ନୂଆଦିଲ୍ଲୀ:ଫୋନ୍ଗୁଡିକରେ ବ୍ୟବହାର ହେଉଥିବା ଡିସ୍ପ୍ଲେ ଏବଂ ଟଚ୍ ପ୍ୟାନେଲ ଉପରେ ସରକାର ୧୦% ଆମଦାନୀ ଟିକସ ଲାଗୁ କରିଛନ୍ତି। ଆତ୍ମନିର୍ଭର ଭାରତ ଅଧୀନରେ ଏଭଳି କାର୍ଯ୍ୟପନ୍ଥା ଗ୍ରହଣ କରାଯାଇଛି। ସରକାରଙ୍କ ଏଭଳି ପଦକ୍ଷେପ ଦ୍ୱାରା ପ୍ରମୁଖ କମ୍ପାନୀଗୁଡିକ ପକ୍ଷରୁ ବିକ୍ରି ହେଉଥିବା ସ୍ମାର୍ଟଫୋନ ଏବଂ ଫିଚର ଫୋନ ମହଙ୍ଗା ହେବ ବୋଲି କୁହାଯାଉଛି। ଅତିରିକ୍ତ ସେସ୍ ଲାଗୁ ହେବା ଫଳରେ ମୋଟ ୧୧% ଟିକସ ଲାଗୁ ହେବ ବୋଲି ଜଣାପଡିଛି। ଆଗାମୀ ଦିନରେ ଫୋନଗୁଡିକର ଦାମ ୧.୫%ରୁ ୫% ପର୍ଯ୍ୟନ୍ତ ବଢିବ ବୋଲି ଆକଳନ କରାଯାଇଛି। ଏହା ପାର୍ବଣ ସମୟରେ ଚାହିଦାକୁ ପ୍ରଭାବିତ କରିବ ବୋଲି ପ୍ରମୁଖ କମ୍ପାନୀଗୁଡିକର ପ୍ରତିନିଧିମାନେ ମତ ପ୍ରକାଶ କରିଛନ୍ତି। ଫୋନ ମାନୁଫାକଚରିଂ କ୍ଷେତ୍ରରେ ପ୍ୟାନେଲ ଏବଂ ଟଚ୍ ସ୍କ୍ରିନ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଏହା ଡିଭାଇସଗୁଡିକର ମୋଟ ଖର୍ଚ୍ଚର ପ୍ରାୟ ୧୫ରୁ ୨୫% ପର୍ଯ୍ୟନ୍ତ ରହିଥାଏ। ଫୋନର ଗୁଣବତ୍ତା ଏବଂ ମୂଲ୍ୟ ଆଧାରରେ ପ୍ୟାନେଲ ଏବଂ ଟଚ୍ ସ୍କ୍ରିନ୍ର ମୂଲ୍ୟକୁ ବିଚାର କରାଯାଇଥାଏ। ଅର୍ଥାତ୍ ଦାମୀ ଫୋନଗୁଡିକରେ ସାଧାରଣତଃ ଅଧିକ ଦାମର ପ୍ୟାନେଲ ଏବଂ ଟଚ୍ ସ୍କ୍ରିନ୍ ବ୍ୟବହାର କରାଯାଇଥାଏ।