ଭୁବନେଶ୍ୱର,୨୬।୪(ବ୍ୟୁରୋ): ବିବାହ ଉତ୍ସବ ପାଇଁ କନ୍ୟାପକ୍ଷ ସଜବାଜ ହୋଇଥିଲେ। ଗ୍ରାମରେ ବର ସମେତ ବରଯାତ୍ରୀ ମଧ୍ୟ ପହଞ୍ଚତ୍ ଯାଇଥିଲେ। ବାଜା ବାଜିବା ସହ ବାଣ ବି ଫୁଟିଥିଲା। ଶୋଭାଯାତ୍ରା ଦେଖି ବର ମଧ୍ୟ ବେଶ୍ ଖୁସି ଥିଲେ। ଅଳ୍ପ କିଛି ସମୟରେ ବିବାହ ବେଦିକୁ ଯାଇଥାନ୍ତେ। ହେଲେ ଏହି ସମୟରେ କମିଶନରେଟ ପୋଲିସ ବରକୁ ଉଠାଇନେଲା। ଏଭଳି ଏକ ଘଟଣା ରବିବାର ରାତିରେ ବରଗଡ଼ ଜିଲା ଭଟଲି ଥାନା ବେହେରାପାଲି ଗ୍ରାମରେ ଦେଖିବାକୁ ମିଳିଥିଲା।
ସୂଚନା ଅନୁଯାୟୀ, ଅଭିଯୁକ୍ତ ବର ହେଲେ ଢେଙ୍କାନାଳ ଜିଲା ପର୍ଜଙ୍ଗ ଥାନା ପାଣି ଗେଙ୍ଗୁଟିଆ ଗ୍ରାମର ଅଜିତ କୁମାର ଭୋଇ। ସେ ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆର୍ଟିସି)ର ଯନ୍ତ୍ରୀ ଭାବେ କାର୍ଯ୍ୟରତ। ଅଜିତ ଦୁଇବର୍ଷ ହେବ ଭୁବନେଶ୍ୱର କଳାରାହାଙ୍ଗ ଅଞ୍ଚଳର ଜଣେ ଯୁବତୀଙ୍କୁ ଭଲ ପାଉଥିଲେ। ଏପରି କି ବିବାହର ପ୍ରତିଶ୍ରୁତି ଦେଇ ତାଙ୍କ ସହ ଶାରୀରିକ ସମ୍ପର୍କ ସ୍ଥାପନ କରିଥିଲେ। ପରେ ଅଜିତ ତାଙ୍କୁ ପ୍ରତାରଣା କରିଥିବା ନେଇ ଭୁବନେଶ୍ୱର ମହିଳା ଥାନାରେ ସମ୍ପୃକ୍ତା ଯୁବତୀ ଗତ ୧୯ ତାରିଖରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା (ନଂ.୬୧/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ଅଜିତ ଅନ୍ୟ ଜଣେ ଯୁବତୀଙ୍କୁ ବିବାହ କରିବାକୁ ଯାଉଥିବା ପୋଲିସ ଖବର ପାଇ ତାଙ୍କୁ ଧରିବାକୁ ଜାଲ ବିଛାଇଥିଲା। ରବିବାର ରାତିରେ ପୋଲିସ ଟିମ୍ ବରଗଡ଼ରେ ପହଞ୍ଚତ୍ ବାହାଘର ଶୋଭାଯାତ୍ରାରୁ ଅଜିତଙ୍କୁ ଉଠାଇ ଆଣିଥିଲା। ପରେ ସୋମବାର ତାଙ୍କୁ କୋର୍ଟଚାଲାଣ କରାଯାଇଥିଲା। ହେଲେ ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲକୁ ପଠାଇ ଦିଆଯାଇଥିବା ମହିଳା ଥାନା ଅଧିକାରୀ ଦାୟିତ୍ୱରେ ଥିବା ଇନ୍ସପେକ୍ଟର ସନ୍ଧ୍ୟା ସିଂ ସୂଚନା ଦେଇଛନ୍ତି।