ଡେରାବିଶ,୪ା୧୨(ବେବର୍ତ୍ତା ଅଜୟ ଦାସ): ବିରୂପା ନଦୀର ଡେରାବିଶ ବ୍ଲକ ଅନ୍ତର୍ଗତ ମଙ୍ଗଳପୁର ପଞ୍ଚାୟତ ତ୍ରିପୁରାରିପୁର ଗ୍ରାମ ଘଣ୍ଟପଦାସ୍ଥିତ ଶାଗୁଣାଘାଇଠାରେ ଶନିବାର ଅପରାହ୍ନରେ ନଦୀବନ୍ଧ ନିକଟରେ ଥିବା ପଠାରେ ୧୦୦ଫୁଟରୁ ଊର୍ଦ୍ଧ୍ୱ ଲମ୍ବ ଓ ୧୫ ଫୁଟରୁ ଊର୍ଦ୍ଧ୍ୱ ଗଭୀରର ଫାଟ ସୃଷ୍ଟି ହୋଇ ଅତଡ଼ାମାନ ଭୁଶୁଡ଼ିବାରେ ଲାଗିଥିଲା। ଏହି ଘଟଣାରେ ନଦୀକୂଳିଆ ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି। ଖବରପାଇ ବିଳମ୍ବିତ ରାତିରେ କେନ୍ଦ୍ରାପଡ଼ା ଜଳସମ୍ପଦ ବିଭାଗର ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀ, ସହକାରୀ ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ରାୟଙ୍କ ସମେତ ଅନ୍ୟ ଯନ୍ତ୍ରୀମାନେ ଘଟଣାସ୍ଥଳ ପରିଦର୍ଶନ କରିଥିଲେ। ତେବେ ରବିବାର ସକାଳୁ ନଦୀପଠାରେ ଏହି ଫାଟ କ୍ରମଶଃ ବୃଦ୍ଧି ପାଇଥିଲା।
ଘଣ୍ଟପଦା ଗ୍ରାମର ପ୍ରଫୁଲ୍ଲ କୁମାର ସିଂଙ୍କ ସୂଚନା ଅନୁଯାୟୀ, ରବିବାର ସନ୍ଧ୍ୟା ସୁଦ୍ଧା ଏହି ଫାଟ କ୍ରମଶଃ ୧୫୦ ଫୁଟରୁ ଊର୍ଦ୍ଧ୍ୱ ଲମ୍ବର ଏବଂ ୩୦ ଫୁଟରୁ ଅଧିକ ଗଭୀର ଦବି ଯାଇଥିବାରୁ ସାଧାରଣରେ ଆତଙ୍କ ଖେଳିଯାଇଛି। ଏହି ବନ୍ଧର ଗୋଟିଏ ପାର୍ଶ୍ୱରେ ବିରୂପା ନଦୀ ଥିବାବେଳେ ଅନ୍ୟ ପାର୍ଶ୍ୱରେ ପଟ୍ଟାମୁଣ୍ଡାଇ କେନାଲ ପ୍ରବାହିତ ହେଉଛି। ଜଳସମ୍ପଦ ବିଭାଗ ପକ୍ଷରୁ ନଦୀବନ୍ଧ ସୁଦୃଢ଼ୀକରଣ କରାଯିବା ସହ ଯାଜପୁର ଜିଲା ବାଲିଚନ୍ଦ୍ରପୁରଠାରୁ ପଟ୍ଟାମୁଣ୍ଡାଇ ଯାଏ ବନ୍ଧକୁ ଉଚ୍ଚ କରାଯାଇ ସବୁଦିନିଆ ରାସ୍ତାରେ ପରିଣତ କରାଯାଇଛି। ଏହି ରାସ୍ତା ଦେଇ ଦୈନିକ ଶହଶହ ସଂଖ୍ୟାରେ ଯାନବାହନ ଚଳାଚଳ କରୁଥିବା ବେଳେ କେନ୍ଦ୍ରାପଡ଼ା ଓ ଯାଜପୁର ଜିଲାର ମୁଖ୍ୟ ରାସ୍ତା ପାଲଟିଛି। ମାତ୍ର ନଦୀବନ୍ଧର ଉନ୍ନତୀକରଣ ସମୟରେ ଶାଗୁଣାଘାଇଠାରେ ଥିବା ପୁରୁଣା କେନାଲ ବନ୍ଧ ରାସ୍ତାଟିକୁ ବାଦ୍ ଦିଆଯାଇ ବନ୍ଧକୁ ଉଚ୍ଚା କରାଯାଇଥିବାରୁ ଘଣ୍ଟପଦା ନିକଟରେ ଏହି ସ୍ଥାନଟି ଅର୍ଦ୍ଧଚନ୍ଦ୍ର ଅବସ୍ଥାରେ ଖାଲୁଆ ହୋଇ ରହିଛି। ଫଳରେ ଏଠାରେ ବର୍ଷା ପାଣି ଜମି ରହିବା ସହ ନଦୀକୁ ଝର ମଧ୍ୟ ସୃଷ୍ଟି ହେଉଛି, ଯାହାକି ନଦୀବନ୍ଧ ପ୍ରତି ବିପଦ ସୃଷ୍ଟି ହୋଇଥିବା ନେଇ ସେ ପ୍ରକାଶ କରିଛନ୍ତି। କେନ୍ଦ୍ରାପଡ଼ା ଜଳସମ୍ପଦ ବିଭାଗ ପକ୍ଷରୁ ଶାଗୁଣାଘାଇଠାରେ ନଦୀର ଗଭୀର ୪୫ ଫୁଟରୁ ଊର୍ଦ୍ଧ୍ୱ ରହିଥିବା ବେଳେ ବନ୍ଧକୁ ସୁରକ୍ଷିତ ରଖିବା ପାଇଁ କେନ୍ଦ୍ରାପଡ଼ା ଜଳସମ୍ପଦ ବିଭାଗ ପକ୍ଷରୁ ୭ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ୧୧ଟି ସ୍ପର୍ ନିର୍ମାଣ କରାଯାଇଛି। ନଦୀର ଯେଉଁଠି ସ୍ପର୍ ନାହିଁ ସେହି ସ୍ଥାନରେ ପଠାରେ ଫାଟ ସୃଷ୍ଟି ହେଉଥିବା ଦେଖିବାକୁ ମିଳିଛି। ତେବେ ଏହି ସ୍ଥାନରେ ପଥରର ଓ୍ବାଲ୍ ନିର୍ମାଣ କରାଯାଇ ଅଧିକ ସଂଖ୍ୟାରେ ସ୍ପର୍ ନିର୍ମାଣ କରାଗଲେ ବନ୍ଧ ପ୍ରତି ବିପଦ ରୁହନ୍ତା ନାହିଁ ବୋଲି ପ୍ରଫୁଲ୍ଲ କହିଛନ୍ତି। ଏହି ବନ୍ଧଠାରୁ ନଦୀର ଦୂରତା ୧୦୦ଫୁଟ ଥିବାବେଳେ ବର୍ତ୍ତମାନ ତାହା ବନ୍ଧ ଆଡ଼କୁ କ୍ରମଶଃ ଫାଟ ସୃଷ୍ଟି ହୋଇ ଅତଡ଼ା ଖାଇବାରେ ଲାଗିଥିବାରୁ ନଦୀକୂଳିଆ ଗ୍ରାମ ପ୍ରତି ବିପଦ ଦେଖାଦେଇଛି। ଏ ସମ୍ପର୍କରେ ବିଭାଗୀୟ ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀଙ୍କୁ ପଚାରିବାରେ ଘଟଣାସ୍ଥଳ ପରିଦର୍ଶନ ପରେ ବନ୍ଧକୁ ସୁରକ୍ଷିତ ରଖିବା ପାଇଁ ବିଭାଗ ପକ୍ଷରୁ ଏକ ଏଷ୍ଟିମେଟ୍ କରାଯାଇ ତୁରନ୍ତ କାର୍ଯ୍ୟ ହେବା ନେଇ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି।