ଡେରାବିଶ,୧୩ା୧୧(ସ୍ବ.ପ୍ର.): ସହରାଞ୍ଚଳର ଲୋକେ ଚିତ୍ତ ବିନୋଦନ ଓ ବ୍ୟାୟାମ ଲାଗି ପାର୍କକୁ ବାଛି ନେଇଛନ୍ତି। ହେଲେ ଗଁା ଗହଳିରେ ଆଗ ଭଳି ଆଉ ତୋଟା ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକ ଅଧୀନ ନରସିଂହପୁର ପଞ୍ଚାୟତ ତିଲଙ୍ଗଠାରେ ନିର୍ମିତ ପାର୍କ ଲୋକଙ୍କୁ ଆକର୍ଷିତ କରୁଛି । ଏହା ଅନ୍ୟ ପଞ୍ଚାୟତ ଓ ଜିଲା ପାଇଁ ଉଦାହରଣ ସୃଷ୍ଟି କରିଛି। ସାଧାରଣ ଲୋକଙ୍କଠାରୁ ଆରମ୍ଭ କରି ଛାତ୍ରୀଛାତ୍ରଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ପାର୍କଟି ପାଲଟିଛି। ଗ୍ରାମର ଥିବା ମା’ ପିଙ୍ଗଳେଶ୍ୱରୀ ଠାକୁରାଣୀଙ୍କ ପୀଠ ନିକଟରେ ନିର୍ମିତ ପାର୍କର ଲମ୍ବ ୧୨୦ ଫୁଟ ହୋଇଥିବା ବେଳେ ପ୍ରସ୍ଥ ୧୦୦ ଫୁଟ ରହିଛି। ପାର୍କରେ ପିଲାଙ୍କ ଆକର୍ଷଣ ପାଇଁ ଫାଇବର ଜିରାଫ, ହରିଣ, ବାଘର ମୂର୍ତ୍ତି ରହିଛି। ଏହାସହ ଏଠାରେ ନିର୍ମିତ ହୋଇଥିବା ଦୋଳି, ଖସଡାରେ ପିଲାମାନେ ଖେଳୁଛନ୍ତି। ସେହିଭଳି ବୟସ୍କ ଓ ଅବସରପ୍ରାପ୍ତ କର୍ମଚାରୀମାନେ ପାର୍କକୁ ଆସି ସମୟ ବିତାଉଛନ୍ତି। ଗ୍ରାମାଞ୍ଚଳରେ ଏଭଳି ପାର୍କ ନିର୍ମାଣର ଉଦ୍ଦେଶ୍ୟ ସମ୍ପର୍କରେ ନରସିଂହପୁର ସରପଞ୍ଚ କମଳାପ୍ରଭା ଖଟୁଆଙ୍କୁ ପଚାରିବାରେ, ଗଁାରେ ଥିବା ମା’ ପିଙ୍ଗଳେଶ୍ୱରୀଙ୍କ ପୀଠକୁ ଡେରାବିଶ ସମେତ କଟକ ଜିଲା ମାହାଙ୍ଗା ବ୍ଲକ ଅଞ୍ଚଳର ଲୋକେ ଆସିଥାନ୍ତି। ଏଭଳି ଏକ ସ୍ଥାନରେ ସର୍ବସାଧାରଣଙ୍କ ପାଇଁ ପାର୍କ ନିର୍ମାଣ କରିବାକୁ ତାଙ୍କର ବହୁଦିନର ସ୍ବପ୍ନ ଥିଲା। ପାର୍କ ନିର୍ମାଣ ପାଇଁ ପଞ୍ଚାୟତରେ ଥିବା ଅନୁଦାନରୁ ୧୦ ଲକ୍ଷ ଓ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତ ଯୋଜନାରୁ ୧୦ ଲକ୍ଷ ଟଙ୍କା ବ୍ୟୟ ହୋଇଛି। ଏହି ପାର୍କ ନିର୍ମାଣ ପାଇଁ ଜିଲାପାଳ ସମର୍ଥ ବର୍ମା ଓ ବିଡିଓ ଗୋପବନ୍ଧୁ ଭୋସାଗର ପ୍ରେରଣା ଦେଇଥିଲେ। ତେବେ ପାର୍କଟି ସମ୍ପୂର୍ଣ୍ଣ ଅତ୍ୟାଧୁନିକ ଶୈଳୀରେ ନିର୍ମିତ ହୋଇ ସାରିଛି। ଏଥିରେ କରାଯାଇଥିବା କୃତ୍ରିମ ଝରଣା ଓ ଉଜ୍ଜ୍ୱଳ ଆଲୋକ ବ୍ୟବସ୍ଥା ଏ ଅଞ୍ଚଳର ଶୋଭା ବର୍ଦ୍ଧନ କରୁଛି ବୋଲି ପୂର୍ବତନ ସରପଞ୍ଚ ଅକ୍ଷୟ କୁମାର ଖଟୁଆ କହିଛନ୍ତି।
