ଢେଙ୍କାନାଳ ଅଫିସ, ୧୪ ।୮: ବାପାଙ୍କ ମୃତ୍ୟୁ ପରେ ମାନସିକ ଚାପରେ ଥିଲେ। ଶନିବାର ହିତାହିତ ଜ୍ଞାନ ହରାଇ ବ୍ଲେଡ୍ରେ କାଟି ପକାଇଥିଲେ ହାତଗୋଡ଼। ଗୁରୁତର ଅବସ୍ଥାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବାବେଳେ ୫ମ ମହଲାରୁ ଡେଇଁ ପୁଣି ଆତ୍ମହତ୍ୟା ଉଦ୍ୟମ କରିଛନ୍ତି ଢେଙ୍କାନାଳ ପରଜଙ୍ଗ ଥାନା ଡମସାହିର ସ୍ବର୍ଗତ ତଉଲିଆ ନାୟକଙ୍କ ପୁଅ ଚନ୍ଦନ (୩୭)। ସଙ୍କଟାପନ୍ନ ଅବସ୍ଥାରେ ତାଙ୍କୁ କଟକ ସ୍ଥାନାନ୍ତର କରାଯାଇଥିବାବେଳେ ଏଭଳି ଅଭାବନୀୟ ଘଟଣା ଜିଲାରେ ଆଲୋଡ଼ନ ସୃଷ୍ଟି କରିଛି।
ବାପା ତଉଲିଆଙ୍କ ମୃତ୍ୟୁ ପରେ ପରିବାରର ଆର୍ଥିକ ସ୍ଥିତି ଶୋଚନୀୟ ହୋଇପଡ଼ିଥିଲା। ଏହାକୁ ନେଇ ମାନସିକ ଚାପରେ ରହୁଥିଲେ ଚନ୍ଦନ। ସେ କୌଣସି କାର୍ଯ୍ୟରେ ଗଁଦିଆ ଥାନା ଦେଓଗଁାସ୍ଥିତ ଝିଆରୀ ଜ୍ୱାଇଁଙ୍କ ଘରକୁ ଆସିଥିଲେ। ଶୁକ୍ରବାର ମା’ ସୁକୁମାରୀ ଏକ ବୋଲେରୋ ଧରି ତାଙ୍କୁ ନେବା ପାଇଁ ଆସିଥିଲେ ହେଁ ସେ ଯାଇ ନ ଥିଲେ। ଶନିବାର ସକାଳେ ବ୍ଲେଡ୍ରେ ବେକ, ଦୁଇ ହାତ କାଟି ପ୍ରଥମେ ଆତ୍ମହତ୍ୟା ଉଦ୍ୟମ କରିଥିଲେ। ଦେଓଗଁାରେ ରହୁଥିବା ଝିଆରୀ ଜ୍ୱାଇଁ ପୂର୍ବାହ୍ନ ୧୦ଟାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଚନ୍ଦନ ୫ମ ମହଲାରେ ଥିବା ସର୍ଜରି ୱାର୍ଡରେ ଚିକିତ୍ସିତ ହେଉଥିଲେ। ତାଙ୍କ ପାଖରେ ସୁକୁମାରୀ ଥିଲେ। ଅପରାହ୍ନ ୩ଟାରେ ମା’ ୱାର୍ଡ ନିକଟ ଶୌଚାଳୟକୁ ଯାଇଥିବା ବେଳେ ଚନ୍ଦନ ବାହାରପଟୁ କବାଟ ଦେଇ ପାଞ୍ଚ ମହଲାରୁ ତଳକୁ ଡେଇଁ ପଡିଥିଲେ। ଚିକିତ୍ସାଳୟର ଜଣେ କର୍ମଚାରୀ ଶୌଚାଳୟ କବାଟ ଖୋଲିବା ବେଳକୁ ଚନ୍ଦନ ଶଯ୍ୟାରେ ନ ଥିଲେ। ପାଟିତୁଣ୍ଡ ଶୁଣି ତଳକୁ ଆସିବା ବେଳକୁ ବଗିଚାରେ ଚନ୍ଦନ ପଡ଼ିଥିଲେ। ତାଙ୍କୁ ତୁରନ୍ତ ଚିକିତ୍ସା କରାଯିବା ସହ ଡାକ୍ତରଙ୍କ ପରାମର୍ଶକ୍ରମେ କଟକ ସ୍ଥାନାନ୍ତର କରାଯାଇଛି।
ଏ ସଂକ୍ରାନ୍ତରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ କୁହନ୍ତି, ୱାର୍ଡ ନିକଟରେ ଥିବା ପାହାଚ ପାଖ ଝରକାରେ ଗ୍ରୀଲ୍ରେ କବାଟ ନ ଥିବା ଦେଖି ସେ ତଳକୁ ଡେଇଁପଡ଼ିଥିଲେ। ଏହାର ତଦନ୍ତ କରାଯାଉଛି। ସୂଚନାଯୋଗ୍ୟ, ଜିଲା ଚିକିତ୍ସାଳୟରେ ପୂର୍ବରୁ ଏଭଳି ୨ଟି ଘଟଣା ଘଟିଥିବା ନଜିର ରହିଛି।
