ଭୁବନେଶ୍ୱର, ୨୩।୧୦(ବ୍ୟୁରୋ): ଧନ ତ୍ରୟୋଦଶୀ ବା ଧନ୍ ତେରସ୍ରେ ସୁନା ଓ ରୂପା କିଣିଲେ ଘରକୁ ଲକ୍ଷ୍ମୀଙ୍କ ବିରାଜମାନ ହୋଇଥାଏ ବୋଲି ବିଶ୍ୱାସ ରହିଛି। ସେଥିପାଇଁ ଏହି ଦିନରେ ସୁନାରୂପା ବ୍ୟବସାୟ ଅଧିକମାତ୍ରାରେ ହୋଇଥାଏ। ଚଳିତବର୍ଷ ରବିବାର ଧନ୍ତେରସ ପଡ଼ୁଥିବାରୁ ଜୁଏଲେରୀ ଦୋକାନଗୁଡ଼ିକରେ ଶନିବାର ମଧ୍ୟ ବେଶ୍ ଦେଖିବାକୁ ମିଳିଥିଲା। କେହି କେହି ଶନିବାର ସନ୍ଧ୍ୟାରୁ ଧନ୍ତେରସ ପାଳନ କରିଛନ୍ତି।ରାଜଧାନୀ ଭୁବନେଶ୍ୱର, କଟକ, ପୁରୀ, ବ୍ରହ୍ମପୁର, ରାଉରକେଲା, ବାଲେଶ୍ୱର ଏବଂ ସମ୍ବଲପୁର ଆଦି ବଡ଼ ବଡ଼ ସହରରେ ସୁନାରୂପା ବ୍ୟବସାୟ ଏଥର ରେକର୍ଡସ୍ତର ଛୁଇଁବ ବୋଲି ଗହଣା ଦୋକାନୀମାନେ ଆଶା ରଖିଛନ୍ତି। ତେବେ ଏଭଳିସ୍ଥଳେ ଶୁକ୍ରବାର ତୁଳନାରେ ଶନିବାର ସୁନା ଏବଂ ରୂପା ଦରରେ ବୃଦ୍ଧି ପାଇଛି। ୨୪ କ୍ୟାରେଟ ସୁନାର ମୂଲ୍ୟ ଭୁବନେଶ୍ୱର ଏବଂ କଟକ ଟୁଇନ୍ସିଟିରେ ୧୦ଗ୍ରାମ ପିଛା ୫୨ହଜାର ୧୦୦ଟଙ୍କାରେ ପହଞ୍ଚତ୍ଛି। ୨୩ କ୍ୟାରେଟ ପାଇଁ ୧୦ ଗ୍ରାମ ସୁନା ମୂଲ୍ୟ ୫୦,୩୦୦ଟଙ୍କା ଥିବାବେଳେ ୨୨କ୍ୟାରେଟ ୪୮,୨୦୦ ଟଙ୍କା ରହିଛି। ଅନ୍ୟପକ୍ଷେ ଭୁବନେଶ୍ୱରରେ ରୂପା କିଲୋଗ୍ରାମ ପିଛା ୫୯,୫୦୦ଟଙ୍କା(ଜିଏସ୍ଟି ସହ)ରେ ବିକ୍ରି ହେଉଛି। ପ୍ରକାଶ ଯେ, ରାଜ୍ୟ ଟିକସ, ଏକ୍ସାଇଜ୍ ଡ୍ୟୁଟି ଏବଂ ମେକିଂ ଚାର୍ଜକୁ ଲକ୍ଷ୍ୟରେ ରଖି ଦେଶରେ ସୁନା ଦର ପରିବର୍ତ୍ତନ ହୋଇଥାଏ। ସେହିପରି ରୂପା ମୂଲ୍ୟ ଅନ୍ତର୍ଜାତୀୟ ସ୍ତରରେ ପରିବର୍ତ୍ତନ ଦ୍ୱାରା ନିର୍ଣ୍ଣୟ କରାଯାଇଥାଏ। ଏହା ମଧ୍ୟ ଡଲାର ତୁଳନାରେ ଟଙ୍କାର ଗତି ଉପରେ ନିର୍ଭର କରିଥାଏ।