ପୁରୁଷୋତ୍ତମପୁର,୧୦।୧୧(ଡି.ଏନ.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଭାଟକୁମରଡା ଗାଁରେ ରାଜମିସ୍ତ୍ରୀ ଭାବେ କାମ କରୁଥିବା ଅନାଥ ସ୍ବାଇଁ (୩୫)ଙ୍କୁ ବଳତ୍କାର ଅଭିଯୋଗରେ ପୋଲିସ ଗୁରବାର ଗିରଫ କରି କୋର୍ଟ ଚାଲାଣ କରିଛି। ଆଇଆଇସି ପ୍ରିୟସରଞ୍ଜନ ଛୋଟରାୟ କହିବା ଅନୁଯାୟୀ,ସେହି ଅଞ୍ଚଳର ଜଣେ ଗରିବଶ୍ରେଣୀର ଯୁବତୀ ରାଜମିସ୍ତ୍ରୀ ଅନାଥଙ୍କ ସହ ମୂଲ ଖଟିବା ଲାଗି ଯାଉଥିଲେ। ଏହି ସମୟରେ ଯୁବତୀଙ୍କ ସରଳତାର ସୁଯୋଗ ନେଇ ତାଙ୍କୁ ଧମକ ଦେଇ ସେ ତିନିମାସରୁ ଅଧିକ ଦିନ ହେଲା ବିଭିନ୍ନ ସ୍ଥାନକୁ ନେଇ ବାରମ୍ବାର ବଳତ୍କାର କରୁଥିଲେ। ସେହି ସମୟର କିଛି ଫଟୋ ମଧ୍ୟ ଉଠାଇ ତାଙ୍କୁ ବ୍ଲାକ୍ମେଲିଂ କରୁଥିଲେ। ତେବେ ଯୁବତୀଙ୍କ ବିବାହ ଠିକ୍ ହୋଇଥିବା ବେଳେ ବିବାହ କରିବାକୁ ମନା କରୁଥିଲେ ଅନାଥ। ବିବାହ କରିଲେ ସବୁ ଫଟୋ, ଭିଡିଓ ଭାଇରାଲ କରିଦେବାକୁ ଧମକ ଦେଉଥିଲେ। ଏହାକୁ ନେଇ ଯୁବତୀଜଣଙ୍କ ଥାନାରେ ଅଭିଯୋଗ କରିଛନ୍ତି। ମହିଳା ଓ ଶିଶୁ ଡେସ୍କ ଅଧିକାରୀ ଏସଆଇ ପ୍ରିୟଙ୍କା ବେହେରାଙ୍କ ତଦନ୍ତ କ୍ରମେ ଯୁବତୀଙ୍କ ବ୍ରହ୍ମପୁର ବଡ଼ ମେଡିକାଲରେ ଡାକ୍ତରୀ ମାଇନା କରାଯିବା ସହ ପୁରୁଷୋତ୍ତମପୁର ପ୍ରଥମଶ୍ରେଣୀ ବିଚାର ବିଭାଗୀୟ ଅଦାଲତରେ ବୟାନ ରେକର୍ଡ କରାଯାଇଛି। ଅଭିଯୁକ୍ତ ଅନାଥଙ୍କ ମଧ୍ୟ ଡାକ୍ତରୀ ମାଇନା କରାଯାଇ କୋର୍ଟ ଚାଲାଣ କରାଯାଇଥିବା ଆଇଆଇସି କହିଛନ୍ତି।
