ଦାରିଙ୍ଗବାଡି,୧୩।୧୧(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ପଞ୍ଚାୟତର ଏକମାତ୍ର ଖେଳ ପଡିଆ ଏବେ ପାଲଟିଛି ମଦ୍ୟପଙ୍କ ଆଡ୍ଡାସ୍ଥଳୀ। ଦୈନିକ ଉକ୍ତ ପଡିଆରେ କୁଢ଼କୁଢ଼ ଖାଲି ବୋତଲ, ପ୍ଲାଷ୍ଟିକ ଦେଖି ଖେଳ ପ୍ରେମୀଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି।
ପ୍ରକାଶ ଯେ, ଦାରିଙ୍ଗବାଡି ରେ ୧୦ ହଜାରରୁ ଉର୍ଦ୍ଧ୍ୱ ଲୋକ ବସ ବାସ କରୁଥିବାବେଳେ ପଡୋଶୀ ଗ୍ରୀନବାଡି ପଞ୍ଚାୟତବାସୀ ମଧ୍ୟ ପ୍ରାତଃ ଭ୍ରମଣରେ ଏହି ପଡିଆକୁ ଆସି ବ୍ୟାୟାମ,ଯୋଗାଭ୍ୟାସ ସହ ଖେଳକୁଦ କରିଥାନ୍ତି। ସେହପରି ବିଦ୍ୟାଳୟ, କଲେଜର ଛାତ୍ରୀଛାତ୍ରମାନେ ମଧ୍ୟ ଏହି ଖେଳ ପଡିଆ ଉପରେ ନିର୍ଭର କରୁଛନ୍ତି। ହେଲେ ଅସାମାଜିକ ଲୋକ ଉକ୍ତ ପଡିଆକୁ ନଷ୍ଟ କରିଦେଉଛନ୍ତି। ସେମାନଙ୍କୁ ପୋଲିସ ପ୍ରଶାସନ କିମ୍ବା ବ୍ଲକ ପ୍ରଶାସନ ପକ୍ଷରୁ କୌଣସି ଆକଟ କରାଯାଉନାହିଁ। ଫଳରେ ଦିନ ରାତି ପଡିଆ ଓ ତାର ଆଖ ପାଖ ଅଞ୍ଚଳରେ ଅସାମାଜିକ ଲୋକଙ୍କ ଦୌରାତ୍ମ୍ୟ ବୃଦ୍ଧି ପାଇଛି। ଥାନା ପଛ ପାଖ ଓ ତହସିଲ କାର୍ଯ୍ୟାଳୟ ସମ୍ମୁଖରେ ଏହି ଖେଳ ପଡିଆଟି ରହିଥିବାବେଳେ ପଡିଆକୁ ଲାଗିକି ଆଇଟିଆଇ ଶିକ୍ଷାନୁଷ୍ଠାନ ଓ ଡ.ଭୀମରାଓ ଆମ୍ବେଦକର ଉଚ୍ଚ ମାଧ୍ୟମିକ ବିଦ୍ୟାଳୟ ରହିଛି। ସେଠାକାର ଛାତ୍ରୀଛାତ୍ରମାନେ ଏହି ଖେଳ ପଡିଆ ଉପରେ ନିର୍ଭର କରୁଥିବା ବେଳେ ଭଙ୍ଗା ଓ ଖାଲି ମଦ ବୋତଲ ସହ କୁଢ଼ କୁଢ଼ ଅଳିଆ ଆବର୍ଜନା ଯୋଗୁ ଛାତ୍ରୀଛାତ୍ରମାନେ ଖେଳକୁଦ କରିପାରୁନାହାନ୍ତି।
ପଡିଆ ଉପରେ ନିର୍ଭର କରୁଥିବା ଲୋକ ଦୈନିକ ସଫେଇ କରୁଥିଲେ ମଧ୍ୟ ପୁଣି ପ୍ରାତଃ ଭ୍ରମଣରେ ଆସିବା ବେଳେ ସେ ସମାନ ଅବସ୍ଥା ହୋଇଥାଉଛି ବୋଲି ଅଭିଯୋଗ ହୋଇଛି।ଏଥିପ୍ରତି ପ୍ରଶାସନ ଦୃଷ୍ଟି ଦେବାକୁ ଛାତ୍ରୀଛାତ୍ରମାନେ ନିବେଦନ କରିଛନ୍ତି। ସେହିପରି ଦାରିଙ୍ଗବାଡିକୁ ଆସୁଥିବା ଓ ରାତ୍ରିଯାପନ କରୁଥିବା ରାଜ୍ୟ ଓ ରାଜ୍ୟ ବାହାରର ପର୍ଯ୍ୟଟକ ମାନେ ପ୍ରାତଃ ଭ୍ରମଣରେ ଉକ୍ତ ପଡିଆକୁ ଯାଉଥିବା ବେଳେ ପଡିଆର ଏଭଳି ଅବସ୍ଥା ଦେଖି ନାକ ଟେକୁଛନ୍ତି।