ଲଙ୍ଗଳେଶ୍ୱର, ୧୦।୫(ଡି.ଏନ.ଏ.)-ମହାମାରୀ କରୋନାର ଦ୍ୱିତୀୟ ଲହର ଯୋଗୁ ଓଡ଼ିଶାରେ ଦୈନିକ ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି। କରୋନା ସଂକ୍ରମଣ ଯେପରି ଅଧିକ ନ ବଢ଼ିବ ତାହାକୁ ଦୃଷ୍ଟିରେ ରଖି ରାଜ୍ୟ ସରକାର ୧୪ଦିନିଆ ଲକଡାଉନ୍ ଘୋଷଣା କରିଛନ୍ତି। ଅତି ଜରୁରୀ ନ ଥିଲେ ଘରୁ ନ ବାହାରିବା ପାଇଁ ନିର୍ଦ୍ଦେଶନାମା ଜାରି କରିଛନ୍ତି। ଲକଡାଉନ୍ ସମୟରେ ପ୍ରଭାବିତ ହୋଇଛି ଅଧିକାଂଶ ଲୋକଙ୍କ ଜୀବନଜୀବିକା। ଅନ୍ୟ ସମସ୍ତ ଜୀବିକା ଏକପ୍ରକାର ପ୍ରଭାବିତ ହୋଇଥିବା ବେଳେ କୁମ୍ଭକାରମାନେ ରୋଜଗାର ହରାଇ ବସିଛନ୍ତି।
ବାଲେଶ୍ୱର ଜିଲା ବାଲିଆପାଳ ବ୍ଲକ ଇନ୍ଦପଡ଼ା ଗ୍ରାମରେ ବସବାସ କରୁଛନ୍ତି ପ୍ରାୟ ୧୦୦ରୁ ଊର୍ଦ୍ଧ୍ୱ କୁମ୍ଭକାର ପରିବାର। ଏମାନେ ମାଟିରେ ତିଆରି ହାଣ୍ଡି, ସରା, ଠେକି, କଳସ, ଦୀପ, କଣ୍ଢେଇ ଆଦି ବିଭିନ୍ନ ପ୍ରକାର ଘରୋଇ ଉପକରଣ ତିଆରି କରି ବଜାରରେ ବିକି ପରିବାର ଚଳାଇଥାନ୍ତି। ପରିବାରର ପ୍ରାୟ ସମସ୍ତ ସଦସ୍ୟ ଏହି କୌଳିକ ବୃତ୍ତି କାର୍ଯ୍ୟ କରିଥାନ୍ତି। ତେବେ ବଜାରରେ ପ୍ଲାଷ୍ଟିକ ସାମଗ୍ରୀର ପ୍ରବେଶ ଯୋଗୁ ଏବେ ମାଟିରେ ନିର୍ମିତ ସାମଗ୍ରୀର ଚାହିଦା ଏକପ୍ରକାର କମିଯାଇଥିବା ବେଳେ ଲକଡାଉନ୍ ଜାରି ହେବା ଦିନଠାରୁ ଏମାନଙ୍କ ଦୁଃଖ ଦୁଇଗୁଣା ହୋଇଯାଇଛି। ଲକଡାଉନ୍ ଯୋଗୁ ଦୋକାନବଜାର, ହାଟ ସବୁ କିଛି ବନ୍ଦ। ସେମାନେ କୌଣସି ଗାଁକୁ ଯାଇ ବୁଲି ବିକ୍ରି ମଧ୍ୟ କରିପାରୁନାହାନ୍ତି। ଫଳରେ ତିଆରି ହୋଇଥିବା ସାମଗ୍ରୀ ସବୁ ସେମିତି ଗଦା ହୋଇରହିଛି। ଲକଡାଉନ୍ ଯୋଗୁ ରୋଜଗାର ସମ୍ପୂର୍ଣ୍ଣ ଭାବରେ ବନ୍ଦ ହୋଇଯିବାରୁ ଘରେ ଦିନକୁ ଦୁଇଓଳି ଚୁଲି ଜଳିବା ବି କଷ୍ଟ ହୋଇପଡ଼ିଛି। ବାହାଘର, ବ୍ରତଘର ଠାରୁ ଆରମ୍ଭ କରି ବିଭିନ୍ନ କାର୍ଯ୍ୟରେ ମାଟି ତିଆରି ଜିନିଷ ସବୁ ଆବଶ୍ୟକ ପଡ଼ିଥାଏ। ମେଳା, ମହୋତ୍ସବ, ଯାନିଯାତ୍ରା ଇତ୍ୟାଦି ବନ୍ଦ ହୋଇଥିବାରୁ ଏମାନଙ୍କ ଘରକୁ ଜିନିଷ କିଣିବାକୁ ମଧ୍ୟ କେହି ଆସୁନାହାନ୍ତି। ଅନ୍ୟ କୌଣସି ରୋଜଗାର ପନ୍ଥା ନ ଥିବାରୁ ଅର୍ଥାଭାବରୁ ଦୁର୍ଦ୍ଦିନରେ ଦିନ କାଟୁଛନ୍ତି ଏହି କୁମ୍ଭକାର ପରିବାର। ଯଦି ସରକାର କୁମ୍ଭକାରମାନଙ୍କ ସମସ୍ୟାକୁ ଦୃଷ୍ଟିରେ ରଖି କିଛି ସହାୟତା କରନ୍ତେ, ତାହେଲେ ନିଜ ପରିବାର ଚଳିବା ସହ ଏହି ବ୍ୟବସାୟକୁ ମଧ୍ୟ ଆହୁରି ଆଗକୁ ନେଇପାରନ୍ତେ ବୋଲି ଇନ୍ଦିପଡ଼ା ଗ୍ରାମର ଅଜିତ ବେହେରା, ସୁଶାନ୍ତ ବେହେରା, ହରେକୃଷ୍ଣ ବେହେରା, ପ୍ରହ୍ଲାଦ ବେହେରା ପ୍ରମୁଖ କହିଛନ୍ତି।