ବ୍ରହ୍ମପୁର ଅଫିସ, ୭ା୨: ଭାଲେଣ୍ଟାଇନ ସପ୍ତାହ ଆରମ୍ଭ ହେବାକୁ ଯାଉଛି । ପ୍ରଥମ ଦିନ ସୋମବାରଠାର ରୋଜ୍ ଡେ ପାଳନ ହେବ। ପଶ୍ଚାତ୍ୟ ସଂସ୍କୃତି ଅନୁସାରେ ଏହି ଦିନ ପ୍ରିୟଜନଙ୍କୁ ଗୋଲାପ ଫୁଲ ଉପହାର ସ୍ବରୁପ ପ୍ରଦାନ କରାଯାଏ। ଏଣୁ ସାଧାରଣ ଦିନ ଅପେକ୍ଷା ରୋଜଡ଼େରେ ଗୋଲାପର ଚାହିଦା ସହ ଦର ବୃଦ୍ଧି ପାଇଥାଏ। ତେବେ ବ୍ରହ୍ମପୁର ବଜାରରେ ଫୁଲ ବ୍ୟବସାୟ ମୁଖ୍ୟତଃ ଋତୁ କାଳୀନ ହୋଇଥିବା ବେଳେ ଚଳିତ ମାସରେ ବିବାହ ଆରମ୍ଭ ହେଉଥିବାରୁ ଫୁଲ ଦର ଅଧିକ ରହିଛି। କିନ୍ତୁ ରୋଜ ଡ଼େ’ ଦୁଇଦିନ ପୂର୍ବରୁ ଗୋଲାପ ନିୟମିତ ଦରଠାରୁ ୨ ରୁ ୩ ଗୁଣା ଅଧିକା ଦାମରେ ବିକ୍ରି ହେଉଛି। ବ୍ରହ୍ମପୁର ସହରକୁ ବର୍ତ୍ତମାନ ବେଙ୍ଗାଲୁରୁ, କୋଲକାତା ଓ ଆନ୍ଧ୍ରରୁ ନିୟମିତ ଗୋଲାପ ସମେତ ଅନ୍ୟାନ୍ୟ ଫୁଲ ଆମଦାନୀ ହେଉଛି। ତେବେ ବେଙ୍ଗାଲୁରୁ ଗୋଲାପର ଚାହିଦା ଗ୍ରାହକଙ୍କ ମଧ୍ୟରେ ସର୍ବାଧିକ ବୋଲି କହିଛନ୍ତି ବ୍ୟବସାୟୀ ଅଜୟ ରାଉଳ। ନିୟମିତ ଭାବେ ବ୍ରହ୍ମପୁର ବଜାରରେ ପ୍ରତ୍ୟେକ ଫୁଲ ଦୋକାନରେ ଗୋଲାପ ଫୁଲ ପିଛା ୧୦ ରୁ ୧୫ ଟଙ୍କା ଥାଏ। ବିବାହ ଓ ପର୍ବପର୍ବାଣୀରେ ଦର ସାମାନ୍ୟ ବୃଦ୍ଧି ପାଇ ୨୦ ରୁ ୨୫ ଟଙ୍କା ହୋଇଥାଏ। କିନ୍ତୁ ଚଳିତ ବର୍ଷ ଭାଲେଣ୍ଟାଇନ୍ସ ସପ୍ତାହ ଆରମ୍ଭ ଦୁଇ ଦିନ ପୁର୍ବରୁ ହଠାତ ଗୋଲାପ ଫୁଲ ଦର ବୃଦ୍ଧି ପାଇ ପ୍ରତ୍ୟେକ ଦୋକାନୀଙ୍କ ନିକଟରେ ଭିନ୍ନ ଭିନ୍ନ ଦରରେ ବିକ୍ରି ହେଉଛି। ସହରରେ ସୁବାରାଓ ଛକରେ ଗୋଟିଏ ଗୋଲାପର ଦାମ୍ ୩୦ରୁ ୪୦ ଟଙ୍କା ରିହିଛି। ସେହପରି ପୁରୁଣା ବସ୍ଷ୍ଟାଣ୍ଡରେ ୨୫ରୁ ୬୦ ଟଙ୍କା ପର୍ଯ୍ୟନ୍ତ ବିକ୍ରି ହେଉଛି।