପ୍ରକ୍ରିୟାକୁ ୨ସପ୍ତାହ ବିତି ଯାଇଛି। ହେଲେ ଧାନ କିଣାବିକାରେ ଅବ୍ୟବସ୍ଥା ଲାଗି ରହିଛି। ଧାନ ମଣ୍ଡିଗୁଡ଼ିକ ମିଲର୍ସଙ୍କ ମର୍ଜିରେ ଚାଲିଛି। କଟ୍ନିଛଟ୍ନି ନ ହେଲେ ଧାନ ଉଠାଇବାକୁ ସିଧାସଳଖ ମିଲର୍ସଙ୍କ ଏଜେଣ୍ଟମାନେ ମନା କରି ଦେଉଥିବା ବେଳେ ଚାଷୀଙ୍କୁ ଧାନ ପରିବହନ ଏବଂ ଲୋଡିଂ, ଅନଲୋଡିଂ ଖର୍ଚ୍ଚ ସେମାନେ ଦାବି କରୁଥିବା ଅଭିଯୋଗ ହୋଇଛି। ଏପରିକି ପ୍ରତି ୧ କୁଇଣ୍ଟାଲରେ ୧କେଜି ଧାନକୁ ବାଧ୍ୟତାମୂଳକ ଭାବେ କାଟି ଦିଆଯାଉଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ଏଭଳି ଅଭିଯୋଗ ନେଇ ଜିଲାର ଭେଡେନ ବ୍ଲକ ଅନ୍ତର୍ଗତ ତେନ୍ତୁଲିଟିକ୍ରା ମଣ୍ଡି ଉପରେ ନିର୍ଭର କରୁଥିବା ଚାଷୀମାନେ ଶୁକ୍ରବାର ପୂର୍ବାହ୍ନ ୮ଟାରୁ ଜିଲାପାଳ ଅଫିସ ଆଗରେ ଧାରଣାରେ ବସିଛନ୍ତି। ବିନା କଟ୍ନିଛଟ୍ନିରେ ଧାନ ଉଠାଣ, ମଣ୍ଡିକୁ ଆସୁଥିବା ଧାନକୁ ତତ୍କାଳ କିଣି ଉଠିଯିବା, ଲୋଡିଂ, ଅନଲୋଡିଂ ଖର୍ଚ୍ଚ ଦାବି କରୁଥିବା ମିଲର୍ସ ଏଜେଣ୍ଟଙ୍କ ଲାଇସେନ୍ସ ରବ୍ଦ ପାଇଁ ଚାଷୀମାନେ ଦାବି କରିଛନ୍ତି। ଯୋଗାଣ ଅଧିକାରୀମାନେ ଧାରଣାସ୍ଥଳରେ ପହଞ୍ଚି ଆଲୋଚନା କରୁଛନ୍ତି। ମାତ୍ର ଉପରୋକ୍ତ ଦାବି ସମୂହ ଉପର ଲିଖିତ ପ୍ରତିଶ୍ରୁତି ଦେବାକୁ ଚାଷୀମାନେ ଅଡ଼ି ବସିଛନ୍ତି।
