ନୂଆଦିଲ୍ଲୀ,୩।୫ (ପି.ଟି.): କୋଭିଡ୍-୧୯ ମହାମାରୀ ଲଢ଼େଇରେ ସାମିଲ ହୋଇଛନ୍ତି ଦୁଇ କ୍ରିକେଟର ଭାଇ ହାର୍ଦ୍ଦିକ ଓ କୃନାଲ ପାଣ୍ଡ୍ୟା। ଗ୍ରାମାଞ୍ଚଳରେ ଲୋକଙ୍କ ଚିକିତ୍ସା ପାଇଁ ଏହି ଦୁଇ ଭାଇ ୨୦୦ ଅକ୍ସିଜେନ କନ୍ସେନଟ୍ରେଟର୍ସ ଦାନ କରିବେ। ଏ ନେଇ ଶନିବାର ହାର୍ଦ୍ଦିକ ଘୋଷଣା କରିଛନ୍ତି। ମହାମାରୀର ପ୍ରକୋପ ଜାରି ରହିଥିବା ବେଳେ ଆମ ପରିବାର ଲୋକଙ୍କୁ ସାହାଯ୍ୟ କରିବାକୁ ଚାହୁଁଥିଲା ବୋଲି ହାର୍ଦ୍ଦିକ କହିଛନ୍ତି। କୋଭିଡ୍-୧୯ ଲଢ଼େଇରେ ସାମିଲ ଥିବା ସବୁ ଡାକ୍ତର, ନର୍ସ, ସ୍ବାସ୍ଥ୍ୟକର୍ମୀଙ୍କୁ ସେ ପ୍ରଶଂସା କରିଛନ୍ତି। ଏବେ ସମସ୍ତେ ଏକାଠି ହୋଇ ମହାମାରୀ ବିରୋଧରେ ଲଢ଼େଇ କରିବାର ଆବଶ୍ୟକତା ରହିଛି।
ପୂର୍ବରୁ କ୍ରିକେଟ ଆଇକନ ସଚିନ ତେନ୍ଦୁଲକର, ଶିଖର ଧାଓ୍ବନ, ଜୟଦେବ ଉନାଡ୍କଟ, ପ୍ୟାଟ କୁମିନ୍ସ, ବ୍ରେଟ ଲି ଓ ନିକୋଲାସ ପୁରନଙ୍କ ଭଳି କ୍ରିକେଟର ଅର୍ଥରାଶି ଦାନ କରି ଏହି ଲଢ଼େଇରେ ସାମିଲ ହୋଇଥିଲେ। ଆଇପିଏଲ୍ ଦଳ ରାଜସ୍ଥାନ ରୟାଲ୍ସ ଏଥିପାଇଁ ୭.୫ କୋଟି ଓ ଦିଲ୍ଲୀ କ୍ୟାପିଟାଲ୍ସ ୧.୫ କୋଟି ଟଙ୍କା ଦାନ କରିଛନ୍ତି।