କୁଜଙ୍ଗ,୨୦ା୯(ଡି.ଏନ୍.ଏ.):କୁଜଙ୍ଗ ବ୍ଲକ ଅନ୍ତର୍ଗତ ବାଲିଆ ପଞ୍ଚାୟତ କାର୍ଯ୍ୟାଳୟ ସରୀସୃପଙ୍କ ବାସସ୍ଥଳୀ ପାଲଟିଛି। ଏଠାରେ ନିମ୍ନମାନର କାମ ହୋଇଥିବା ନେଇ ଅଭିଯୋଗ ହୋଇଛି। ୨୦୧୯ରେ ଏଠାରେ ଲକ୍ଷାଧିକ ଟଙ୍କା ବ୍ୟୟରେ ଟାଇଲ୍ ଲଗାଯାଇଥିଲା। ପ୍ରାୟ ୩ ବର୍ଷ ମଧ୍ୟରେ କାନ୍ଥରୁ ଟାଇଲ ଛାଡ଼ି ଆପେ ଆପେ ଫାଙ୍କ ସୃଷ୍ଟି ହୋଇଛି। ଫଳରେ ସେଠାରେ ବିଷାକ୍ତ ସାପ ରହୁଛନ୍ତି। ଆଠ ମାସ ତଳେ ନୂଆକରି ସରପଞ୍ଚ ଭାବେ ଦାୟିତ୍ୱ ନେଇଥିବା ସରୋଜିନୀ ନାୟକ ଓ ନାଏବ ସରପଞ୍ଚ ସମରେନ୍ଦ୍ର ପ୍ରଧାନ ସୋମବାର ଏକ ବୈଠକ ପାଇଁ ପଞ୍ଚାୟତ କାର୍ଯ୍ୟାଳୟକୁ ଆସିଥିଲେ। ସେମାନେ ଛାଡ଼ିଯାଇଥିବା ଟାଇଲ ଫାଙ୍କରେ ସାପ ଥିବା ଦେଖି ଉକ୍ତ ଖଣ୍ଡ ଟାଇଲକୁ ଛଡାଇଥିଲେ। ଏହି ସମୟରେ ଅନ୍ୟ ସମସ୍ତ ଟାଇଲ ଆପେ ଆପେ ଖସିଯାଇଥିଲା। ଏଥିସହ ଉକ୍ତ କାନ୍ଥରେ ୫ରୁ ଊର୍ଦ୍ଧ୍ୱ ବିଷଧର ସାପ ଥିବା ଜଣାପଡ଼ିଥିଲା। ଏହାପରେ ଉକ୍ତ ସାପଗୁଡ଼ିକୁ ନିରାପଦ ସ୍ଥାନରେ ଛାଡିଦିଆଯାଇଛି। ନିରାପତ୍ତାକୁ ଦୃଷ୍ଟିରେ ରଖି କାର୍ଯ୍ୟାଳୟରେ ହେବାକୁ ଥିବା ବୈଠକ ଭିତରେ କରା ନ ଯାଇ ବାରଣ୍ଡାରେ ହୋଇଥିଲା। ବୈଠକରେ ତୁରନ୍ତ କାର୍ଯ୍ୟାଳୟ ମରାମତି ପାଇଁ ନିଷ୍ପତ୍ତି ହୋଇଥିଲା।
ଏହି ଅବସରରେ ସରପଞ୍ଚ ନାୟକ ଓ ନାଏବ ସରପଞ୍ଚ ପ୍ରଧାନ କହିଛନ୍ତି, ପଞ୍ଚାୟତର ବିକାଶ ପାଇଁ ଯେଉଁ ଅର୍ଥ ବ୍ୟୟ କରାଯାଉଛି, ତାହା ସର୍ବସାଧାରଣଙ୍କ ଅର୍ଥ। ୩ ବର୍ଷ ତଳେ ଲକ୍ଷାଧିକ ଟଙ୍କା ବ୍ୟୟରେ ଯେଉଁ ଟାଇଲ୍ କାମ ହୋଇଥିଲା ତାହା ଏବେ ପାଣିରେ ପଡ଼ିଯାଇଛି। ଆଗକୁ ଯେଉଁ କାମ ହେବ ତାହାର ଠିକ୍ ଗୁଣବତ୍ତା କେମିତି ରକ୍ଷାକରାଯିବ ସେନେଇ ସମସ୍ତ ୱାର୍ଡ଼ ମେମ୍ବର ଯତ୍ନବାନ୍ ହେବା ଉଚିତ୍। ଅନ୍ୟମାନଙ୍କ ମଧ୍ୟରେ ବୈଠକରେ ନରେଶ ଚନ୍ଦ୍ର ସ୍ବାଇଁ, ପଦନ ସ୍ବାଇଁ ଓ ନିରୁପମା ସ୍ବାଇଁ ପ୍ରମୁଖ ଉପସ୍ଥିତ ଥିଲେ।
