ସୁଲପୁର,୯।୭(ରଞ୍ଜିତ ରାଉତ):ଯାଜପୁର ଜିଲା ରସୁଲପୁର ବ୍ଲକ ବନ୍ଧଡ଼ିହ ପଞ୍ଚାୟତର କଣ୍ଡିଆ ସାହିବାସୀଙ୍କୁ ପୁଣି ଘାରିଲାଣି ବନ୍ୟା ଭୟ। ୨୯ ଅଗଷ୍ଟ ୨୦୨୦ରେ ବ୍ରାହ୍ମଣୀ ନଦୀରେ ଆସିଥିବା ପ୍ରଳୟଙ୍କାରୀ ବନ୍ୟାରେ କଣ୍ଡିଆ ସାହି ନିକଟରେ ଘାଇ ସୃଷ୍ଟି ହୋଇଥିଲା। ଫଳରେ ସେଠାକାର ରମଣି ରଞ୍ଜନ ଜେନାଙ୍କ ୨ ମହଲା କୋଠା ବନ୍ୟା ସ୍ରୋତରେ ଭାସି ଯାଇଥିଲା। ଆଉ କେତେଜଣଙ୍କ କଚ୍ଚାଘର ଭାଙ୍ଗିଯିବା ସହ ମାଟି କାନ୍ଥ ଭୁଶୁଡ଼ି ପଡ଼ିଥିଲା। ଏହାରି ଭତିରେ ବନ୍ୟାକୁ ୩ବର୍ଷ ବିତିବାକୁ ବସିଲାଣି, ହେଲେ ଏବେ ବି ନଦୀବନ୍ଧ ସୁଦୃଢ଼ୀକରଣ କାର୍ଯ୍ୟ ଅଧପନ୍ତରିଆ ହୋଇପଡ଼ି ରହିଛି। ରାଜ୍ୟରେ ମୌସୁମୀ ସକ୍ରିୟ ରହିଛି। ବଙ୍ଗୋପସାଗରରେ ଘୁର୍ଣ୍ଣିବଳୟ ସୃଷ୍ଟି ହୋଇ ନଦୀ ଉପର ମୁଣ୍ଡରେ ବର୍ଷା ହେବା ସମ୍ଭାବନା ବଢ଼ିଯାଇଛି। ଏଥର ବ୍ରାହ୍ମଣୀ ନଦୀରେ ବନ୍ୟା ଆସିଲେ କଣ୍ଡିଆ ସାହି ନିକଟରେ ପୁଣି ଘାଇ ସୃଷ୍ଟି ହେବ ବୋଲି ଲୋକେ ଆଶଙ୍କା କରିଛନ୍ତି। ତେଣୁ ତୁରନ୍ତ ଘାଇ ସ୍ଥାନରେ ନଦୀବନ୍ଧ ସୁଦୃଢ଼ୀକରଣ ପାଇଁ ସାଧାରଣରେ ଦାବି ହୋଇଛି।
ବରୀ ଜଳ ସମ୍ପଦ ବିଭାଗ ଉପଖଣ୍ଡ କାର୍ଯ୍ୟାଳୟ ଓ ରତ୍ନଗିରି ସେକ୍ସନ ଅଧୀନ ବନ୍ଧଡ଼ିହ ପଞ୍ଚାୟତର କଣ୍ଡିଆ ସାହିଠାରେ ୨୦୦ମିଟରରୁ ଊର୍ଦ୍ଧ୍ୱ ଲମ୍ବର ଘାଇ ସୃଷ୍ଟି ହୋଇଥିଲା। ବିଭାଗ ପକ୍ଷରୁ ଅସ୍ଥାୟୀ ଭାବେ ବାଉଁଶ ଖୁଣ୍ଟି ଓ ବାଲିବସ୍ତା ସହାୟତାରେ ଘାଇ ମୁହଁକୁ ବୁଜି ଦିଆଯାଇଥିଲା। ମରାମତି ସମୟରେ କାର୍ଯ୍ୟରେ ତ୍ରୁଟିବିଚ୍ୟୁତି ଯୋଗୁ ଘାଇ ସ୍ଥାନରେ ବାରମ୍ବାର ଦୁର୍ଘଟଣା ଘଟୁଥିଲା। ପରବର୍ତ୍ତୀ ଅବସ୍ଥାରେ ଉକ୍ତ ଘାଇ ସ୍ଥାନକୁ ସ୍ଥାୟୀ ଭାବେ ମରାମତି କରିବା ପାଇଁ ବିଭାଗ ପକ୍ଷରୁ ବ୍ୟୟବରାଦ କରାଯାଇଥିଲା। ହେଲେ ଠିକାଦାରଙ୍କ ପକ୍ଷରୁ ବନ୍ଧକୁ ମାଟି ବଦଳରେ ବାଲିରେ ବନ୍ଧା ଯାଇଥିଲା। ଫଳରେ ଏହାକୁ ନେଇ ସ୍ଥାନୀୟ ଅଞ୍ଚଳର ଜନସାଧାରଣ ବିରୋଧ କରିଥିଲେ। ଘାଇ ସ୍ଥାନରେ ବନ୍ଧର ଉଭୟ ପାର୍ଶ୍ୱକୁ ସୁଦୃଢ଼ୀକରଣ କରିବା ଓ ନିର୍ମାଣ କାର୍ଯ୍ୟର ଗୁଣବତ୍ତାକୁ ବଜାଇ ରଖିବା ପାଇଁ ଜନସାଧାରଣ ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋରଙ୍କ ଦୃଷ୍ଟି ଆକର୍ଷଣ କରିଥିଲେ। ସେତେବେଳେ ଜିଲାପାଳ ବନ୍ଧ ନିର୍ମାଣ ସ୍ଥଳ ପରିଦର୍ଶନ କରିବା ସହ ଉଭୟ ପାର୍ଶ୍ୱକୁ ସୁଦୃଢ଼ୀକରଣ କରିବାକୁ ନିର୍ଦ୍ଦେଶ ଦେଇଥିଲେ। ଏହାରି ଭିତରେ ୨ବର୍ଷରୁ ଊର୍ଦ୍ଧ୍ୱ ସମୟ ଅତିବାହିତ ହୋଇଗଲାଣି। ହେଲେ ଏଯାଏ ନଦୀବନ୍ଧ ଗୋଟିଏ ପାର୍ଶ୍ୱରେ ପଥର ପ୍ୟାକିଂ କାର୍ଯ୍ୟ ସଂପୂର୍ଣ୍ଣ କରାଯାଇ ପାରିନାହିଁ। ବିଭାଗ ପକ୍ଷରୁ ନଦୀ ପାର୍ଶ୍ୱକୁ ପ୍ରସ୍ତର ପ୍ୟାକିଂ କରି ଦିଆଯାଇ ଥିବାବେଳେ ଅପର ପାର୍ଶ୍ୱକୁ ଖାଲି ଛାଡ଼ି ଦିଆଯାଇଛି। ମରାମତିର ୨ବର୍ଷ ପରେ ବି ବନ୍ଧ ପିଚୁ କରିବାର ବିଧିକୁ ଏଠାରେ ଅଣଦେଖା କରାଯାଇଛି। ଘାଇ ଉପରି ଭାଗରେ କେବଳ କ୍ରଶରଗୁଣ୍ଡ ପଡ଼ି ରହିଛି। ଏହାଛଡ଼ା ଘାଇ ସ୍ଥାନରେ ପୁଣି ଘଳିଆ ପଡ଼ି ବନ୍ଧ ପ୍ରତି ବିପଦ ସୃଷ୍ଟି କରିବ ବୋଲି ବନ୍ୟାରେ ସର୍ବସ୍ବ ହରାଇଥିବା ରମଣି ପ୍ରକାଶ କରିଛନ୍ତି। ଏ ସମ୍ପର୍କରେ ବରୀ ଜଳସମ୍ପଦ ବିଭାଗ ସହକାରୀ ଯନ୍ତ୍ରୀ ମନୋରଞ୍ଜନ ତ୍ରିପାଠୀଙ୍କୁ ପଚାରିବାରୁ ସେ କହିଛନ୍ତି, ବନ୍ଧର ଏଭଳି ସ୍ଥିତି ସମ୍ପର୍କରେ ଅଭିଯୋଗ ଆସିବା ପରେ ସେ ଘଟଣା ସ୍ଥଳ ଅନୁଧ୍ୟାନ କରିଛନ୍ତି। ବନ୍ୟା ଆସିଲେ ସେଠାରେ ଘାଇ ସୃଷ୍ଟି ହେବା ସମ୍ଭାବନା ନାହିଁ। ଏ ଦିଗରେ ବିଭାଗ ସଜାଗ ରହିଛି। ବନ୍ଧର ଅପରପାର୍ଶ୍ୱରେ ସୁରକ୍ଷା କାନ୍ଥ ଦେବା ସହ ବନ୍ଧକୁ ସୁଦୃଢ଼ କରିବା ପାଇଁ ପ୍ରସ୍ତାବ ରଖାଯିବ। ତେଣୁ ବନ୍ଧକୁ ପିଚୁ କରିବା ପାଇଁ ବୟବରାଦ କରିବାକୁ ବିଭାଗୀୟ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରିବେ ବୋଲି ସେ ପ୍ରକାଶ କରିଛନ୍ତି।