ମୁନିଗୁଡ଼ା,୩୧।୧(ଡି.ଏନ୍.ଏ.) ରାୟଗଡ଼ା ଜିଲା ମୁନିଗୁଡ଼ା ବ୍ଲକରେ ଅଦିନିଆ ବର୍ଷାରେ ଚାଷୀଙ୍କ ଧାନ ଗଜା ହୋଇଛି। ଅଞ୍ଚଳର ଚାଷୀ ଧାନ, କପା ଓ ପରିବା ଚାଷ କରିଥିଲେ। କିନ୍ତୁ ଅଦିନିଆ ବର୍ଷା ଫସଲକୁ ନଷ୍ଟ କରିଛି। ଏହାକୁ ନେଇ ଚାଷୀ ଏବେ ଚିନ୍ତାରେ ପଡ଼ିଛନ୍ତି।
ମୁନିଗୁଡ଼ା ନିକଟସ୍ଥ ଭୈରବଗଡ଼ ଗ୍ରାମର ଚାଷୀ ଗୋବିନ୍ଦ ଗୌଡ଼ ୩ ଏକର ଜମିରେ ଧାନଚାଷ କରିଥିଲେ। କିନ୍ତୁ ଶ୍ରମିକ ନ ମିଳିବାରୁ ବର୍ଷା ପୂର୍ବରୁ ଅଧା ଧାନ କାଟିପାରି ନ ଥିଲେ। ବର୍ଷା ହେବାରୁ ତାଙ୍କର ଅଧା ଧାନ ଜମିରେ ପଡ଼ି ଗଜା ହୋଇଥିବା କହିଛନ୍ତି। ତେବେ ସେ ଜଣେ ନୁହନ୍ତି ଗ୍ରାମର ଅନେକ ଚାଷୀଙ୍କ ଅବସ୍ଥା ସମାନ ବୋଲି ଗୋବିନ୍ଦ କହିଛନ୍ତି। ମୁନିଗୁଡ଼ା ବ୍ଲକରେ ବ୍ୟାପକ ଧାନ, କପା ଓ ପରିବା ଫସଲ ନଷ୍ଟ ହୋଇଥିବା ଅନୁସନ୍ଧାନରୁ ଜଣାପଡ଼ିଛି। ତେଣୁ ସରକାରୀ ସହାୟତା ପାଇଁ ଚାଷୀମାନେ ଦାବି କରିଛନ୍ତି।