ଆରଡ଼ି, ,୧୫।୩ (ଡି.ଏନ.ଏ.) ଭଦ୍ରକ ଜିଲା ଚାନ୍ଦବାଲି ବ୍ଲକ ସାଠିବାଙ୍କୁଡ଼ା ଓ ବୋଡ଼କ ଗ୍ରାମର ମଧ୍ୟସ୍ଥଳରେ ୨୦ ନଂ. ଜାତୀୟ ରାଜପଥ ଦବି ଯାଇଥିଲା। ଫଳରେ ରାସ୍ତା ବୈତରଣୀ ନଦୀ ଆଡ଼କୁ ଢଳି ପଡ଼ିଥିଲା। ରବିବାର ରାତିରୁୁ ଉକ୍ତ ସ୍ଥାନରେ ମରାମତି ଆରମ୍ଭ ହୋଇଛି। ସେଠାରେ କଣ୍ଟ୍ରାକ୍ଟର ସମେତ ବିଭାଗୀୟ ଜେଇ ଉପସ୍ଥିତ ରହି କାମ ତଦାରଖ କରୁଛନ୍ତି। ପ୍ରାୟ ୧୦୦ଫୁଟ ଫାଟ ସୃଷ୍ଟି ସ୍ଥାନରୁ ପୋକଲିନ ସାହାଯ୍ୟରେ କଂକ୍ରିଟ ତଡ଼ାଯାଇଛି। ସୋମବାର ଥିବାରୁ ଆରଡ଼ି ଆଖଣ୍ଡଳମଣି ପୀଠକୁ ଏହି ରାସ୍ତା ଦେଇ ଆସିଥିବା ଗାଡ଼ିଗୁଡ଼ିକ କାମ ଯୋଗୁ ଉଭୟ ପାର୍ଶ୍ୱରେ ଅଟକି ରହିଥିଲା। ଗାଡ଼ିରେ ଥିବା ଶ୍ରଦ୍ଧାଳୁମାନେ ଅସନ୍ତୋଷ ବ୍ୟକ୍ତ କରିଥିଲେ। ପରେ ସ୍ଥାନୀୟ ଲୋକଙ୍କ ସହଯୋଗରେ ଗାଡ଼ିଗୁଡ଼ିକ ଠିକ୍ ଭାବେ ଚଳାଚଳ କରିଥିଲା। ତେବେ ଏତେଦିନ ହେଲା ରାସ୍ତାକାମ କାହିଁକି ହେଉ ନ ଥିଲା ବୋଲି ସ୍ଥାନୀୟ ଅଞ୍ଚଳର ଯୁବକମାନେ କଣ୍ଟ୍ରାକ୍ଟରଙ୍କୁ ପ୍ରଶ୍ନ କରିଥିଲେ। ଉକ୍ତ ରାସ୍ତାରେ ଫାଟ ସୃଷ୍ଟି ସ୍ଥାନରେ ସ୍ଥାୟୀ ମରାମତି ନେଇ ସେମାନେ ଆଲୋଚନା କରିଥିଲେ। ସୂଚନାଯୋଗ୍ୟ, ଜାତୀୟ ରାଜପଥର ଏହି ସ୍ଥାନରେ ପ୍ରତିବର୍ଷ ଫାଟ ସୃଷ୍ଟି ହୁଏ ଓ ଦାୟିତ୍ୱରେ ଥିବା ବିଭାଗୀୟ ଅଧିକାରୀ ସ୍ଥାୟୀ ମରାମତି ହେବା କଥା କହନ୍ତି। କିନ୍ତୁ ବର୍ଷେ ନ ପୂରୁଣୁ ରାସ୍ତାରେ ପୁଣି ଧସିଥାଏ। ସ୍ଥାୟୀ ମରାମତି ସମ୍ପର୍କିତ ଖବର ଗତ ଫେବୃୟାରୀ ୨ ଓ ଚଳିତମାସ ୧୦ ତାରିଖରେ ଧରିତ୍ରୀରେ ପ୍ରକାଶିତ ହୋଇଥିଲା। ଏ ସମ୍ପର୍କରେ ବିଭାଗୀୟ ଜେଇ ଶକ୍ତିବ୍ରତ ଜେନା କହିଛନ୍ତି, ଉକ୍ତ ରାସ୍ତା ମରାମତି କାମ ଆରମ୍ଭ ହୋଇଛି। କେବେ ଶେଷ ହେବ ତାହା କଣ୍ଟ୍ରାକ୍ଟରଙ୍କ କାର୍ଯ୍ୟ ଉପରେ ନିର୍ଭର କରେ। ତେବେ ରାସ୍ତା କାମ ଠିକ୍ ଭାବେ ନ ହେଲେ, ଏହାକୁ ଦୃଢ଼ ବିରୋଧ ସହ ଆବଶ୍ୟକ ପଡ଼ିଲେ ଆନ୍ଦୋଳନ କରାଯିବ ବୋଲି ସ୍ଥାନୀୟ ଯୁବକମାନେ ଚେତାବନୀ ଦେଇଛନ୍ତି।
