ଟୋକିଓ ଅଲିମ୍ପିକ୍ସ ପୂର୍ବରୁ ଭାରତର ତାରକା ରେସଲର ବଜରଙ୍ଗ ପୁନିଆ ଏକ ବଡ଼ ନିଷ୍ପତ୍ତି ନେଇଛନ୍ତି। ବିଶ୍ୱ ଚାମ୍ପିୟନଶିପ୍ରେ ୩ଟି ପଦକ ଜିତିଥିବା ୨୬ ବର୍ଷୀୟ ରେସଲର୍ ସୋମବାର ଅଲିମ୍ପିକ୍ସ ପାଇଁ ପ୍ରସ୍ତୁତି ସମ୍ପର୍କରେ ଟୁଇଟର ହ୍ୟାଣ୍ଡେଲରୁ ଏକ ଟୁଇଟ କରିଛନ୍ତି। ଏହା ମାଧ୍ୟମରେ ତାଙ୍କର ପରବର୍ତ୍ତୀ ପଦକ୍ଷେପ ବିଷୟରେ ସେ ସୂଚନା ଦେଇଛନ୍ତି। ଅର୍ଜୁନ ପୁରସ୍କାର ପାଇଥିବା ପୁନିଆ ଟୁଇଟ କରି କହିଛନ୍ତି, ମୁଁ ଆଜିଠାରୁ ମୋର ସମସ୍ତ ସୋସିଆଲ ମିଡିଆ ହ୍ୟାଣ୍ଡେଲ (ଆକାଉଣ୍ଟ) ବନ୍ଦ କରୁଛି। ଅଲିମ୍ପିକ୍ସ ପରେ ସମସ୍ତଙ୍କୁ ଭେଟିବି। ଆଶାକରେ ଆପଣ ଆପଣଙ୍କର ଭଲ ପାଇବା ବଜାୟ ରଖିବେ … ଜୟ ହିନ୍ଦ। ସୂଚନାଯୋଗ୍ୟ, ବଜରଙ୍ଗ ପୁନିଆ ସୋସିଆଲ ମିଡିଆରେ ବହୁତ ସକ୍ରିୟ ଥିଲେ। ସେ ମଧ୍ୟ ଦେଶ ତଥା ବିଦେଶର ଅନେକ ପ୍ରସଙ୍ଗରେ ଖୋଲାଖୋଲି ଭାବରେ ନିଜର ମତ ଦେଇଥାନ୍ତି। ଅଲିମ୍ପିକ୍ସରେ ଭାରତ ପାଇଁ ପଦକ ଆଶାୟୀ ପ୍ରତିଯୋଗୀମାନଙ୍କ ମଧ୍ୟରୁ ପୁନିୟା ଅନ୍ୟତମ। ସେ ସେପ୍ଟେମ୍ବର ୨୦୧୯ରେ ହୋଇଥିବା ବିଶ୍ୱ ଚାମ୍ପିଅନସିପରେ ବ୍ରୋଞ୍ଜ ପଦକ ଜିତି ଟୋକିଓ ଅଲିମ୍ପିକ ପାଇଁ ଯୋଗ୍ୟତା ହାସଲ କରିଥିଲେ। ଅଲିମ୍ପିକ୍ସ ୨୦୨୦ ରେ ଅନୁଷ୍ଠିତ ହେବାର ଥିଲା କିନ୍ତୁ କରୋନା ମହାମାରୀ ଯୋଗୁ ଏହାକୁ ଗୋଟିଏ ବର୍ଷ ପାଇଁ ସ୍ଥଗିତ ରଖିବାକୁ ପଡିଛି।
