ଖୋର୍ଦ୍ଧା ଅଫିସ,୨୭ା୧୨: ୧୮୧୭ ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମ ମାନ୍ୟତା ଏବଂ ବରୁଣେଇ ପାଦଦେଶ ପ୍ରସ୍ତାବିତ ପାଇକ ସ୍ମାରକୀ ନିର୍ମାଣ ସ୍ଥଳ ଜମି ଫ୍ରି ପ୍ରିମିୟମ ଯୋଗାଇବା ଦାବିରେ ଓଡ଼ିଆ ବୀର ମହାସଂଘ ସୋମବାର ବରୁଣେଇ ପୀଠରୁ ରଣହୁଙ୍କାର ଦେଇଛି। ଖୋର୍ଦ୍ଧା ସମେତ ପୁରୀ, ଗଞ୍ଜାମ, ଢେଙ୍କାନାଳ, ଅନୁଗୋଳ ପ୍ରଭୃତି ଅଞ୍ଚଳର ପାଇକ ଆଖଡ଼ା ଯୋଗଦେଇଛନ୍ତି। ବୀର ବାଦ୍ୟର ତାଳେ ତାଳେ ପାଇକ ବୀରମାନେ ସମର କଳା ପ୍ରଦର୍ଶନ କରିଥିଲେ। ମାନ୍ୟତା ଦାବିରେ ପାଇକମାନଙ୍କ ଗର୍ଜନରେ ବରୁଣେଇ ପ୍ରକମ୍ପିତ ହୋଇଛି। ଏଠାରୁ ଏକ ବିଶାଳ ଶୋଭାଯାତ୍ରା ବାହାରି ଗଡ଼ ଖୋର୍ଦ୍ଧାରେ ପହଞ୍ଚିଥିଲେ। ସେଠାରେ ଏକ ସମାବେଶ ଅନୁଷ୍ଠିତ ହୋଇଥିଲା। ଭାରତ ବର୍ଷର ଶେଷ ସ୍ବାଧୀନ ଦୁର୍ଗ ଗଡ଼ଖୋର୍ଦ୍ଧାରୁ ମଶାଲ ଧରି ଶୋଭାଯାତ୍ରାରେ ବାହାରି ଖୋର୍ଦ୍ଧା ଗଡ଼ ପଞ୍ଚ ପାଇକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ସହ ସହର ପରିକ୍ରମା କରି ଭୁବନେଶ୍ୱର ଅଭିମୁଖେ ଯାତ୍ରା କରିଛନ୍ତି। ସେଠାରେ ସମାବେଶ ସହ ରାଷ୍ଟ୍ରପତିଙ୍କ ଉଦ୍ଦେଶରେ ରାଜ୍ୟପାଳଙ୍କୁ ସ୍ମାରକପତ୍ର ଦିଆଯିବ ବୋଲି ମହାସଂଘ ସମ୍ପାଦକ ଡ.ଦିଲ୍ଲୀପ ଶ୍ରୀଚନ୍ଦନ କହିଛନ୍ତି। ମାନ୍ୟତା ଘୋଷଣା ନ ହେବା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ। ସାରା ଓଡିଶାରେ ଆନ୍ଦୋଳନକୁ ତୀବ୍ର କରାଯିବ। ନୂଆଦିଲ୍ଲୀରେ ବିଶାଳ ପାଇକ ସମାବେଶ କରାଯିବ ବୋଲି ସଂଘ ସଭାପତି ଡ.ପ୍ରକାଶ ଶ୍ରୀଚନ୍ଦନ କହିଛନ୍ତି। ପ୍ରାଧ୍ୟାପକ ଗୋପାଳ କୃଷ୍ଣ ଦାସ, ଆଇନଜୀବୀ ଶିଶିର ପରିଡ଼ା, ମହାସଂଘ ସଂଯୋଜକ ନରେନ୍ଦ୍ର ପୃଷ୍ଟି, ସାମାଜିକ କର୍ମୀ ଅବନୀ ଜେନା, ଇତିଶ୍ରୀ ସାହୁଙ୍କ ସମେତ ଗବେଷକ, ବୁଦ୍ଧିଜୀବୀ, ସାମାଜିକ କର୍ମୀ ଶତାଧିକ ଲୋକଙ୍କ ଜନ ସମାବେଶ ହୋଇଛି।
