ଜଗତ୍ସିଂହପୁର ଅଫିସ/ରାହାମା,୨।୭ (ଡି.ଏନ୍.ଏ.): ଜଗତ୍ସିଂହପୁର ଜିଲା ତିର୍ତ୍ତୋଲ ଥାନା ରାହାମାର ତେରମାଣପୁର(ବାଲିସାହି) ଗଁାରେ ଏକ ଚୋରି ଘଟଣାରେ ଗୁରୁବାର ପୋଲିସ ତଦନ୍ତ କରିବାକୁ ଯାଇଥିବାବେଳେ ଆକ୍ରମଣର ଶିକାର ହୋଇଛି। ରଞ୍ଜିତ ବରାଳ ଓରଫ ନନ୍ଦ (୩୫) ହାବିଲଦାରଙ୍କ ଲାଠି ଛଡ଼ାଇ ନିସ୍ତୁକ ମାଡ଼ ମାରିଛନ୍ତି। ଏପରି କି ଗୋଟେ ହାତରେ ଖଣ୍ଡା ଓ ଅନ୍ୟ ହାତରେ ଲାଠି ଧରି ଗୋଡ଼ାଇବାରୁ ହାବିଲ୍ଦାର ଜୀବନ ବଞ୍ଚାଇବାକୁ ଦୌଡ଼ି ପଳାଇ ଯାଉଥିବାର ଭିଡିଓ ମୋବାଇଲରୁ ମୋବାଇଲ ଘୂରି ବୁଲୁଛି। ଘଟଣାସ୍ଥଳରେ ଶତାଧିକ ଲୋକ ଉପସ୍ଥିତ ଥିଲେ ହେଁ ସଭିଏଁ ଦେଖଣାହାରୀ ସାଜିଥିଲେ। ଆକ୍ରମଣର ଶିକାର ହୋଇଥିବା ହାବିଲଦାର ସ୍ମୃତିରଞ୍ଜନ ମହାପାତ୍ରଙ୍କ ଅଭିଯୋଗକ୍ରମେ ରଞ୍ଜିତଙ୍କ ବିରୋଧରେ ଥାନାରେ ମାମଲା ରୁଜୁ ହୋଇଛି। ଅଭିଯୁକ୍ତ ଫେରାର ଥିବାରୁ ଧରିବାକୁ ପୋଲିସ ତନାଘନା ଚଳାଇବା ସହ ତେରମାଣପୁର ଗଁାରେ ତିର୍ତ୍ତୋଲ ଏସ୍ଡିପିଓ, ଆଇଆଇସି ଭାବଗ୍ରାହୀ ରାଉତ ପ୍ରମୁଖ ପହଞ୍ଚତ୍ଛନ୍ତି।
ମିଳିଥିବା ସୂଚନା ଅନୁସାରେ, ବୁଧବାର ତେରମାଣପୁର ଗ୍ରାମ ଦେବତୀଙ୍କ ହୁଣ୍ଡି, ଘଣ୍ଟ ଓ ଘଣ୍ଟା ଆଦି ଚୋରି ହୋଇଥିଲା। ଗତ ୧୫ ଦିନ ଭିତରେ ତିର୍ତ୍ତୋଲ ବ୍ଲକ ସାଇଲୋ ପଞ୍ଚାୟତ କାର୍ଯ୍ୟାଳୟରୁ କମ୍ପ୍ୟୁଟର ଓ ଅନ୍ୟ ସାମଗ୍ରୀ ସମେତ ତୋଟାସାହିସ୍ଥିତ ଅଙ୍ଗନୱାଡି କେନ୍ଦ୍ର ପରିସରରୁ ମୋଟର ଚୋରି ହୋଇଥିଲା। ରଞ୍ଜିତ ଏଭଳି କରିଥିବା ନେଇ ଗ୍ରାମବାସୀ ସନ୍ଦେହ କରୁଥିଲେ। ମାତ୍ର ପୋଲିସ ଚୁପ୍ ବସିଥିଲା। ତେଣୁ ତେରମାଣପୁର ଗ୍ରାମବାସୀ ଗୁରୁବାର ତିର୍ତ୍ତୋଲ ଥାନାରେ ପହଞ୍ଚତ୍ ଅଭିଯୁକ୍ତଙ୍କୁ ତୁରନ୍ତ ଗିରଫ କରା ନ ଗଲେ ସେମାନେ ଯିବେନାହିଁ ବୋଲି ଅଡି ବସିଥିଲେ। ଶେଷରେ ସନ୍ଧାନୀ କୁକୁର ସାହାଯ୍ୟରେ ଅଭିଯୁକ୍ତଙ୍କୁ ଚିହ୍ନଟ ପାଇଁ ଉଦ୍ୟମ ହୋଇଥିଲା। ମହିଳା ଏସ୍ଆଇ ଧରିତ୍ରୀ ଜେନାଙ୍କ ନେତୃତ୍ୱରେ ଅପରେଶନ୍ ଆରମ୍ଭ ହୋଇଥିଲା। ସନ୍ଧାନୀ କୁକୁର ଗ୍ରାମଦେବତୀଙ୍କ ପରିସରରୁ ବାହାରି ରଞ୍ଜିତଙ୍କ ଘର ପର୍ଯ୍ୟନ୍ତ ଯାଇ ଅଟକିଯାଇଥିଲା। ପରେ ହାବିଲଦାର କବାଟ ବାଡ଼େଇ ରଞ୍ଜିତଙ୍କୁ ବାହାରକୁ ଆସିବାକୁ ଡାକିଥିଲେ। ସେତେବେଳେ ତେରମାଣପୁର ସମେତ ଆଖପାଖ ଗଁାର ଲୋକେ ରୁଣ୍ଡ ହୋଇ ଯାଇଥିଲେ। ବିଳମ୍ବରେ ରଞ୍ଜିତ କବାଟ ଖୋଲି ହଠାତ୍ ହାବିଲଦାର ମହାପାତ୍ରଙ୍କ ହାତରୁ ଲାଠି ଛଡ଼ାଇ ଆକ୍ରମଣ କରିଥିଲେ। ମହାପାତ୍ର ଜୀବନ ବିକଳରେ ଦୌଡୁଥିଲେ ମଧ୍ୟ ଅଭିଯୁକ୍ତ ତାଙ୍କୁ ଛାଡ଼ି ନ ଥିଲେ। ପରେ ରଞ୍ଜିତ ନିକଟସ୍ଥ ବିଲ ଆଡକୁ ଧାଇଁ ଫେରାର ହୋଇଯାଇଥିଲେ।
ପ୍ରକାଶ ଯେ, ୨୦୨୦ରେ ବାଲିସାହି ଗଁା ମୁଣ୍ଡ ରେଳ ଲାଇନ୍ ଉପରେ ରଞ୍ଜିତ ଜଣେ ଆର୍ପିଏଫ୍ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରି ଖସିଯାଇଥିଲେ। ସେହିପରି ୧୫ା୯ା୨୦ରେ ଅନ୍ୟ ଜଣଙ୍କୁ ମରଣାନ୍ତକ ଆକ୍ରମଣ କରିଥିଲେ। ଜଣେ ବିଧବା ମହିଳାଙ୍କୁ ବାରମ୍ବାର ବଳାତ୍କାର କରିବା ଭଳି ସଙ୍ଗିନ ଅଭିଯୋଗ ତାଙ୍କ ବିରୋଧରେ ରହିଛି। ଏପରି କି ଜଣେ ବ୍ୟକ୍ତିଙ୍କ ବାଇକ୍ ଚୋରି ଘଟଣାରେ ମଧ୍ୟ ରଞ୍ଜିତଙ୍କ ସମ୍ପୃକ୍ତି ଥିବା ଅଭିଯୋଗ ହୋଇଛି। ଅଭିଯୁକ୍ତଙ୍କ ବିରୋଧରେ ଏତେଗୁଡ଼ିଏ ମାମଲା ଥିବାବେଳେ ପୋଲିସ ନୀରବ ରହିଥିବାରୁ ଏଭଳି ପରିସ୍ଥିତି ଉପୁଜିଛି ବୋଲି ଗ୍ରାମବାସୀ କହିଛନ୍ତି। ଏସବୁ ଅଭିଯୋଗ ଉପରେ ଅନୁଧ୍ୟାନ କରାଯିବା ସହ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ ଚାଲିଛି ବୋଲି ଆଇଆଇସି ରାଉତ କହିଛନ୍ତି।