ତାଳଚେର,୨୧।୩(ନି.ପ୍ର.): ତାଳଚେରର ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳାଙ୍କ ବାର୍ଷିକ ଯାତ୍ରା ଓ ୨୦ ତମ ଲୋକ ମହୋତ୍ସବ ନିମନ୍ତେ ଏକ ପ୍ରସ୍ତୁତି ବୈଠକ ଶୁକ୍ରବାର ଗୋପାଳପ୍ରସାଦସ୍ଥିତ ପୀଠ ପରିସରରେ ଅନୁଷ୍ଠିତ ହୋଇଯାଇଛି। ଏଥିରେ ଉପଜିଲାପାଳ ତଥା ଟ୍ରଷ୍ଟବୋର୍ଡ ମ୍ୟାନେଜିଂ ଟ୍ରଷ୍ଟି ବିଶ୍ୱରଞ୍ଜନ ରଥ ଅଧ୍ୟକ୍ଷତା କରିଥିଲେ। ଟ୍ରଷ୍ଟ ସଦସ୍ୟ ସୌଭାଗ୍ୟ ଚନ୍ଦ୍ର ପ୍ରଧାନ ତାଳଚେରର ରାଜା ରାଜେନ୍ଦ୍ର ଚନ୍ଦ୍ର ଦେବ ଓ ଉପସ୍ଥିତ ସଦସ୍ୟମାନଙ୍କୁ ସ୍ବାଗତ କରିଥିଲେ। ଉପଜିଲାପାଳ ରଥ କହିଥିଲେ, ଏପ୍ରିଲ ମାସର କୋଭିଡ୍ ଗାଇଡ୍ଲାଇନ୍ରେ ଯାତ୍ରା ଓ ମହୋତ୍ସବକୁ ଅନୁମତି ମିଳିଲେ, ୨ ତାରିଖ ବୈଠକରେ ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ। ୪/୫ ଦିନ ମଧ୍ୟରେ ସବ୍ କମିଟିମାନ ଗଠନ କରିବାକୁ ଉପଜିଲାପାଳ ପରାମର୍ଶ ଦେଇଥିଲେ। ଚଳିତବର୍ଷ ଏକ ମହିଳା ସବ୍ କମିଟି ଗଠନ, ଆଜୀବନ ସଦସ୍ୟଙ୍କ ସଂଖ୍ୟା ବୃଦ୍ଧି କରିବା, ଅନୁଗୋଳ ଓ ତାଳଚେର ଶିଳ୍ପାଞ୍ଚଳରେ ଥିବା ଶିଳ୍ପସଂସ୍ଥାଗୁଡ଼ିକରୁ ଅର୍ଥ ସଂଗ୍ରହ କରିବା ନିମନ୍ତେ ବୈଠକରେ ବିଭିନ୍ନ ସଦସ୍ୟ ପ୍ରସ୍ତାବ ଦେଇଥିଲେ। ମା’ଙ୍କ ପୀଠ ପରିସରରେ ଏକ ଅତ୍ୟାଧୁନିକ ଯାତ୍ରୀ ନିବାସ ନିର୍ମାଣ ପାଇଁ ରାଜା ରାଜେନ୍ଦ୍ର ଦେବ ପ୍ରସ୍ତାବ ଆଗତ କରିଥିଲେ। ଏହି ଅବସରରେ କଲିୟାରୀ ଥାନା ଅଧିକାରୀ ରାଜେନ୍ଦ୍ର ନାରାୟଣ ପଟ୍ଟନାୟକଙ୍କୁ ଟ୍ରଷ୍ଟବୋର୍ଡ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ଭବ୍ୟ ମନ୍ଦିର ନିର୍ମାଣ ନିମନ୍ତେ ହିଙ୍ଗୁଳା ସେକ୍ଟର ପୁରୁଣା ଟ୍ରକ୍ ମାଲିକ ସଂଘ ପକ୍ଷରୁ ସଭାପତି ଜନାର୍ଦ୍ଦନ ମହାନ୍ତି ଓ ସମ୍ପାଦକ ଉଗ୍ରସେନ ପ୍ରଧାନ ୧୪ ଲକ୍ଷ ୪୬ ହଜାର ୫୦ ଟଙ୍କା ଦାନ କରିଥିଲେ। ସ୍ବର୍ଗତ ପ୍ରହଲ୍ଲାଦ ଚନ୍ଦ୍ର ମାଝିଙ୍କ ସ୍ମୃତି ଉଦ୍ଦେଶ୍ୟରେ ତାଙ୍କ ପୁତ୍ର ସନ୍ତୋଷ ମାଝି ଓ ପରିବାରବର୍ଗ ୧ ଲକ୍ଷ ଟଙ୍କା ଦାନ କରିଥିଲେ। ଟ୍ରଷ୍ଟ ବୋର୍ଡ ପକ୍ଷରୁ ସମସ୍ତଙ୍କୁ ସାଧୁବାଦ ଦିଆଯାଇଥିଲା। ସଦସ୍ୟ ରାଜେନ୍ଦ୍ର କୁମାର ସିଂହ ଧନ୍ୟବାଦ ଅର୍ପଣ କରିଥିଲେ। ଅନ୍ୟମାନଙ୍କ ମଧ୍ୟରେ ବିଡିଓ ଶିବ କୁମାର ମିଶ୍ର, ତହସିଲଦାର ମନ୍ମଥ ନାୟକ, ଜିଲା ଜଳ ଓ ପରିମଳ ବିଭାଗ ଅଧିକାରୀ ଅଜିତ କୁମାର ବେହେରା, ଯୋଗାଣ ଅଧିକାରୀ ଲିପ୍ସାରାଣୀ ରାଉତ, ଜଗନ୍ନାଥ ଏରିଆ ମହାପ୍ରବନ୍ଧକ ପି.ବି. ରେଡ୍ଡୀ, ହିଙ୍ଗୁଳା ଏରିଆ ମହାପ୍ରବନ୍ଧକ ଏ.କେ. ସ୍ବର୍ଣ୍ଣକାର, ଜିଲା ପରିଷଦ ସଦସ୍ୟ ଅମିୟ ପ୍ରଧାନ, ବିଭିନ୍ନ ଗ୍ରାମର ସରପଞ୍ଚ, ସମିତି ସଭ୍ୟ ପ୍ରମୁଖ ଉପସ୍ଥିତ ଥିଲେ।