କେନ୍ଦୁଝର,୧୨ା୬(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ୍ କୋଡ଼ିପଶା ପଞ୍ଚାୟତ କୋଡ଼ିପଶା ଜୁଆଙ୍ଗ ଗ୍ରାମରେ ହୋଇଥିବା ସୋଲାର ଉଠା ଜଳସେଚନ ପ୍ରକଳ୍ପ ଚାଷୀଙ୍କ କାମରେ ଲାଗୁନି। ଜିଲାର ପୁରାତନ ଜନଜାତି ଜୁଆଙ୍ଗମାନଙ୍କ ଚାଷଜମିକୁ ପାଇପ ବିଛାଇ ଏକ ନାଳରୁ ପାଣି ଉଠାଇ ଜଳସେଚନ ଲକ୍ଷ୍ୟରେ ପ୍ରକଳ୍ପ ନିର୍ମାଣ କରାଯାଇଥିଲା। ବିଲରେ ପାଇପ ତ ପଡ଼ିଛି, କିନ୍ତୁ ପାଣି ଆସୁନି। ଫଳରେ ସମସ୍ତ ବିଲ ପଡ଼ିଆ ପଡ଼ିଥିବା ଦେଖାଯାଇଛି। ମାତ୍ର କିଛି ଦିନ କାମ କରିବା ପରେ ବନ୍ଦ ରହିଛି। ଷ୍ଟାଣ୍ଡ ଓ ଜଳସେଚନ ପଏଣ୍ଟ ଫାଟି ଗଲାଣି। ଠିକ୍ ସ୍ଥାନରେ ପ୍ରକଳ୍ପ ନିର୍ମାଣ ହୋଇ ନ ଥିବାରୁ ଆବଶ୍ୟକତା ଅନୁଯାୟୀ ଜଳସେଚନ ହୋଇପାରୁନାହିଁ ବୋଲି ମନୋଜ ବେହେରାଙ୍କ ସମେତ ଅନ୍ୟ ଜୁଆଙ୍ଗମାନେ ମତବ୍ୟକ୍ତ କରିଛନ୍ତି।
ପ୍ରକାଶ ଯେ, ଜୁଆଙ୍ଗମାନଙ୍କ ଚାଷଜମିକୁ ବିଶେଷକରି ରବି ଋତୁରେ ଜଳସେଚନ ନିମନ୍ତେ ଜୁଆଙ୍ଗ ଉନ୍ନୟନ ସଂସ୍ଥା ପକ୍ଷରୁ ୩ ଲକ୍ଷ ୯୬ ହଜାର ୯୬୮ ଟଙ୍କା ବ୍ୟୟ ଅଟକଳରେ ୨୦୨୨-୨୩ରେ ଉକ୍ତ ପ୍ରକଳ୍ପ ନିର୍ମାଣ ହୋଇଛି। ଏହାଦ୍ୱାରା ପାଖାପାଖି ୧୦ ଏକର ଜମିକୁ ଜଳସେଚନ ଏବଂ ବର୍ଷାଦିନ ବ୍ୟତୀତ ଖରା, ଶୀତ ଋତୁରେ ଜମିକୁ ପାଣି ମଡ଼ାଇ ପନିପରିବା, ଆଳୁ ଆଦି ଚାଷ କରିବାର ଲକ୍ଷ୍ୟ ରଖାଯାଇଥିଲା। ତେବେ ପାଇପ୍ ସଂଯୋଗ ହୋଇଥିବା ନାଳରେ ଖରା ଓ ଶୀତ ଋତୁରେ ପାଣି ରହୁ ନ ଥିବାରୁ ଏହା କିଭଳି ସଫଳ ରୂପାୟନ ହୋଇପାରିବ ସେ ନେଇ ଜୁଆଙ୍ଗମାନେ ଆଶଙ୍କା ପ୍ରକାଶ କରିଛନ୍ତି। ଅନ୍ୟପକ୍ଷେ ଉକ୍ତ ନାଳରୁ ସୋଲାର ସଂଯୋଗରେ ପମ୍ପ ଯୋଗେ ପାଣି ଉଠାଇ ଏକ ଓଭରହେଡ୍ ଟାଙ୍କିରେ ରଖାଯାଇ ପ୍ରତ୍ୟେକ ଜମିକୁ ପାଣି ଯୋଗାଇଦେବା ବ୍ୟବସ୍ଥା ମଧ୍ୟ କରାଯାଇଛି। କିନ୍ତୁ ଯେତିକି ଉଚ୍ଚରେ ପାଣିଟାଙ୍କି ରହିଛି ସେଥିରୁ ଦୂରରେ ଥିବା ଚାଷଜମିକୁ ଜଳ ପହଞ୍ଚତ୍ପାରିବ ସେ ନେଇ ସନ୍ଦେହ ଉପୁଜିଛି। ନୂତନ ଭାବେ ନିର୍ମାଣ କରାଯାଇଥିବା ଓଭରହେଡ୍ ଟାଙ୍କିର କଂକ୍ରିଟ ଷ୍ଟାଣ୍ଡ୍ ଓ ଜଳସେଚନ ପଏଣ୍ଟ ଫାଟିଗଲାଣି। ଅନ୍ୟପକ୍ଷରେ ଗ୍ରାମଠାରୁ ବହୁ ଦୂରରେ ସୋଲାର ପ୍ଲେଟ୍, ପମ୍ପ ତଥା ପାଇପ ବିଛାଯାଇ ପ୍ରକଳ୍ପ ନିର୍ମାଣ କରାଯାଇଥିବାରୁ ଦେଖାରଖା ହୋଇ ନ ପାରିଲେ ଏସବୁ ଚୋରି ହେବା ଆଶଙ୍କା ରହିଛି। ପାଣିଟାଙ୍କି ଥିବା ସ୍ଥାନ ଫାଟିଯାଇଥିବାରୁ ଭୁଶୁଡ଼ି ପଡ଼ିବା ଆଶଙ୍କା ରହିଛି। ସେହିପରି ପ୍ରବଳ ବର୍ଷା ବା ବାତ୍ୟା ହେଲେ ଏହା କ୍ଷତିଗ୍ରସ୍ତ ହେବା ଆଶଙ୍କା ରହୁଛି। ଏ ନେଇ ବିଭାଗ ପକ୍ଷରୁ ଉଚିତ ପଦକ୍ଷେପ ନେବାକୁ ଦାବି ହୋଇଛି। ଜୁଆଙ୍ଗ ଉନ୍ନୟନ ସଂସ୍ଥାର କନିଷ୍ଠଯନ୍ତ୍ରୀ ଇଂ. ରାଜେଶ ମହାନ୍ତ କହିଛନ୍ତି, ପ୍ରକଳ୍ପ କାମ କରୁଛି। କେବଳ ଶୀତଦିନରେ ଚାଷ ଜମିକୁ ଜଳସେଚନ ବ୍ୟବସ୍ଥା କରିବାକୁ ନିର୍ମାଣ କରାଯାଇଛି। ଠିକ୍ ଭାବରେ କାର୍ଯ୍ୟକ୍ଷମ ହେଉଛି। ଲୋକମାନେ ଏହାର ଦେଖାରଖା କରିବେ।