ପଦ୍ମପୁର,୨୨।୨(ଡି.ଏନ୍.ଏ.): ବରଗଡ଼ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟାକୁ ଇତିମଧ୍ୟରେ ୩ ମାସ ବିତିଯାଇଛି । ମାତ୍ର ଧାନ ବିକ୍ରି ସମସ୍ୟା ତୁଟୁ ନାହିଁ। ଚାଷୀମାନେ ଧାନ ବିକ୍ରି କରିସାରି ନ ଥିବାବେଳେ ବିଭିନ୍ନ ମଣ୍ଡିଗୁଡିକୁ ବନ୍ଦ କରି ଦିଆଯାଇଛି। ଅନ୍ୟପକ୍ଷରେ ଚାଷୀଙ୍କୁ ମିଳିଥିବା ଟୋକନ ଅବଧି ମଧ୍ୟ ସରିଯାଇଛି। ଅଞ୍ଚଳର ବିଭିନ୍ନ ମଣ୍ଡିରେ ୨ଲକ୍ଷ ୪୭ ହଜାର କୁଇଣ୍ଟାଲରୁ ଅଧିକ ଧାନ ବିକ୍ରି ଅପେକ୍ଷାରେ ପଡିରହିଛି। ଚାଷୀମାନେ ଧାନ ବିକ୍ରି କରି ନ ପାରି ବହୁ ଅସୁବିଧାର ସମ୍ମୁଖିନ ହୋଇଛନ୍ତି। ଏହାର ପ୍ରତିବାଦରେ ପଦ୍ମପୁର ଅଞ୍ଚଳରେ ଚାଷୀ ଆନ୍ଦୋଳନ ତେଜି ଉଠିଛି। ଏଠାରେ ଚାଲିଥିବା ଚାଷୀ ଆନ୍ଦୋଳନ ୧୨ ଦିନରେ ପହଞ୍ଚିଛି । ଚାଷୀମାନେ ପୂର୍ବରୁ ସ୍ଥାନୀୟ ଉପଜିଲାପାଳ ଏବଂ ତହସିଲ ଅଫିସ ଅଚଳ କରି ସାରିଥିବା ବେଳେ ସୋମବାର ପଦ୍ମପୁରରେ ରହିଥିବା ଅନ୍ୟ ସରକାରୀ କାର୍ଯ୍ୟାଳୟ ଅର୍ଥାତ୍ ବ୍ଲକ, ରେଜିଷ୍ଟାର, ଟ୍ରେଜେରି, କୃଷି, ଉଦ୍ୟାନ, ସହକାରୀ ସମବାୟ ନିବନ୍ଧକ (ଏଆରସିଏସ), ଗ୍ରାମ୍ୟ ଉନ୍ନୟନ (ଆରସି) ଅଫିସରେ ତାଲା ପକାଇଛନ୍ତି । ସେହିପରି କନସିଂହା ଛକରେ ରାସ୍ତା ଅବରୋଧ କରିଛନ୍ତି। ରାଜବୋଡାସମ୍ବର କୃଷକ ସଂଗଠନ ନେତୃତ୍ୱରେ ଚାଲିଥିବା ଏହି ଆନ୍ଦୋଳନରେ ଅଞ୍ଚଳର ଶତାଧିକ ଚାଷୀ ସାମିଲ ହୋଇଛନ୍ତି।