ନୂଆଗାଁ,୨୫।୪ (ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକ ସିମିଳିସାହିଠାରୁ ବାଲଣ୍ଡା ପ୍ରଧାନମନ୍ତ୍ରୀ ଗ୍ରାମ ସଡ଼କ ନିର୍ମାଣରେ ଅନିୟମିତତା ହେଉଥିବା ଅଭିଯୋଗ ହେଉଥିଲା। ଉକ୍ତ ରାସ୍ତାର ଅଭୟପୁରଠାରେ ନିର୍ମାଣ କରାଯାଇଥିବା ଗୋଟିଏ ପୋଲର ନିର୍ମାଣ କାର୍ଯ୍ୟ ଅତି ନିମ୍ନମାନର କରାଯାଇଥିବା ନେଇ ଅଭିଯୋଗ ହେବା ପରେ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶକ୍ରମେ ଉକ୍ତ ପୋଲକୁ ଭାଙ୍ଗି ଦିଆଯାଇଛି।
ନୂଆଗାଁ ବ୍ଲକ ଶିମିଳିସାହିଠାରୁ ବାଲଣ୍ଡା (୮.୮୦ କି.ମି) ରାସ୍ତା ନିର୍ମାଣ କରିବା ପାଇଁ ପ୍ରଧାନମନ୍ତ୍ରୀ ସଡ଼କ ଯୋଜନାରେ ପ୍ରାୟ ୪ କୋଟି ଟଙ୍କା ଅନୁଦାନ ମଞୁର କରାଯାଇଛି। ଉକ୍ତ ରାସ୍ତାର ନିର୍ମାଣ କାର୍ଯ୍ୟ ୨୩ା୩ା୨୦୨୨ରେ ଆରମ୍ଭ ହୋଇ ୨୩ା୩ା୨୦୨୩ ସୁଦ୍ଧା ଶେଷ କରିବାର ନିର୍ଦ୍ଦେଶ ରହିଥିଲା। ଠିକାଦାର ନିର୍ମାଣ କରିବାରେ ବିଳମ୍ବ କରୁଥିବାରୁ ଅଦ୍ୟାବଧି ତାହା ଅଧପନ୍ତରିଆ ହୋଇ ପଡିରହିଛି। ତେବେ ଉକ୍ତ ରାସ୍ତା ନିର୍ମାଣରେ ଅହେତୁକ ବିଳମ୍ବ ନେଇ ଜନସାଧାରଣ ଅତିଷ୍ଠ ହୋଇ ପଡିଲେଣି। ଏ ନେଇ ବାରମ୍ବାର ଅଭିଯୋଗ ପରେ ଠିକାଦାର ନିର୍ମାଣ କାର୍ଯ୍ୟ ଆରମ୍ଭ କରିଛନ୍ତି। କିଛି ଦିନ ପୂର୍ବେ ଅଭୟପୁର ନିକଟରେ ଗୋଟିଏ ପୋଲ ନିର୍ମାଣ ଆରମ୍ଭ ହୋଇଥିଲା। ତେବେ ନିର୍ମାଣ କାର୍ଯ୍ୟ ଅତ୍ୟନ୍ତ ନିମ୍ନମାନର ହେଉଥିବା ନେଇ ସ୍ଥାନୀୟ ଲୋକେ ଗ୍ରାମ ଉନ୍ନୟନ ବିଭାଗ ଯନ୍ତ୍ରୀଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗ ପାଇ କନିଷ୍ଠ ଯନ୍ତ୍ରୀ ଶ୍ରୀକାନ୍ତ କୁମାର ସାହୁ ତଦନ୍ତ କରିଥିଲେ। ନିର୍ମାଣ କାର୍ଯ୍ୟ ନିମ୍ନମାନର ହୋଇଥିବା ଜାଣିବା ପରେ ଉଚ୍ଚ ପଦସ୍ଥ ଅଧିକାରୀଙ୍କୁ ଅବଗତ କରାଇଥିଲେ। ତେଣୁ ଉକ୍ତ ପୋଲକୁ ଭାଙ୍ଗି ପୁନର୍ବାର ସଠିକ୍ ଭାଗମାପରେ ପୋଲ ନିର୍ମାଣ କରିବା ପାଇଁ ନିର୍ଦ୍ଦେଶ ଦିଆଯାଇଥିଲା। ତେଣୁ ବୁଧବାର ଠିକାଦାର ମେସିନ ଲଗାଇ ଉକ୍ତ ପୋଲକୁ ଭାଙ୍ଗି ଦେଇଛନ୍ତି। ରାସ୍ତା ନିର୍ମାଣରେ ଅନିୟମିତତା କିମ୍ବା ନିମ୍ନମାନର ଅଭିଯୋଗ ଆସିଲେ ନିଶ୍ଚିତ ପଦକ୍ଷେପ ନିଆଯିବ। ତେଣୁ ସ୍ଥାନୀୟ ଲୋକେ ସଚେତନ ହେବା ସହ ରାସ୍ତା ନିର୍ମାଣ ସମୟରେ କାର୍ଯ୍ୟ ପ୍ରତି ଦୃଷ୍ଟି ଦେଲେ ଠିକାଦାର ଠିକ୍ ଭାବେ ନିର୍ମାଣ କରିବାକୁ ବାଧ୍ୟ ହେବେ ବୋଲି ଯନ୍ତ୍ରୀ ସାହୁ କହିଛନ୍ତି ା