ନୂଆଦିଲ୍ଲୀ: ଡ୍ରାଇଭିଂ ବେଳେ ମୋବାଇଲ କିମ୍ବା ଅନ୍ୟ ହ୍ୟାଣ୍ଡ ହୋଲ୍ଡ ଡିଭାଇସର ବ୍ୟବହାର କରାଯାଇ ପାରିବ। ଏହା କେବଳ ରୁଟ୍ ଦେଖବା ପାଇଁ ବ୍ୟବହାର କରାଯାଇ ପାରିବ ବୋଲି ସଡକ ପରିବହନ ମନ୍ତ୍ରଣାଳୟ ପକ୍ଷରୁ ରବିବାର ସୂଚନା ରହିଛି। ଏ ନେଇ ମନ୍ତ୍ରଣାଳୟ ନୂଆ ନିୟମ କାର୍ଯ୍ୟକାରୀ କରାଇବ। ଅକ୍ଟୋବର ପହିଲାରୁ ଏ ନେଇ ନୂଆ ନିୟମ ଆସିବ ବୋଲି ଜଣାପଡିଛି। ଗାଡି ଚଳାଇବା ସମୟରେ ଡ୍ରାଇଭରଙ୍କ ଧ୍ୟାନ ଯେଭଳି ଭଙ୍ଗ ନ ହୁଏ ତାକୁ ମଧ୍ୟ ବିଚାର କରିବାକୁ ନୂଆ ନିୟମରେ କୁହାଯାଇଛି। ସୂଚନା ଯୋଗ୍ୟ, ଗାଡି ଚଳାଇବା ସମୟରେ ମୋବାଇଲରେ କଥା ହେଲେ ୧ ହଜାରରୁ ୫ ହଜାର ଟଙ୍କାର ଜରିମାନା ଲାଗୁ ହେଉଛି। ପରିବର୍ତ୍ତିତ ନିୟମ ଅନୁସାରେ ଗାଡି ସଂକ୍ରାନ୍ତ କାଗଜ ପତ୍ର ରଖିବା ଲାଗି ସରକାର ଏକ ପୋର୍ଟାଲ ବ୍ୟବସ୍ଥା ସରକାର କରିବେ। ଏହି ପୋର୍ଟାଲରେ ଲାଇସେନ୍ସ, ପଞ୍ଜୀକରଣ ପ୍ରମାଣପତ୍ର ଅନ୍ୟ କାଗଜପତ୍ର ଉପଲବ୍ଧ ରହିବ। ଗୋଟିଏ ସ୍ଥାନରେ ଆବଶ୍ୟକ ପ୍ରମାଣ ପତ୍ର ରହିଲେ ଯାଞ୍ଚ ବେଳେ ଅଧିକାରୀଙ୍କୁ ଆଉ ଅସୁବିଧା ହେବ ନାହିଁ। ଲୋକମାନେ ମଧ୍ୟ ବିଭିନ୍ନ କାଗଜପତ୍ର ନିଜ ସହ ନେଇ ବୁଲିବାକୁ ପଡିବ ନାହିଁ।