ନୂଆଦିଲ୍ଲୀ,୧୨।୨: ସ୍ପଟ ଫିକ୍ସିଂ ଅଭିଯୋଗରୁ ମୁକ୍ତ ହେବା ପରେ କ୍ରିକେଟକୁ ଫେରିଥିବା ଏସ୍.ଶ୍ରୀସନ୍ତଙ୍କୁ ଆଉ ଏକ ଝଟ୍କା ଲାଗିଛି। ଆଇପିଏଲର ୧୪ତମ ସିଜନ ପାଇଁ କୌଣସି ଫ୍ରାଞ୍ଚଇଜ ତାଙ୍କୁ ନିଲାମରେ ତାଲିକାଭୁକ୍ତ କରିନାହାଁନ୍ତି। ଫେବୃଆରୀ ୧୮ରେ ଚେନ୍ନାଇରେ ଖେଳାଳି ନିଲାମ ହେବାକୁ ଯାଉଛି। ଏଥର ନିଲାମରେ ୩୮ ବର୍ଷୀୟ କେରଳ ଖେଳାଳି ଶ୍ରୀସନ୍ତ ତାଙ୍କର ସର୍ବନିମ୍ନ ମୂଲ୍ୟ ୭୫ଲକ୍ଷ ଟଙ୍କା ରଖିଥିଲେ। ସ୍ପଟ ଫିକ୍ସିଂ ନିଷେଧାଦେଶରୁ ମୁକ୍ତ ହେବା ପରେ ନିକଟରେ ସୟଦ ମୁସ୍ତାକ ଅଲି ଟ୍ରଫିରୁ ଫେରିଥିବା ଶ୍ରୀସନ୍ତ ପୁନର୍ବାର ଆଇପିଏଲରେ ଖେଳିବାର ସ୍ବପ୍ନ ଦେଖିଥିଲେ, ଯାହା ଚୁର୍ମାର୍ ହୋଇଯାଇଛି। ସୂଚନାଯୋଗ୍ୟ, ଆଇପିଏଲ ୨୦୨୧ ନିଲାମ ପାଇଁ ଖେଳାଳିଙ୍କ ଅନ୍ତିମ ତାଲିକା ପ୍ରକାଶ ପାଇଛି । ଏଥର ନିଲାମରେ ୨୯୨ ଖେଳାଳି ଟେଣ୍ଡର ଦେଖିବେ। ଏଥିରେ ୧୬୪ ଭାରତୀୟ, ୧୨୫ ବିଦେଶୀ ଏବଂ ସହଯୋଗୀ ଦେଶରୁ ତିନି ଖେଳାଳି ସାମିଲ ହେବେ। ଏଥର ନିଲାମରେ ଟିମ ଇଣ୍ଡିଆର ଭେଟେରାନ କ୍ରିକେଟର ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକର ମଧ୍ୟ ସାମିଲ ହେବେ। ବାମହାତୀ ଦ୍ରୁତ ବୋଲର ଅର୍ଜୁନଙ୍କର ମୂଳ ମୂଲ୍ୟ ୨୦ ଲକ୍ଷ ଟଙ୍କା ରହିଛି। ଏଥି ସହିତ ମିଚେଲ ଷ୍ଟାର୍କ ଏବଂ ଇଂଲଣ୍ଡର ଟେଷ୍ଟ ଅଧିନାୟକ ଜୋ ରୁଟ ଚଳିତ ବର୍ଷର ନିଲାମରୁ ନିଜକୁ ଦୂରେଇ ରଖିଛନ୍ତି।