ନୂଆଦିଲ୍ଲୀ,୨୫।୫(ପି.ଟି.): କୋଭିଡ୍-୧୯ ପାଇଁ ଗତବର୍ଷ ରଣଜୀଟ୍ରଫି ସେସନ ବାତିଲ ହୋଇଥିଲା। ଦେଶର ପ୍ରଥମଶ୍ରେଣୀ କ୍ରିକେଟରଙ୍କୁ ସହାୟତା ତଥା ଅନୁକମ୍ପାମୂଳକ ଅର୍ଥ ପ୍ରଦାନ କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ ପ୍ରତିଶ୍ରୁତି ଦିଆଯାଇଥିଲା। ତେବେ ଇତିମଧ୍ୟରେ ଗୋଟିଏ ବର୍ଷ ଅତିବାହିତ ହୋଇଥିଲେ ମଧ୍ୟ ଖେଳାଳିମାନଙ୍କୁ ସହାୟତା ଦିଆଯାଇପାରିନାହିଁ। ରାଜ୍ୟ ଆସୋସିଏଶନଗୁଡିକ ଏପର୍ଯ୍ୟନ୍ତ ଏ ସଂକ୍ରାନ୍ତରେ ଆବଶ୍ୟକ ଦସ୍ତାବିଜ୍ ଦେଇପାରି ନାହାନ୍ତି। ଫଳରେ ଘରୋଇ କ୍ରିକେଟରଙ୍କୁ ସହାୟତା ଦିଆଯାଇପାରି ନାହିଁ ବୋଲି ବିସିସିଆଇ କୋଷାଧ୍ୟକ୍ଷ ଅରୁଣ ଧୁମଲ ସୋମବାର କହିଛନ୍ତି।
ଟି୨୦ ବିଶ୍ୱକପ୍ରେ ଭାରତୀୟ ମହିଳା ଦଳ ରନର୍ସଅପ୍ ହୋଇଥିଲା। ବିସିସିଆଇ ଏପର୍ଯ୍ୟନ୍ତ ଏବାବଦରେ ୫୫୦,୦୦୦ ଆମେରିକୀୟ ଡଲାର ମହିଳା ଦଳକୁ ପ୍ରଦାନ କରିନାହିଁ। ତେବେ ଚଳିତ ସପ୍ତାହରେ ଏହି ଅର୍ଥ ପ୍ରଦାନ କରିବ ବୋଲି ବୋର୍ଡ କହିଛି। ରଣଜୀ ଟ୍ରଫି ଖେଳାଳିଙ୍କୁ ସହାୟତା ପ୍ରଦାନ କରିବା ନେଇ ଆମେ ରାଜ୍ୟ ଆସୋସିଏଶନଗୁଡକ ସହିତ ଆଲୋଚନା କରିବୁ ବୋଲି ଧୂମଲ କହିଛନ୍ତି। କେଉଁ ଖେଳାଳି କୋତୋଟି ମ୍ୟାଚ୍ ଖେଳିଛନ୍ତି ଓ ରିଜର୍ଭ ରହିଛନ୍ତି ସେ ନେଇ ରାଜ୍ୟ ଆସୋସିଏଶନଗୁଡିକ ହିଁ କେବଳ ସୂଚନା ଦେଇପାରିବେ। କିନ୍ତୁ କୌଣସି ଆସୋସିଏଶନ ଏ ନେଇ କୌଣସି ସୂଚନା ଦେଇନାହାନ୍ତି।
ଏଥର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ୭୩ ଜଣ ନାବାଗତ ଖେଳାଳି ୮ଟି ଦଳରୁ ପ୍ରତିନିଧିତ୍ୱ କରିଥିଲେ। ଅନ୍ୟ ୭୦୦ ଖେଳାଳିଙ୍କର ଆଇପିଏଲ ଚୁକ୍ତି ହୋଇନାହିଁ। ତେଣୁ ଏହି ଖେଳାଳିମାନଙ୍କୁ ସହାୟତାର ଆବଶ୍ୟକତା ରହିଛି ବୋଲି ସେ କହିଛନ୍ତି। ରଣଜୀ ଟ୍ରଫି ଖେଳାଳିଙ୍କୁ ସହାୟତା ପ୍ରଦାନ କରିବା ପ୍ରକ୍ରିୟା ସେତେଟା ସହଜ ନୁହେଁ। ତେଣୁ ଏଥିପାଇଁ ଏକ ସରଳ ନିୟମର ଆବଶ୍ୟକତା ରହିଛି। ଏ ଦିଗରେ ରାଜ୍ୟ ଆସୋସିଏଶନଗୁଡକ ସହାୟତା କଲେ ଆମେ ପ୍ରତିଶ୍ରୁତି ପୂରଣ କରିବୁ ବୋଲି ଧୁମଲ କହିଛନ୍ତି।
