କଟକ,୨୧ା୩(ଶିଳ୍ପା ପ୍ରିୟଦର୍ଶିନୀ): ନିର୍ବାଚନ ସମୟ ପାଖେଇ ଆସୁଥିବାବେଳେ ସମସ୍ତ ଦଳରେ ଅଙ୍କ କଷା ଜାରି ରହିଛି। ଆଶାୟୀଙ୍କ ତାଲିକା ଲମ୍ବା ରହିଛି ସତ ହେଲେ ଦଳ କାହାକୁ ଟିକେଟ ଦେବ ସେ ନେଇ ଏବେ ନାନା କଳ୍ପନା ଜଳ୍ପନା ଚାଲିଛି। ନିର୍ବାଚନକୁ ନେଇ ସମସ୍ତେ ନିଜ ନିଜ ସଙ୍ଗଠନ ମଜଭୁତ କରିବା ସହ ଦଳୀୟ କାର୍ଯ୍ୟକ୍ରମ ଓ ଅନ୍ୟାନ୍ୟ କାର୍ଯ୍ୟକ୍ରମ ଜାରି ରଖିଛନ୍ତି। ତେବେ ବୁଧବାର ପଖାଳ ଦିବସ ପାଳନ କରାଯାଇଥିବାବେଳେ ଏହି ଦିବସକୁ ପ୍ରଥମକରି ବ୍ୟକ୍ତିଗତ ଭାବେ ବାରବାଟୀ କିଲ୍ଲା ପରିସରରେ ଥିବା ନିଜ ସରକାରୀ କ୍ବାର୍ଟର୍ସରେ ପାଳନ କରିବାକୁ ପଛାଇ ନାହାନ୍ତି କଟକ ମହାନଗର ନିଗମ(ସିଏମ୍ସି) ମେୟର ସୁବାସ ସିଂ। ଏଥିରେ ସାମିଲ ହେବା ଲାଗି ରାଜ୍ୟ ସଭା ସଦସ୍ୟ ଦେବାଶିଷ ସାମନ୍ତରାୟ, ବାରବାଟୀ-କଟକ, ଚୌଦ୍ୱାର-କଟକ ବିଜେଡିର ନେତୃବୃନ୍ଦଙ୍କ ସମେତ ସିଏମ୍ସିର ସମସ୍ତ କର୍ପୋରେଟର, ଶାନ୍ତି କମିଟି କର୍ମକର୍ତ୍ତା, ସମସ୍ତ ପୂଜା କମିଟି କର୍ମକର୍ତ୍ତା ଓ ଗଣମାଧ୍ୟମ ପ୍ରତିନିଧିଙ୍କୁ ନିମନ୍ତ୍ରଣ କରାଯାଇଥିଲା। ହେଲେ ଏଥିରେ ଦେବାଶିଷଙ୍କ ସମେତ ବାରବାଟୀ-କଟକ ନିର୍ବାଚନମଣ୍ଡଳୀର ନେତୃବୃନ୍ଦ ଉପସ୍ଥିତ ନ ଥିଲେ। ସେହିପରି ଚୌଦ୍ୱାର-କଟକ ବିଧାୟକ ସୌଭିକ୍ ବିଶ୍ୱାଳ ଆସି ନ ଥିବାବେଳେ ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳ ଉପସ୍ଥିତ ଥିଲେ। ତେବେ ମେୟର ସୁବାସ ପୂର୍ବରୁ କେବେ ଏପରି ଆଡମ୍ବର ସହ ପଖାଳ ଦିବସ ପାଳନ କରି ନ ଥିବାବେଳେ ଏବେ ନିର୍ବାଚନ ସମୟରେ ଏପରି ଭାବେ ପାଳିବା ନେଇ ଚର୍ଚ୍ଚା ଜୋର୍ ଧରିଛି। ଏପରି କି ପୂର୍ବରୁ କୌଣସି ରାଜନେତା ଏଭଳି ଢଙ୍ଗରେ ପଖାଳ ଦିବସ ପାଇଁ କାର୍ଯ୍ୟକ୍ରମ ଆୟୋଜନ କରିବା କଟକରେ ପ୍ରଥମ ବୋଲି କେତେଜଣଙ୍କ ମୁହଁରୁ ଶୁଣିବାକୁ ମିଳୁଛି। ତେବେ ନିର୍ବାଚନକୁ ନେଇ ବାରବାଟୀ-କଟକ ଆସନରୁ ଭାଗ୍ୟ ପରୀକ୍ଷା ଲାଗି ମେୟର ସୁବାସଙ୍କ ପାଇଁ ସୁଯୋଗ ରହିଥିବାବେଳେ ପଖାଳ ଦିବସ ମାଧ୍ୟମରେ ସେ ବନ୍ଧୁମିଳନ କରି ଲୋକଙ୍କ ନିକଟତର ହେବାଲାଗି ଏକ ପ୍ରୟାସ ବୋଲି ଲୋକେ ବେଶ୍ ଟୁପୁରୁଟାପର ହେଉଛନ୍ତି। ହେଲେ ମେୟର ଏହି ସମସ୍ତ ପ୍ରସଙ୍ଗକୁ ଏଡାଇ କହିଛନ୍ତି, ପଖାଳ ହେଉଛି ଓଡ଼ିଆଙ୍କ ପରିଚୟ। ଏହା ସ୍ବାସ୍ଥ୍ୟକର ଖାଦ୍ୟ। ସବୁବର୍ଗର ଲୋକଙ୍କୁ ଏକଜୁଟ୍ କରିବା ସହ ଏହି ଦିବସକୁ ମିଶି ପାଳିବା ପାଇଁ ଲକ୍ଷ୍ୟ ରହିଥିବା ସେ କହିଛନ୍ତି। ଏହି କାର୍ଯ୍ୟକ୍ରମରେ ସିଏମ୍ସି ଡେପୁଟି ମେୟର ଦମୟନ୍ତୀ ମାଝି, ଶାନ୍ତି କମିଟି ସଭାପତି ଦେବେନ୍ଦ୍ର ସାହୁ, ସମ୍ପାଦକ ଭିକାରି ଦାସ, ପୂର୍ବାଞ୍ଚଳ ଶାନ୍ତି କମିଟି ସଭାପତି ବିଜୟ କୁମାର ସାହୁ, ‘ସମାଜ’ର ପ୍ରକାଶକ ଡ. ପ୍ରଭାସ ରଞ୍ଜନ ଆଚାର୍ଯ୍ୟ, ସମ୍ପାଦକ ଡ. ପ୍ରମୋଦ ମହାପାତ୍ର, ଆଇନଜୀବୀ ଶଶିଭୂଷଣ ଦାସ, ସାହିତି୍ୟକ ତରୁଣ ସାହୁ, ବିଜେଡି ସାଧାରଣ ସମ୍ପାଦକ ପ୍ରଫୁଲ୍ଲ ସିଂ, ବିଶ୍ୱଜିତ୍ ମହାନ୍ତିଙ୍କ ସମେତ ସମସ୍ତ କର୍ପୋରେଟର, ବୁଦ୍ଧିଜୀବୀଙ୍କ ସହ ସମସ୍ତ ସମ୍ପ୍ରଦାୟର ଲୋକ ଉପସ୍ଥିତ ଥିଲେ।