ଗୋଲାମୁଣ୍ଡା,୧୭।୪(ବଟକୃଷ୍ଣ ପଣ୍ଡା):କଳାହାଣ୍ଡି ଜିଲା ଜୁନାଗଡ଼ ବିଧାନସଭା କ୍ଷେତ୍ରରେ ରାଜନୈତିକ ଉଷ୍ମତା ଦିନକୁ ଦିନ ବୃଦ୍ଧି ପାଉଛି। ଏହି ବିଧାନସଭା କ୍ଷେତ୍ର ପାଇଁ ୩ ପ୍ରମୁଖ ଦଳ ଭାଜପା, ବିଜେଡି ଓ କଂଗ୍ରେସ ନିଜର ପ୍ରାର୍ଥୀ ଘୋଷଣା କରି ସାରିଛନ୍ତି। ଭାଜପାରୁ ମନୋଜ ମେହେର, ବିଜେଡିରୁ ଦିବ୍ୟଶଙ୍କର ମିଶ୍ର, କଂଗ୍ରେସରୁ ତୁଲେଶ୍ୱର ନାଏକଙ୍କ ପ୍ରାର୍ଥୀ ହୋଇଛନ୍ତି। ୨୦୧୯ ନିର୍ବାଚନରେ ଭାଜପାରୁ ମନୋଜ ମେହେର ଓ ବିଜେଡିରୁ ଦିବ୍ୟଶଙ୍କର ମିଶ୍ରଙ୍କ ମଧ୍ୟରେ କଢା ମୁକାବିଲା ହୋଇଥିଲା। ଏଥିରେ ମନୋଜ ପରାସ୍ତ ହୋଇଥିଲେ ସୁଦ୍ଧା ୫ ବର୍ଷ ଧରି ନିୟମିତ ଭାବେ ତାଙ୍କର ସଙ୍ଗଠନ ଜାରି ରଖିଥିବାରୁ ଦଳ ପୁନର୍ବାର ତାଙ୍କୁ ଭରସା କରି ଟିକେଟ ଦେଇଛି। ଏପଟେ ମୋଦି ଲହରକୁ ନେଇ ନିର୍ବାଚନ ବୈତରଣୀ ଅତିକ୍ରମ କରିବାକୁ ଚେଷ୍ଟା ଜାରି ରହିଛି। ବିଜେଡିରୁ ଦିବ୍ୟଶଙ୍କର ମିଶ୍ର ଦଳରୁ କ୍ରମାଗତ ୨ଥର ବିଧାୟକ ହୋଇ ବର୍ତ୍ତମାନ ହାଟ୍ରିକ ଲକ୍ଷ୍ୟରେ ରହିଛନ୍ତି। ରାଜ୍ୟ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ଓ ଗତ ୧୦ବର୍ଷର ବିକାଶମୂଳକ କାର୍ଯ୍ୟ ଏବଂ ନିଜର ଦଳୀୟ ସଙ୍ଗଠନକୁ ମଜଭୁତ କରିବା ପାଇଁ ପ୍ରକ୍ରିୟା ଜାରି ରଖିଛନ୍ତି। ଏହା ପୂର୍ବରୁ ମହାଲିଙ୍ଗ ସନ ସାଇନ କଲେଜ ମମିତା ମେହେର ହତ୍ୟା ଘଟଣାରେ ବିବାଦ ଘେରରେ ଆସିଥିଲେ। କିନ୍ତୁ ତାଙ୍କୁ ନିର୍ଦୋଷ ବୋଲି ବିଜେଡି ପକ୍ଷରୁ କୁହାଯାଇଥିଲା। ଏହିସବୁ ଭିତରେ ଜନ ସାଧାରଣ ଆଗକୁ କିପରି ଭାବେ ତାଙ୍କୁ ଗ୍ରହଣ କରିବେ ତାହା ଦେଖିବାକୁ ବାକି ରହିଲା। ଓଡିଶା ପ୍ରଦେଶ କଂଗ୍ରେସ କମିଟି ପ୍ରଚାର କମିଟି ଅଧ୍ୟକ୍ଷ ତଥା ଭକ୍ତଦାସଙ୍କ ଘନିଷ୍ଠ ଅନୁଗତ ତୁଲେଶ୍ୱର ନାଏକ କଂଗ୍ରେସରୁ ପ୍ରାର୍ଥୀ ହୋଇଛନ୍ତି। କଂଗ୍ରେସର ପାରମ୍ପରିକ ଆଦିବାସୀ ଭୋଟ, ମହିଳା, ଯୁବକ, ଚାଷୀ ବର୍ଗରଲୋକଙ୍କୁ ଆକୃଷ୍ଟ କରିବା ଲାଗି କଂଗ୍ରେସ ପ୍ରୟାସ ଜାରି ରଖିଛି। ଏଥର ନିର୍ବାଚନରେ ଏହି ବିଧାନସଭା କ୍ଷେତ୍ରରେ ପ୍ରମୁଖ ଦଳର ୨ ପ୍ରାର୍ଥୀ ପୁରୁଣା ହୋଇଥିବା ବେଳେ କଂଗ୍ରେସରୁ ନୂଆମୁହଁକୁ ଟିକେଟ ଦେଇଛି। ପ୍ରାର୍ଥୀ ଘୋଷଣା ପରେ ସମସ୍ତେ ନିଜର ରଣନୀତି ଆରମ୍ଭ କଲେଣି। ଜୁନାଗଡ଼ ନିର୍ବାଚନମଣ୍ଡଳୀରେ ଦାଦନ ଶ୍ରମିକ, ଧାନ ଅଭାବୀ ବିକ୍ରି, ବେକାରୀ ବୃଦ୍ଧି ସହିତ ଏବେ ବି ଅନେକ ଉପାନ୍ତ ଅଞ୍ଚଳର ମୌଳିକ ସମସ୍ୟା ସମାଧାନ ହୋଇପାରି ନାହିଁ। ଅନେକ ବ୍ଲକ ଅନଗ୍ରସର ଅବସ୍ଥାରେ ରହିଛି। ପ୍ରମୁଖ ଦଳର ୩ ମୁହଁକୁ ନେଇ ବିଧାନସଭା ନିର୍ବାଚନ ରୋଚକ ମୋଡ଼ରେ ପହଞ୍ଚତ୍ଛି। ଗତ ନିର୍ବାଚନରେ କଂଗ୍ରେସର ଭଲ ସଙ୍ଗଠନ ନ ଥିଲା। ଫଳରେ ବିଜେଡି ଜିତିଥିଲା। ଏଥର ଗୋଲାମୁଣ୍ଡା ବ୍ଲକରୁ ତିଲେଶ୍ୱର କଂଗ୍ରେସ ଟିକେଟ ପାଇଛନ୍ତି। ତେଣୁ ଏଠାରେ ୩ ରାଜନୈତିକ ଦଳ ମଧ୍ୟରେ କଡ଼ା ମୁକାବିଲା ହେବ ବୋଲି ଆଶା କରାଯାଉଛି।