କଟକ ଅଫିସ,୨୯।୩: ଭାଇଚାରାର ସହର କଟକରେ ସୋମବାର ରଙ୍ଗର ପର୍ବ ହୋଲି ପାଳିତ ହୋଇଯାଇଛି। ଚଳିତ ବର୍ଷ କରୋନା କଟକଣା ହୋଲିକୁ ଫିକା କରିଦେଇଛି। ଲୋକେ ଘରେ ରହି ହୋଲି ମନାଇଛନ୍ତି। ଛୋଟରୁ ବଡ ସଭିଏଁ ରଙ୍ଗ ଅବିରରେ ରଙ୍ଗେଇ ହୋଇଛନ୍ତି। ତେବେ ହୋଲି ଯୋଗୁ କରୋନା ସଂକ୍ରମଣ ବଢ଼ିବା ଆଶଙ୍କାରେ ରାଜ୍ୟ ସରକାର ଏହାକୁ ନଜରରେ ରଖି ବିଭିନ୍ନ କଟକଣା ଜାରି କରିଥିଲେ। ବିଶେଷକରି ସହରର ଜନଗହଳିପୂର୍ଣ୍ଣ ସ୍ଥାନରେ କଟକଣା କଡ଼ାକଡି କରାଯାଇଛି। ସହରବାସୀ ପ୍ରଶାସନର କଟକଣାକୁ ମାନି ଘରେ ରହି ହୋଲି ଖେଳିଥିଲେ। ଫଳରେ ରାସ୍ତାଘାଟ ଖାଁ ଖାଁ ରହିଥିଲା। ଏଥିସହ କେତେକ ଛକରେ ଅମାନିଆଙ୍କୁ ପୋଲିସ କାବୁ କରିଥିବା ଦେଖିବାକୁ ମିଳିଥିଲା ।
ହୋଲିକୁ ଦୃଷ୍ଟିରେ ରଖି କଟକ ଡିସିପି କହିଛନ୍ତି, ହୋଲି ପାଇଁ ସହରରେ ୧୫ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ସହରର ଗଳିକନ୍ଦିରେ ପିସିଆର୍ ଭ୍ୟାନ୍ ଏବଂ ବାଇକ୍ ପାଟ୍ରୋଲିଂ କରାଯାଉଛି। ସହରର ଗୁରୁତ୍ୱପୂର୍ଣ୍ଣ ଛକଗୁଡିକରେ ପୋଲିସ ଫୋର୍ସ ମୁତୟନ କରାଯାଇଛି। ରାଜରାସ୍ତାରେ ହୋଲି ଖେଳିଲେ ପୋଲିସ ପକ୍ଷରୁ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିସିପି ସୂଚନା ଦେଇଛନ୍ତି।
