ନୂଆଦିଲ୍ଲୀ, ୧୩ା୧୦ (ପି.ଟି.)-ଭାରତର ପୂର୍ବତନ ଫୁଟ୍ବଲ ଅଧିନାୟକ ଓ ମିଡ୍ଫିଲ୍ଡର ଚାର୍ଲଟନ ଚାପମ୍ୟାନଙ୍କର ହୃଦ୍ଘାତରେ ବାଙ୍ଗାଲୋରରେ ପରଲୋକ ହୋଇଯାଇଛି। ତାଙ୍କୁ ୪୯ବର୍ଷ ବୟସ ହୋଇଥିଲା। ୧୯୯୦ ଦଶକରେ କ୍ଲବ ସ୍ତରରେ ବାଇଚୁଙ୍ଗ ଭୂତିଆ ଓ ଆଇ.ଏମ୍. ବିଜୟନ ଓ ଚାପମ୍ୟାନ ୩ଜଣ ମିଶି ଏକ ବିପଜ୍ଜନକ କମ୍ବିନେଶନ ସୃଷ୍ଟି କରିଥିଲେ। ଚାପମ୍ୟାନ ଅସୁସ୍ଥ ହେବା ପରେ ରବିବାର ରାତିରେ ବେଙ୍ଗାଲୁରୁସ୍ଥିତ ଏକ ହସ୍ପିଟାଲରେ ଭର୍ତ୍ତି ହୋଇଥିଲେ। ସୋମବାର ସକାଳେ ତାଙ୍କର ମୃତ୍ୟୁ ଘଟିଥିଲା। ଚାପମ୍ୟାନ ଜଣେ ଖୁସ୍ମିଜାଜ ବ୍ୟକ୍ତି ଥିଲେ। ସେ ସବୁବେଳେ ଅନ୍ୟମାନଙ୍କୁ ସାହାଯ୍ୟ କରିବା ପାଇଁ ଆଗେଇ ଆସିଥାନ୍ତି ବୋଲି ତାଙ୍କର ଏକଦା ଭାରତ ଟିମ୍ ମେଟ୍ ବ୍ରୁନୋ କୁଟିନୋ କହିଛନ୍ତି। ଭାରତ ତରଫରୁ ୧୦୯୫ ରୁ ୨୦୦୧ ପର୍ଯ୍ୟନ୍ତ ପ୍ରତିନିଧିତ୍ୱ କରିଥିବା ଚାପମ୍ୟାନ ଜଣେ ସୃଜନଶୀଳ ମିଡ୍ଫିଲ୍ଡର ଥିଲେ। ତାଙ୍କ ଅଧିନାୟକତ୍ୱରେ ଭାରତ ୧୯୯୭ରେ ସାଫ୍ କପ୍ ଜିତିଥିଲା। କ୍ଲବ ସ୍ତରରେ ସେ ଇଷ୍ଟବେଙ୍ଗଲ ଏବଂ ବର୍ତ୍ତମାନ କାର୍ଯ୍ୟକ୍ଷମ ନ ଥିବା ଜେସିଟି ମିଲ୍ସ ତରଫରୁ ଖେଳି ବେଶ୍ ସଫଳତା ଅର୍ଜନ କରିଥିଲେ। ଚାପମ୍ୟାନ ୧୯୯୦ଦଶକରେ ଟାଟା ଫୁଟ୍ବଲ୍ ଏକାଡେମୀର ସୃଷ୍ଟି। ୧୯୯୩ରେ ସେ ଇଷ୍ଟବେଙ୍ଗଲରେ ଯୋଗ ଦେଇଥିଲେ। ସେହିବର୍ଷ ଏସିଆନ କପ୍ ଓ୍ବିନର୍ସ କପ୍ର ଏକ ପ୍ରଥମ ରାଉଣ୍ଡ ମ୍ୟାଚ୍ରେ ତାଙ୍କ ଦଳ ୬-୨ ଗୋଲରେ ଇରାକର ଅଲ୍ ଜ୍ୱାରା ନାମକ ଏକ କ୍ଲବକୁ ପରାସ୍ତ କରିଥିଲା। ଏହି ମ୍ୟାଚ୍ରେ ସେ ଏକ ହ୍ୟାଟ୍ରିକ ଅର୍ଜନ କରିଥିଲେ। ମାତ୍ର ୧୯୯୫ରେ ଜେସିଟିରେ ଯୋଗଦାନ ପରେ ତାଙ୍କ ପ୍ରଦର୍ଶନ ସବୁଠାରୁ ପ୍ରଶଂସନୀୟ ଥିଲା। ପଞ୍ଜାବର ଏହି କ୍ଲବ ସହ ସେ ୧୪ ଟ୍ରଫି ଜିତିଥିଲେ। ତନ୍ମଧ୍ୟରେ ଉଦ୍ଘାଟନୀ ନ୍ୟାଶନାଲ ଫୁଟ୍ବଲ ଲିଗ୍ (ଏନ୍ଏଫ୍ଏଲ୍) ୧୯୯୬-୯୭ ଅନ୍ତର୍ଭୁକ୍ତ। ଚାପମ୍ୟାନ ଆହୁରି ମଧ୍ୟ ବର୍ତ୍ତମାନ ଅଚଳ ହୋଇ ପଡ଼ିଥିବା ଏଫ୍ସି କୋଚିନ୍ ଦଳରେ ଯୋଗ ଦେଇଥିଲେ। କିନ୍ତୁ ବର୍ଷକ ପରେ ସେ ୧୯୯୮ରେ ଇଷ୍ଟବେଙ୍ଗଲକୁ ପ୍ରତ୍ୟାବର୍ତ୍ତନ କରିଥିଲେ। ୨୦୦୧ରେ କ୍ଲବ ତାଙ୍କ ଅଧିନାୟକତ୍ୱରେ ନ୍ୟାଶନାଲ ଫୁଟ୍ବଲ ଲିଗ୍ ଜିତିଥିଲା। ସେହି ବର୍ଷ ସେ ପ୍ରଫେଶନାଲ ଫୁଟ୍ବଲରୁ ତାଙ୍କର ଅବସର ଘୋଷଣା କରିଥିଲେ।
