ବ୍ରହ୍ମପୁର ଅଫିସ,୯।୧୧: ଚନ୍ଦ୍ରଗ୍ରହଣ ସମୟରେ ବ୍ରହ୍ମପୁର ବିଚ୍ ରାସ୍ତାରେ ହେତୁବାଦୀଙ୍କ ସାମୂହିକ ଆମିଷ ଭୋଜନ ଓ ଏହାକୁ ହିନ୍ଦୁବାଦୀ ଗୋଷ୍ଠୀ ତଥା ସନାତନ ଧର୍ମୀଙ୍କ ବିରୋଧରୁ ଘଟିଥିବା ହିଂସାକୁ ନେଇ ରାଜନୀତି ଜୋର ଧରିଛି। ଭାଜପା ନେତା କାହ୍ନୁ ଚରଣ ପତି ଚନ୍ଦ୍ରଗ୍ରହଣରେ ହେତୁବାଦୀମାନଙ୍କ ସାମୂହିକ ଆମିଷ ଭୋଜନକୁ ସମାଲୋଚନା କରିଛନ୍ତି। ଏହାର ପ୍ରତିବାଦ କରିଥିବା ହିନ୍ଦୁ ସଂଗଠନ କର୍ମକର୍ତ୍ତା ଓ ସଦସ୍ୟଙ୍କୁ ଆକ୍ରମଣ ଏବଂ ପୋଲିସର ଲାଠିମାଡ଼କୁ ସେ ନିନ୍ଦା କରିଛନ୍ତି।
ନେତା ତଥା ପିସିସି ସଦସ୍ୟ ଆଇନଜୀବୀ ପୀତବାସ ପଣ୍ଡା କହିଛନ୍ତି, କିଏ କ’ଣ ଖାଇବ ଓ ନ ଖାଇବ ତାହା ବ୍ୟକ୍ତିଗତ କଥା। ହେତୁବାଦୀଙ୍କ ସାମୂହିକ ଆମିଷ ଭୋଜନକୁ ବନ୍ଦ ଓ ବିରୋଧ କରିବାର ଅଧିକାର ହିନ୍ଦୁବାଦୀଙ୍କୁ କିଏ ଦେଇଛି ବୋଲି ସେ ପ୍ରଶ୍ନ ଉଠାଇଛନ୍ତି। ସାଧୁ ସନ୍ଥ ଓ ସନାତନ ଧର୍ମୀ ପୋଲିସରେ ଏତଲା ନ ଦେଇ ଭୋଜନସ୍ଥଳରେ ହୋହାଲ୍ଲା ଏବଂ ହିଂସାକାଣ୍ଡକୁ ପଣ୍ଡା ନିନ୍ଦା କରିଛନ୍ତି। ଜିଲା ବିଜେଡି ସଭାପତି ଡ଼ା. ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ କହିଛନ୍ତି, ଗ୍ରହଣ ବେଳେ ଆମିଷ ବା ନିରାମିଶ ଭୋଜନ ସମ୍ପୂର୍ଣ୍ଣ ନିଷେଧ। ଏହା ବିଜ୍ଞାନ ସମ୍ମତ ବୋଲି ଭେଷଜ ବିଶେଷଜ୍ଞ ଡା.ଚ୍ୟାଉ ପଟ୍ଟନାୟକ ମତବ୍ୟକ୍ତ କରିଛନ୍ତି।