କ୍ୱିଭ,୨୯।୧: ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ସମୟରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଦୁର୍ନୀତି ମୂଳୋତ୍ପାଟନ ପାଇଁ ଅଭିଯାନ ଆରମ୍ଭ କରିଛନ୍ତି। ରବିବାର ସେ ଏହି ଅଭିଯାନରେ ଦୁଇ ବର୍ଷ ମଧ୍ୟରେ ଅର୍ଜନ କରିଥିବା ଆୟକୁ ସାର୍ବଜନୀନ କରିଥିଲେ ଏବଂ ଦେଶରେ ଥିବା ଭ୍ରଷ୍ଟାଚାର ବା ଦୁର୍ନୀତିର ମୂଳୋତ୍ପାଟନ କରିବାକୁ ଚାହିଁଥିଲେ।
ଜେଲେନସ୍କି କହିଛନ୍ତି ଯେ ରୁଷିଆ ୟୁକ୍ରେନ ଉପରେ ଆକ୍ରମଣ କରିବା ପରଠାରୁ ତାଙ୍କ ଆୟ ୨୦୨୧ରେ ହ୍ରାସ ପାଇଛି ଏବଂ ୨୦୨୨ରେ ଆହୁରି କମିଛି। ଏହା ଜଣା ଯେ ଏହା ପ୍ରଥମ ଥର ପାଇଁ ସେ ନିଜର ଆୟକୁ ସର୍ବସାଧାରଣରେ ଘୋଷଣା କରିଛନ୍ତି। ୨୦୨୧ରେ ୟୁକ୍ରେନ ଉପରେ ରୁଷିଆର ଆକ୍ରମଣର ଏକ ବର୍ଷ ପୂର୍ବରୁ ରାଷ୍ଟ୍ରପତି ଜେଲେନସ୍କି ଏବଂ ତାଙ୍କ ପରିବାରର ମୋଟ ସମ୍ପତ୍ତି ୧୦.୮ ନିୟୁତ ରିଭନିଆ ଅର୍ଥାତ୍ ୨୮୬,୧୬୮ ଆମେରିକୀୟ ଡଲାର ଥିଲା, ଯାହା ବର୍ତ୍ତମାନ ୧୨ ମିଲିୟନ ରିଭନିଆ କମ ଅଟେ।
ସ୍ବଚ୍ଛତା ବୃଦ୍ଧି ତଥା ଦେଶରେ ଦୁର୍ନୀତି ଦୂର କରିବା ପାଇଁ ପ୍ରୟାସର ଏକ ଅଂଶ ଭାବରେ ରାଷ୍ଟ୍ରପତି ଜେଲେନସ୍କି ତାଙ୍କ ଆୟ ବିଷୟରେ ପ୍ରକାଶ କରିଛନ୍ତି ଏବଂ ଅଧିକାରୀମାନଙ୍କୁ ସେମାନଙ୍କ ଆୟକୁ ସାର୍ବଜନୀନ କରିବାକୁ କହିଛନ୍ତି। ସୂଚନା ରହିଛି ଯେ ଅସ୍ତ୍ରଶସ୍ତ୍ର ଏବଂ ଆର୍ଥିକ ସହାୟତା ପ୍ରଦାନ କରୁଥିବା ପାଶ୍ଚାତ୍ୟ ସହଯୋଗୀ ରାଷ୍ଟ୍ର ତଥା ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ମଧ୍ୟ ୟୁକ୍ରେନରେ ଦୁର୍ନୀତି ହଟାଇବା ପାଇଁ ଉଦ୍ୟମ ଉପରେ ଆଶ୍ୱାସନା ଲୋଡିଛନ୍ତି।