ଭୁବନେଶ୍ୱର,(ବ୍ୟୁରୋ)/କଟକ ଅଫିସ, ୨ା୩:ଠକେଇ ମାମଲାରେ ଗିରଫ ହୋଇଥିବା ଆଇଏଫ୍ଏସ୍ ଅଫିସର ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶଙ୍କୁ ସୋମବାର ଜାମିନ ମିଳିଛି। ସ୍କାଏ କିଙ୍ଗ ଟ୍ରାଭେଲ୍ସ ବିଲ୍ ଠକେଇ ମାମଲାରେ ପାଠକ ବାପପୁଅଙ୍କୁ ହାଇକୋର୍ଟ ଜାମିନ ପ୍ରଦାନ କରିଛନ୍ତି। ୨ ଲକ୍ଷ ଟଙ୍କାର ଦୁଇଜଣ ଜାମିନଦାରଙ୍କ ବଦଳରେ ସେମାନଙ୍କୁ ଏହି ଜାମିନ ମିଳିଛି।
ସୂଚନାଯୋଗ୍ୟ, ଆକାଶ ନିଜକୁ ଟାଟା ମୋଟର୍ସର ଏମ୍ଡି ବୋଲି ପରିଚୟ ଦେବା ସହ ଜାଲ୍ ପ୍ରମାଣପତ୍ର ଦେଖାଇ ଭୁବନେଶ୍ୱର ଜନପଥ ରୋଡ୍ରେ ଥିବା ସ୍କାଏ କିଙ୍ଗ ଟ୍ରାଭେଲ ଏଜେନ୍ସିକୁ ଇମେଲ୍ କରିଥିଲେ। ୨୦୨୦ ଜୁନ୍ରେ ଏକ ଚାର୍ଟର ଫ୍ଲାଇଟ ବୁକିଂ
କରିବାକୁ କହିଥିଲେ। ସ୍କାଏ କିଙ୍ଗ୍ ପକ୍ଷରୁ ମଧ୍ୟ ଏକ ଫ୍ଲାଇଟ ବୁକିଂ କରାଯାଇଥିଲା। ଏ ବାବଦରେ ମୋଟ୍ ୨ କୋଟି ୭୮ ଲକ୍ଷ ୩୯ ହଜାର ଟଙ୍କା ବିଲ୍ ହୋଇଥିଲା। ଆକାଶ ଉକ୍ତ ଏଜେନ୍ସିକୁ ୨କୋଟି ୧୩ଲକ୍ଷ ୨୨ ହଜାର ଟଙ୍କା ଦେଇଥିଲେ। ପରବର୍ତ୍ତୀ ସମୟରେ ବାକି ଟଙ୍କା ଏଜେନ୍ସି ମାଗିବାରୁ ଆକାଶ ଧମକ ଦେଇଥିଲେ। ଏଥିରେ ତାଙ୍କ ବାପା ଅଭୟକାନ୍ତ ମଧ୍ୟ ସହଯୋଗ କରିଥିଲେ। ଏ ନେଇ ସ୍କାଏ କିଙ୍ଗ୍ର ମ୍ୟାନେଜିଂ ପାର୍ଟନର ପ୍ରଭାସ କୁମାର ଚୌଧୁରୀ ଭୁବନେଶ୍ୱର ଖାରବେଳନଗର ଥାନାରେ ପାଠକ ବାପପୁଅଙ୍କ ନାମରେ ଏତଲା ଦେଇଥିଲେ। ଏହି ଏତଲା ଆଧାରରେ ପୋଲିସ ଏକ ମାମଲା(ନଂ.୨୯୩/୨୦) ରୁଜୁ କରିଥିଲା। ପରେ ଏହି ମାମଲା ହାଇକୋର୍ଟକୁ ଯାଇଥିଲା। ପୂର୍ବରୁ ଠକେଇ ଓ ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ବାପପୁଅଙ୍କୁ ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ କୋର୍ଟ ଜାମିନ ମଞ୍ଜୁର କରିଥିଲେ। ଦୁର୍ନୀତି ଓ ଠକେଇ ଅଭିଯୋଗରେ ପାଠକ ବାପପୁଅଙ୍କୁ ଗତ ନଭେମ୍ବର ୨୭ ତାରିଖରେ ଭିଜିଲାନ୍ସ ଗିରଫ କରିଥିଲା।