ଅନୁଗୋଳ ଅଫିସ, ୩୧।୮: ୫୯ ବର୍ଷରେ ପାଦ ଥାପିବାକୁ ଯାଉଛି ଅନୁଗୋଳ ପୌରପାଳିକା। ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି)ରୁ ବର୍ତ୍ତମାନର ପୌରପରିଷଦ, ଦୀର୍ଘ ୫୮ ବର୍ଷର ଯାତ୍ରା ମଧ୍ୟରେ ଅନେକ ପରିବର୍ତ୍ତନ ହୋଇଛି ଅନୁଗୋଳରେ। ଏହି ସମୟ ମଧ୍ୟରେ ପୌର ପରିଷଦରେ ବସିଛନ୍ତି ୧୪ ଜଣ ନଗରପାଳ। ଶାସନ କରିଛନ୍ତି ୧୨ ପ୍ରଶାସନିକ ଅଧିକାରୀ। ଇତିମଧ୍ୟରେ ବଦଳିଛି ସହରର କଳେବର। ବଢ଼ିଛି ଲୋକ ସଂଖ୍ୟା। ବିକାଶଠାରୁ ସୌନ୍ଦର୍ଯ୍ୟକରଣ ଯାଏ ହୋଇଛି ଅନେକ ଉନ୍ନତୀକରଣ କାର୍ଯ୍ୟ।
୧୯୬୪ ଜାନୁୟାରୀ ୨୪ରେ ଅନୁଗୋଳ ବିଜ୍ଞାପିତ ଅଞ୍ଚଳ ପରିଷଦ(ଏନ୍ଏସି)ର ମାନ୍ୟତା ପାଇଥିଲା। ସେତେବେଳେ ସହରରେ ମାତ୍ର ୧୨ଟି ଓ୍ବାର୍ଡ ରହିଥିଲା। ଲୋକ ସଂଖ୍ୟା ମଧ୍ୟ ସେପରି ଅଧିକ ନ ଥିଲା। ଅବସ୍ଥା ଏପରି ଥିଲା ଯେ ସନ୍ଧ୍ୟାରେ ବସ୍ଷ୍ଟାଣ୍ଡକୁ ଆସିବାକୁ ଲୋକଙ୍କୁ ଭୟ ଲାଗୁଥିଲା। ହେଲେ ଧୀରେ ଧୀରେ ସହର ସହ କୋଳାହଳ ବଢ଼ିବାକୁ ଲାଗିଲା। ଖଣି ଓ ଶିଳ୍ପକୁ ନଜରରେ ରଖି ରାଜ୍ୟର ବିଭିନ୍ନ ଅଞ୍ଚଳରୁ ଲୋକେ ଅନୁଗୋଳ ମୁହଁା ହେଲେ। ଫଳରେ ୧୨ ଓ୍ବାର୍ଡର ଅନୁଗୋଳ ଏନ୍ଏସି ୨୦୦୮ରେ ପୌର ପରିଷଦରେ ପରିଣତ ହେଲା। ଓ୍ବାର୍ଡ ସଂଖ୍ୟା ମଧ୍ୟ ୨୩ରେ ପହଞ୍ଚିଲା। ଏହାପରେ ଅନୁଗୋଳ ସହରର ବିକାଶ ଯାତ୍ରା ଜୋର୍ ଧରିଥିଲା। ପୂର୍ବପେକ୍ଷା ଦ୍ରୁତ ଗତିରେ ଉନ୍ନତୀକରଣ କାର୍ଯ୍ୟ ହେବାରୁ ଜନସଂଖ୍ୟା ମଧ୍ୟ ବୃଦ୍ଧି ପାଇ ଚାଲିଲା। ଗତ କିଛିବର୍ଷ ମଧ୍ୟରେ ଅନୁଗୋଳ ପୌରାଞ୍ଚଳରେ ଅନେକ ପରିବର୍ତ୍ତନ ହୋଇଛି। ଲୋକଙ୍କୁ ବିଭିନ୍ନ ଚାକଚକ୍ୟ ସୁବିଧା ମିଳିଛି। ଆମୋଦ ପ୍ରମୋଦ କରିବାକୁ ପାର୍କ ଓ ସକାଳ ସହ ସନ୍ଧ୍ୟା ଭ୍ରମଣ କରିବାକୁ ହେଲଥ୍ କରିଡର ନିର୍ମାଣ କରାଯାଇଛି। ସହରର ସୌନ୍ଦର୍ଯ୍ୟ ବୃଦ୍ଧିକୁ ନେଇ ସହରବାସୀ ର୍ଗବ ଅନୁଭବ କରୁଛନ୍ତି। ତେବେ ପାନୀୟ ଜଳଠାରୁ ପରିମଳ ବ୍ୟବସ୍ଥାରେ ଏବେ ବି ଅନେକ ସମସ୍ୟା ରହିଛି। ସହରୀରୁ ବର୍ଷା ଜଳ ନିଷ୍କାସନ ଠିକ୍ ଭାବେ ହୋଇପାରୁ ନାହିଁ। ଫଳରେ ଜୋରଦାର ବର୍ଷା ହେଲେ ସହର ଜଳପ୍ଲାବିତ ହୋଇପଡ଼ୁଛି। ଦୀର୍ଘବର୍ଷ ମଧ୍ୟରେ ନିର୍ବାଚିତ ପ୍ରତିନିଧିଙ୍କ ଠାରୁ ଆରମ୍ଭ କରି କେତେଜଣ ଦକ୍ଷ ପ୍ରଶାସନିକ ଅଧିକାରୀ ପୌରପାଳିକାରେ ଦାୟିତ୍ୱ ତୁଲାଇଥିଲେ ମଧ୍ୟ ଉପରୋକ୍ତ ଅସୁବିଧା ଦୂର ହୋଇ ନ ଥିବାରୁ ପୌରାଞ୍ଚଳବାସୀଙ୍କ ମନରେ କ୍ଷୋଭ ରହିଥିବା ଜଣାପଡ଼ିଛି।
ସହର ବିକଶିତ ହୋଇଛି
୮୦ ଦଶକର ଅନୁଗୋଳ ସହରରେ ସନ୍ଧ୍ୟା ହେଲେ ଯାତାୟାତ କରିବାକୁ ଭୟ ଲାଗୁଥିଲା। ଏପରି କି ବସ୍ଷ୍ଟାଣ୍ଡ ଅଞ୍ଚଳରେ ସନ୍ଧ୍ୟାରେ ଅସାମାଜିକଙ୍କ ଆଡ୍ଡା ଜମୁଥିଲା। ହେଲେ ବର୍ତ୍ତମାନ ସେଥିରେ ଆକାଶଛୁଅଁା ପରିବର୍ତ୍ତନ ଆସିଛି। ସହର ବିକଶିତ ହେବା ସହ ଉନ୍ନତି ପଥରେ ଅଗ୍ରସର ହେଉଛି। ତଥାପି ପାନୀୟ ଜଳ ସମସ୍ୟା ଏବେ ମଧ୍ୟ ରହିଛି।
-ବିଦ୍ୟାଧର ପଣ୍ଡା, ବୁଦ୍ଧିଜୀବୀ
ସୌନ୍ଦର୍ଯ୍ୟମୟ ପରିବେଶ ସୃଷ୍ଟି ହୋଇଛି
ସହର ବଢ଼ିବା ସହ ଲୋକସଂଖ୍ୟାରେ ଦ୍ରୁତ ଅଭିବୃଦ୍ଧି ହୋଇଚାଲିଛି। ବହୁ ଉନ୍ନତୀକରଣ କାର୍ଯ୍ୟ ଚାଲିଥିବାରୁ ସହରରେ ସୌନ୍ଦର୍ଯ୍ୟମୟ ପରିବେଶ ସୃଷ୍ଟି ହୋଇଛି। ହେଲେ ପରିମଳ ବ୍ୟବସ୍ଥାରେ ଆହୁରି ସୁଧାର ଆସିବା ଆବଶ୍ୟକ। ଏ ନେଇ ପ୍ରଶାସନ ଓ ନିର୍ବାଚିତ ଲୋକ ପ୍ରତିନିଧିମାନେ ମିଳିତ ଭାବେ କାର୍ଯ୍ୟ କରିବାର ଦରକାର।
-ସ୍ନିଗ୍ଧା ସାହୁ, ବୁଦ୍ଧିଜୀବୀ
ଅମିତ କୁମାର ସାମଲ