ମେଲବୋର୍ନ: କିଛିଦିନ ହେବ ଗ୍ଲୋବାଲ ଓ୍ବାର୍ମିଂ ସହ ଜଡ଼ିତ ଅନେକ ଆଶ୍ଚର୍ଯ୍ୟକର ଘଟଣାସବୁ ସାମ୍ନାକୁ ଆସୁଛି। କାନାଡାରେ ପ୍ରବଳ ଗ୍ରୀଷ୍ମ, ଚାଇନାରେ ୧୦୦୦ ବର୍ଷ ମଧ୍ୟରେ ସବୁଠୁ ଅଧିକ ବର୍ଷା, ଜର୍ମାନୀରେ ପ୍ରବଳ ବନ୍ୟା ଦେଖିବାକୁ ମିଳିଥିବାବେଳେ ବର୍ତ୍ତମାନ ଅଷ୍ଟ୍ରେଲିଆରେ ଜୋର୍ରେ ପବନ ଦୁନିଆର ଦୀର୍ଘତମ ତଥା ସବୁଠୁ ଉଚ୍ଚ ସୁଇମିଂ ପୁଲ୍ର ପାଣିକୁ ଉଡ଼ାଇ ଦେଇଛି। ଯାହା ସମସ୍ତଙ୍କୁ ଚକିତ କରିଛି।
ଏହି ଫୁଟେଜକୁ ଅଷ୍ଟ୍ରେଲୀୟ ରାପର ତାଙ୍କ ଇନ୍ଷ୍ଟାଗ୍ରାମରେ ଶେୟାର କରିଛନ୍ତି। ସେ ଏହି ଭିଡିଓକୁ ଟୁଇଟରରେ ମଧ୍ୟ ଶେୟାର କରିଛନ୍ତି। ଫଳରେ ଏହା ଖୁବ୍ ଭାଇରାଲ ହେବାରେ ଲାଗିଛି। ଭିଡିଓଟି ମେଲବୋର୍ନ ସହରରେ ଅଷ୍ଟ୍ରେଲିଆ ୧୦୮ ବିଲ୍ଡିଂର ୭୦ ତମ ମହଲାରେ ଥିବା ପୁଲ୍ର। ପ୍ରବଳ ପବନ ଯୋଗୁ ଏହି ପୁଲ୍ର ପାଣି ଆକାଶରେ ଉଡ଼ିଛି।
ଏହି ଘଟଣା ରେକର୍ଡ ହୋଇଥିବା ଦିନ ମେଲବୋର୍ନର କେନ୍ଦ୍ରୀୟ ବିଜନେସ ଜିଲାରେ ୧୦୦ କିଲୋମିଟର ପର୍ଯ୍ୟନ୍ତ ପବନ ବହିଥିବା ରେକର୍ଡ କରାଯାଇଥିଲା। ଅଷ୍ଟ୍ରେଲିଆ ୧୦୮ ବିଲ୍ଡିଂର ୩୧୮ ମିଟର ଅର୍ଥାତ୍ ୧୦୪୩ ଫୁଟ ଉଚ୍ଚରେ ରହିଛି। ଯେତେବେଳେ ଏହା ନିର୍ମିତ ହୋଇଥିଲା ଦକ୍ଷିଣ ଗୋଲାର୍ଦ୍ଧର ସବୁଠାରୁ ଉଚ୍ଚ କୋଠା ଥିଲା। ଏହି ବିଲ୍ଡିଂ ନିର୍ମାଣ କରିଥିବା କଣ୍ଟ୍ରାକ୍ଟର ଏହି ପୁଲ୍ର ଫୁଟେଜ ଦେଖିଲେ ସେ କହିଥିଲେ ଯେ, ଏହି ମୁଭ୍ମେଣ୍ଟ ସ୍ବାଭାବିକ କଥା। ଏତେ ଉଚ୍ଚରେ ଥିବାରୁ ଏପରି ହୋଇଛି। ଏହା ସମ୍ପୂର୍ଣ୍ଣ ସୁରକ୍ଷିତ। ତେବେ ଏହି ବିଲ୍ଡିଂରେ ରହୁଥିବା ଲୋକେ ଅଧିକ ଭୟଭୀତ ହୋଇପଡ଼ିଛନ୍ତି। ଏହା ବ୍ୟତୀତ ପ୍ରବଳ ପବନର ସୁ-ସୁ ଗର୍ଜନକୁ ନେଇ ମଧ୍ୟ ଚିନ୍ତା ପ୍ରକଟ କରିଛନ୍ତି।