ଝୁମ୍ପୁରା,୯।୨(ଡି.ଏନ.ଏ.) କେନ୍ଦୁଝର ଜିଲା ଝୁମ୍ପୁରା ଓ ବାମେବାରୀ ଥାନା ଅଞ୍ଚଳରେ ଚୋରି ବଢ଼ି ଚାଲିଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ୨୦ନଂ.ଜାତୀୟ ରାଜପଥ ପାର୍ଶ୍ୱରେ ପାର୍କିଂ କରାଯାଇ ଥିବା ଟ୍ରକ ଓ ଝୁମ୍ପୁରା ବଜାର ଉପରେ ଛିଡ଼ା ହେଉଥିବା ଛୋଟ ବଡ଼ ଗାଡ଼ିଗୁଡ଼ିକରୁ ଡିଜେଲ,ବ୍ୟାଟେରି ଓ ଟାୟାର ଆଦି ଚୋରି ନିତିଦିନିଆ ଘଟଣାରେ ପରିଣତ ହେଲାଣି। ସନ୍ଧ୍ୟା ସମୟରେ ମଦ୍ୟପଙ୍କ ଉପତ୍ାତ ବଢ଼ିିବାରେ ଲାଗିଛି। ଗ୍ରାମାଞ୍ଚଳର ଛକ ଜାଗାରେ ଅସାମାଜିକ କାର୍ଯ୍ୟକଳାପ ବଢ଼ୁଥିବାରୁ ଲୋକେ ନିଜକୁ ଅସୁରକ୍ଷିତ ମଣୁଛନ୍ତି। ବିଶେଷ କରି ମହିଳାମାନେ ହାଟ,ବଜାରକୁ ଯିବାକୁ ଭୟ କରୁଛନ୍ତି। ଏହି ଅସାମାଜିକ କାର୍ଯ୍ୟକଳାପ ସହିତ ପଶ୍ଚିମବଙ୍ଗର କିଛି ଫେରି ବେପାରୀ ଜଡିତ ରହୁଥିବା କୁହାଯାଉଛି।
ଝୁମ୍ପୁରା ଥାନା ଅଧୀନ ଧାତିକା -କୁଟୁଗାଁ- ନହବେଡ଼ା ରାସ୍ତା, ଧାତିକା-କଙ୍କଡ଼ା ଯୋଡ଼ିଘାଟି-କଟଲପଶି ରାସ୍ତା ଦେଇ ଯୋଡ଼ା ଖଣି ମଣ୍ଡଳରୁ ପ୍ରତ୍ୟେହ ମାଙ୍ଗାନିଜ, ଲୁହାପଥର ଚାଲାଣ ହେଉଛି। ଉଭୟ ଥାନା ପୋଲିସ ଏହା ଜାଣି ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି। ଗତ ୨୭ତାରିଖରେ ଝୁମ୍ପୁରା ଅଞ୍ଚଳର ରଞ୍ଜନ ରାମଙ୍କର ହାଇୱା ଚୋରି ହୋଇଥିଲେ ମଧ୍ୟ ପୋଲିସ ଏତଲା ରଖି ଚୁପ୍ ବସିଛି। ଦୁଇ ସପ୍ତାହ ପୂର୍ବେ ଝୁମ୍ପୁରା ଗ୍ରାମର କମଳଲୋଚନ ସାହୁଙ୍କ ଟ୍ରକ୍ ରାସ୍ତା ପାର୍ଶ୍ୱରେ ପାର୍କିଂ ହୋଇଥିବା ବେଳେ ସେଥିରୁ ଡିଜେଲ ଓ ବ୍ୟାଟେରି ଚୋରି ହୋଇଥିଲା। କାର୍ଯ୍ୟାନୁଷ୍ଠାନରେ ବିଳମ୍ବ ଯୋଗୁ ପୋଲିସ ଉପରୁ ଲୋକେ ଆସ୍ଥା ତୁଟାଇବାରେ ଲାଗିଛନ୍ତି। ଏ ସଂକ୍ରାନ୍ତରେ ବାମେବାରୀ ଥାନାଧିକାରୀ ମନୋରଞ୍ଜନ ବିଶି ଏବଂ ଝୁମ୍ପୁରା ଥାନାଧିକାରୀ ବୀରେନ୍ଦ୍ର ଶିଅଳଙ୍କୁ ପଚାରିବାରୁ ତଦନ୍ତ ଚାଲିଛି, ଚୋରି ର଼୍ୟାକେଟକୁ ଧରାଯିବ ବୋଲି କହିଛନ୍ତି।
