ଖୋର୍ଦ୍ଧା ଅଫିସ,୧୮ା୧୨: ଖୋର୍ଦ୍ଧା ସହରର ମୁଖ୍ୟ ସ୍ଥାନଗୁଡ଼ିକୁ ବାଦ୍ ଦେଲେ ସାହି ଗଳିକନ୍ଦିରୁ ଅଳିଆ ହଟୁନି। ଖାଦ୍ୟ ଲାଳସାରେ ଗୋରୁଗାଈ, କୁକୁର ଅଳିଆକୁ ରାସ୍ତାରେ ଖେଳାଇ ଦେଉଛନ୍ତି। କୁଢ଼ କୁଢ଼ ଅଳିଆ ଆବର୍ଜନା ମଧ୍ୟରେ ପୂତିଗନ୍ଧମୟ ପରିବେଶ ମଧ୍ୟରେ ନାକ ଫାଟିପଡୁଛି। ଉକ୍ତ ରାସ୍ତାରେ ଯାଉଥିବା ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନ୍ୟପଟେ ଦୀର୍ଘ ସମୟ ଧରି ଡ୍ରେନ୍ ସଫା ନ ହେବାରୁ ଅଳିଆ ଆବର୍ଜନା ପଚି ଦୁର୍ଗନ୍ଧ ହେଉଛି। ଫଳରେ ମଶାଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି। ସହରରେ ମଶାଧୂଅଁା ମେଶିନ ବୁଲୁ ନ ଥିବାରୁ ମଶା, ମାଛିଙ୍କ ବଂଶ ବଢୁଛି। ଘରେ, ବାହାରେ ଚାରିଆଡ଼େ ମଶାଙ୍କ ପ୍ରାଦୁର୍ଭାବ ରହିଛି। ଏପରି କି ମଶାରି ନ ଟାଙ୍ଗିଲେ ଶୋଇ ହେଉନାହିଁ। ସହରରେ ପରିମଳ ପ୍ରତି ଗୁରୁତ୍ୱ ଦିଆ ନ ଗଲେ ଆଗାମୀ ଦିନରେ ଭୁବନେଶ୍ୱର ପରି ଖୋର୍ଦ୍ଧାରେ ମଧ୍ୟ ସମାନ ଅବସ୍ଥା ହୋଇପାରେ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ଏଥିପ୍ରତି ଖୋର୍ଦ୍ଧା ପୌର ପ୍ରଶାସନ ଦୃଷ୍ଟି ଦେବା ଜରୁରୀ ହୋଇପଡ଼ିଛି।
ସହରର ଜନସଂଖ୍ୟା ୫୦ ହଜାରରୁ ଊର୍ଦ୍ଧ୍ୱ ଟପିଲାଣି। ୨୨ ଓ୍ବାର୍ଡ ମଧ୍ୟରୁ ୨୦ଟି ଓ୍ବାର୍ଡର ଘରୋଇକରଣ କରାଯାଇଛି। ଏବାବଦକୁ ପୌର ପ୍ରଶାସନ ପକ୍ଷରୁ ମାସିକ ଲକ୍ଷାଧିକ ଟଙ୍କା ଠିକାସଂସ୍ଥାକୁ ଦିଆଯାଉଛି। ଦୈନିକ ଠିକାସଂସ୍ଥା ଦ୍ୱାରା ଅଳିଆ ଉଠୁଥିବା ପ୍ରଶାସନ ପକ୍ଷରୁ କୁହାଯାଉଛି। ବିଭିନ୍ନ ସ୍ଥାନରେ ଅଳିଆ ପଡ଼ି ରହୁଛି। ଏନେଇ ସ୍ଥାନୀୟ ବାସିନ୍ଦାଙ୍କ ପକ୍ଷରୁ ପୌର ପ୍ରଶାସନ ନିକଟରେ ବାରମ୍ବାର ଅଭିଯୋଗ ସତ୍ୱେ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଗଣମାଧ୍ୟମ ଆଗରେ କହିଛନ୍ତି। ପୌର ପ୍ରଶାସନ ଅଧୀନରେ ୨୦୪ ଜଣ ଠିକା କର୍ମଚାରୀ, ୧୭ ଜଣ ସ୍ବଚ୍ଛ ସାଥୀ, ୨ ଜଣ ସୁପରଭାଇଜର କାର୍ଯ୍ୟରତ ଅଛନ୍ତି। ଠିକାସଂସ୍ଥା ଅଧୀନରେ ୧୭୪ ଜଣ କାର୍ଯ୍ୟରତ ଥିବା ବେଳେ ଅନ୍ୟମାନେ ପୌର ପ୍ରଶାସନ ଅଧୀନରେ କାର୍ଯ୍ୟ କରୁଛନ୍ତି। ସହରରୁ ଦୈନିକ ୧୪ରୁ ୧୬ ଟନ୍ ଓଦା ଓ ଶୁଖିଲା ଅଳିଆ ଆବର୍ଜନା ବାହାରୁଛି। ଅଳିଆ ଉଠାଇବା ଲାଗି ଏସ୍ଏଚ୍ଜି ଗ୍ରୁପ୍ ଜରିଆରେ ୬ଟି ବ୍ୟାଟେରିଚାଳିତ ଅଳିଆବୁହା ଗାଡ଼ି, ୩୦ଟି ଟ୍ରାଇସାଇକେଲ, ୪ ଟ୍ରାକ୍ଟର ନିୟୋଜିତ କରାଯାଇଥିବା ପୌର ପ୍ରଶାସନ ପକ୍ଷରୁ କୁହାଯାଇଛି। ଏହାସତ୍ତ୍ୱେ ସହରରୁ ସକାଳ ୮ଟା ପର୍ଯ୍ୟନ୍ତ ଅଳିଆ ହଟୁନି। ଟ୍ରାଫିକ ଛକ, ସମବାୟ ଛକ, ଫରେଷ୍ଟ ରେଞ୍ଜ କାର୍ଯ୍ୟାଳୟ, ରାଧାବଲ୍ଲଭ ସାହି ରାସ୍ତା, ନୂଆ ବସ୍ଷ୍ଟାଣ୍ଡ ରୋଡ୍ରେ ଥିବା ପରିତ୍ୟକ୍ତ ପୋଖରୀ ନିକଟରେ ଅଳିଆ ଗଦା ହୋଇ ରହୁଛି। ସମାନ ଦୃଶ୍ୟ ରହିଛି ନୂଆ ବସ୍ଷ୍ଟାଣ୍ଡର। ଅନେକ ଓ୍ବାର୍ଡରୁ ଅଳିଆ ଉଠାଯାଉ ନ ଥିବା ଅଭିଯୋଗ ହେଉଛି। ଗୁରୁଜଙ୍ଗ, ଶ୍ରୀରାମନଗର ହାଉସିଂବୋର୍ଡ, ନୂଆ ବସ୍ଷ୍ଟାଣ୍ଡ ପରିସର, କୋର୍ଟ ପାର୍ଶ୍ୱ, ଗୀତାଭବନ ପଡ଼ିଆ, ଖ୍ରୀଷ୍ଟିଆନ ସାହି, ମସ୍ଜିଦ୍ ସମ୍ମୁଖ ରାସ୍ତା, ମଧୁସୂଦନ ନଗରର ପରିତ୍ୟକ୍ତ ପୋଖରୀ ପାର୍ଶ୍ୱ ମୁକ୍ତ ଡମ୍ପିଂୟାର୍ଡ ପାଲଟିଛି।