ଭୁବନେଶ୍ୱର,୪ା୨(ବ୍ୟୁରୋ):ଭାରତମାଳା ପରିଯୋଜନା ଅନ୍ତର୍ଗତ କୋଷ୍ଟାଲ ହାଇଓ୍ବେ କାର୍ଯ୍ୟର ତ୍ୱରାନ୍ବିତ ନେଇ ସମୀାକ୍ଷା ହେବାପରେ କାହାକୁ ଶ୍ରେୟ ମିଳିବ ତାକୁ ନେଇ ରାଜନୀତି ଆରମ୍ଭ ହୋଇଯାଇଛି। ଉଭୟ ବିଜେଡି ଏବଂ ଭାଜପା ପରସ୍ପର ବିରୋଧରେ ଯୁକ୍ତି ବାଢିଛନ୍ତି। ଭାଜପା କହିଛି କୋଷ୍ଟାଲ ହାଇଓ୍ବେକୁ ନେଇ ଶାସକ ଦଳ ପ୍ରଥମରୁ କାର୍ଡ ଖେଳିବାକୁ ଚାହୁଁଥିଲା। ବିଜେଡି ଲୋକଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଥିବାବେଳେ ଏହା ମଙ୍ଗଳବାର ଅନୁଷ୍ଠିତ ସମୀକ୍ଷା ବୈଠକ ପରେ ଧରାପଡିଗଲା ବୋଲି କହିଛି। ଅନ୍ୟପଟେ ବିଜେଡ଼ି ମଧ୍ୟ ଏହି ପ୍ରସଙ୍ଗରେ ରାଜନୀତି ନ କରି ପ୍ରକଳ୍ପର ଅଗ୍ରଗତି ନେଇ କାର୍ଯ୍ୟ ଆରମ୍ଭ କରିବାକୁ କହିଛି। ଭାଜପା ରାଜ୍ୟ ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି, ସାତପଡାରୁ ଗୋପାଳପୁରକୁ ଯେଉଁ ସ୍ପାନ ଥିଲା ତାକୁ ରାଜ୍ୟ ସରକାର ୨୦୧୯ ମସିହାରେ ଏକ ଚିଠି ମାଧ୍ୟମରେ କାମ ବିଳମ୍ବ କରିବାକୁ ଚେଷ୍ଚା କରିଥିଲେ। କେନ୍ଦ୍ର ସରକାରଙ୍କୁ ଚିଠି ଜରିଆରେ ରାଜ୍ୟ କହିଥିଲା ଯେ ଏବଂ ସ୍ପାନ କାମ ନ କରି ବିଳମ୍ବରେ ହେଉ। ରାଜ୍ୟ ସରକାରଙ୍କ ଅନୁରୋଧ ଅନୁଯାୟୀ ରାସ୍ତା କାମ ବିଳମ୍ବିତ କରାଯାଇଥିଲା। ମିଛ କହି ପ୍ରଦେଶ ଲୋକଙ୍କୁ ବିଭ୍ରାନ୍ତ କରିବା ଏବଂ ରାଜ୍ୟର ଅର୍ଥନୀତିକୁ ହଡପା କରିବାର ଯେଉଁ ଯୋଜନା ବେଳେବେଳେ ବିଜେଡି ଆରମ୍ଭ କରେ ବୋଲି ପୃଥ୍ବିରାଜ କହିଛନ୍ତି। ଅନ୍ୟପଟେ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ ଦାସବର୍ମା କହିଛନ୍ତି, ସାତପଡା-ପୁରୀ-କୋଣାର୍କ ଦେଇ କୋଷ୍ଟାଲ ହାଇଓ୍ବେ ଯିବା ଲାଗି ଯେଉଁ ପ୍ରସ୍ତାବ ଥିଲା ତାହାକୁ କେନ୍ଦ୍ର ସରକାର ଗ୍ରହଣ କରିନେଉଛନ୍ତି। ବେଶି ରାଜନୀତିକରଣ ନ କରି କିଭଳି ରାଜ୍ୟର ବିକାଶ ହେବ ସେଥିପ୍ରତି ଦୃଷ୍ଟି ଦିଆଯାଉ। କେନ୍ଦ୍ର ସରକାରଙ୍କ ସହ ହୋଇଥିବା ଆଲୋଚନା ପରେ କାର୍ଯ୍ୟ ତୁରନ୍ତ ଆରମ୍ଭ ହେବ ବୋଲି ଲାଗୁଥିବା ସଞ୍ଜୟ କହିଛନ୍ତି।