ତେନ୍ତୁଳିଖୁଣ୍ଟି, ୩୧।୧୨(ଚିଦାନନ୍ଦ ସାହୁ)ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ମଞ୍ଚାଗାଁ ଜଳବନ୍ଦୀ ଅଞ୍ଚଳବାସୀଙ୍କ ପାଇଁ ଯୋଗାଇ ଦିଆଯାଇଥିବା ମୋଟର ଚାଳିତ ଲଞ୍ଚରେ ଛିଦ୍ର ରହିଛି। ଠିକ୍ ସମୟରେ ଏହାର ମରାମତି କରାଯାଉ ନ ଥିବା ଅଭିଯୋଗ ହେଉଛି। ଫଳରେ ଲୋକେ ଯାତାୟତ ପାଇଁ ବିପଦପୂର୍ଣ୍ଣଭାବେ ଦେଶୀ ଓ ମାଛଧରା ବୋଟ୍ ଉପରେ ନିର୍ଭର କରୁଛନ୍ତି।
ସୂଚନାନୁଯାୟୀ, ୧୦ବର୍ଷ ପୂର୍ବେ ଜଳବନ୍ଦୀ ଅଞ୍ଚଳବାସୀଙ୍କୁ ଦେଶୀ ଡଙ୍ଗାରେ ବିପଦପୂର୍ଣ୍ଣ ଯାତ୍ରାରୁ ବିରତ କରିବାକୁ ମୋଟର ଚାଳିତ ଲଞ୍ଚ ସେବାକୁ ତତ୍କାଳୀନ ବିଧାୟକ ମନୋହର ରନ୍ଧାରୀ ଲୋକାର୍ପଣ କରିଥିଲେ। ଉକ୍ତ ଲଞ୍ଚରେ ଯାତ୍ରୀ ପିଛା ଯିବା ଆସିବା ପାଇଁ ୩୦ ଟଙ୍କା ନିଆଯାଉଛି। ଲଞ୍ଚ ଜଳ ଭଣ୍ଡାରରେ ଯିବାବେଳେ ଏହା ଭିତରେ ଥିବା ପଥର ଆଦିରେ ବାଡେଇ ହୋଇ କ୍ଷତିଗ୍ରସ୍ତ ହେଉଛି। ପ୍ରକୃତପକ୍ଷେ ସମୟ ସମୟରେ ଏ ସବୁ ତଦାରଖ କରି ଆବଶ୍ୟକ ମରାମତି କରିବା କଥା। କିନ୍ତୁ ଲଞ୍ଚ ଦାୟିତ୍ୱ ବୁଝୁଥିବା ତହସିଲଦାର କାର୍ଯ୍ୟାଳୟ ଏଥିପ୍ରତି ଧ୍ୟାନ ଦେଇ ନ ଥିବା ଅଭିଯୋଗ ହେଉଛି। ଉକ୍ତ ଲଞ୍ଚର ମୁହଁ ଆଡେ ଏକ ଛିଦ୍ର ସୃଷ୍ଟି ହୋଇଥିବା ଖବର ୧୩ ଜୁନ୍ରେ ପ୍ରକାଶ ପାଇବା ପରେ ସାମାନ୍ୟ ମରାମତି କରାଯାଇଥିଲେ। ବର୍ତ୍ତମାନ ସେହି ଲଞ୍ଚରେ ଆଉଥରେ ଛିଦ୍ର ସୃଷ୍ଟି ହୋଇଛି। ସେହି ରାସ୍ତା ଦେଇ ଧୀରେଧୀରେ ଜଳ ପ୍ରବେଶ କରୁଛି। ଯାତ୍ରୀଙ୍କ ନିରାପତ୍ତା ପାଇଁ ଏବେ ଲଞ୍ଚ ଚଳାଚଳ ଏକ ପ୍ରକାର ବନ୍ଦ ରହିଛି। ଦେଶୀ ବୋଟ ନ ହେଲେ ମାଛଧରା ବୋଟରେ ବିପଦପୂର୍ଣ୍ଣ ଜଳ ଯାତ୍ରା ପାଇଁ ଜଳବନ୍ଦୀବାସୀ ବାଧ୍ୟ। ଜଳବନ୍ଦୀ ଗାଁରେ ଟିକାକରଣ କାର୍ଯ୍ୟ ପାଇଁ ସ୍ବାସ୍ଥ୍ୟ କର୍ମଚାରୀ ଏହି ଲଞ୍ଚ ବ୍ୟବହାର କରୁଥିଲେ। ଜିଲା ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଅନ୍ୟା ଦାସ ଜଳବନ୍ଦୀବାସୀଙ୍କୁ ସେମାନଙ୍କ ଗ୍ରାମରେ ଯାଇ ରାସନ ଦେବା ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଥିଲେ। ଏସବୁ କାର୍ଯ୍ୟ ପାଇଁ ଦ୍ୱିତୀୟ ଲଞ୍ଚ ବ୍ୟବସ୍ଥା କରାଯାଇ ପାରିନି। ଏବେ ଝଲାଗୁଡ଼ା, ଗୁରୁ ମାଈଗୁଡ଼ା, ବାଗ୍ରା, ଟାଙ୍ଗିଣିକୋଟ, ତଲଙ୍ଗବାସୀ ଅସୁବିଧା ଭୋଗ କରୁଛନ୍ତି। ସେମାନେ ପୁଣି ଦେଶୀ ଡଙ୍ଗା ବ୍ୟବହାର ପାଇଁ ବାଧ୍ୟ ହୋଇଛନ୍ତି। ତ୍ୱରିତ ମରାମତି ନ ହେଲେ ଜଳବନ୍ଦୀବାସୀ ହାଟ ପାଳି ଗୁରୁବାର ଦିନ ଦେଶୀ ଡଙ୍ଗା ନେଇ ଯାତ୍ରା କରିବେ। ଲଞ୍ଚ ଡ୍ରାଇଭର ଡମୁ ମୁଦୁଲି ଏ ସମ୍ପର୍କରେ ତହସିଲଦାର ଅଶୋକ କୁମାର ମୁଦୁଲିଙ୍କୁ ଜଣାଇଛନ୍ତି। ଉକ୍ତ ଲଞ୍ଚ ମରାମତି ଓ ନୂତନ ଲଞ୍ଚ ବ୍ୟବସ୍ଥା ପାଇଁ ପ୍ରସ୍ତାବ ଦେଇଥିବା ତହସିଲଦାର କହିଛନ୍ତି। ତୁରନ୍ତ ଆବଶ୍ୟକ ପଦକ୍ଷେପ ନେବା ସହ ଆଉ ଏକ ମୋଟର ଚଳିତ ଲଞ୍ଚ ଯୋଗାଇ ଦେବାକୁ ଜଳବନ୍ଦୀ ଅଞ୍ଚଳବାସୀ ଦାବି କରିଛନ୍ତି।
ଜଳଭଣ୍ଡାର ବୁଲିବାକୁ ଆସୁଥିବା ପର୍ଯ୍ୟଟକଙ୍କ ପାଇଁ ମୋଟର ଲଞ୍ଚ ଆବଶ୍ୟକ। କିନ୍ତୁ ବ୍ୟବସ୍ଥା ନାହିଁ। ଇନ୍ଦ୍ରାବତୀ ଡ୍ୟାମ ଓ ଜଳଭଣ୍ଡାରକୁ ପର୍ଯ୍ୟଟନ ମାନଚିତ୍ରରେ ପର୍ଯ୍ୟଟନ ବିଭାଗ ସ୍ଥାନ ଦେଇଛି। ତେଣୁ ସ୍ବତନ୍ତ୍ର ଭାବେ ଜଳଭଣ୍ଡାର ପରିକ୍ରମା ପାଇଁ ମୋଟର ଚାଳିତ ଲଞ୍ଚ ଯୋଗାଇବା ଉଚିତ ବୋଲି ଲୋକେ ଦାବି କରିଛନ୍ତି।