ଆମଷ୍ଟରଡମ,୧୮।୧୨: ଧୁର ଦକ୍ଷିଣପନ୍ଥୀ ତଥା ଇସଲାମ ବିରୋଧୀ ନେତା ଗିର୍ଟ ୱିଲଡର୍ସ ନେଦରଲ୍ୟାଣ୍ଡର ନୂଆ ପ୍ରଧାନମନ୍ତ୍ରୀ ହୋଇଛନ୍ତି। ନେଦରଲ୍ୟାଣ୍ଡର ସାଧାରଣ ନିର୍ବାଚନରେ ଏକ ବଡ଼ ବିଜୟ ହାସଲ କରିବା ପରେ ୱିଲଡର୍ସ ସମଗ୍ର ବିଶ୍ୱରୁ ଅଭିନନ୍ଦନ ବାର୍ତ୍ତା ଗ୍ରହଣ କରୁଛନ୍ତି। ଯେଉଁଥିପାଇଁ ୱିଲଡର୍ସ ତାଙ୍କ ଅଫିସିଆଲ ‘ଏକ୍ସ’ ଆକାଉଣ୍ଟରେ ପୋଷ୍ଟ କରି ତାଙ୍କର ସମସ୍ତ ବନ୍ଧୁଙ୍କୁ ଧନ୍ୟବାଦ ଜଣାଇଛନ୍ତି। ଏହି ସମୟରେ ସେ ହିନ୍ଦୁମାନଙ୍କ ବିଷୟରେ ମଧ୍ୟ ଏକ ବଡ଼ ବୟାନ ଦେଇଛନ୍ତି।
ଗିର୍ଟ ୱିଲଡର୍ସ ‘ଏକ୍ସ’ରେ ଲେଖିଛନ୍ତି, ଭାରତରୁ ଅନେକ ବାର୍ତ୍ତା ଆସିଛି। ମୁଁ ସେହି ହିନ୍ଦୁମାନଙ୍କୁ ସମର୍ଥନ କରିବି, ଯେଉଁମାନେ ହିନ୍ଦୁ ହୋଇଥିବାରୁ ବାଂଲାଦେଶ, ପାକିସ୍ତାନରେ ସେମାନଙ୍କୁ ଆକ୍ରମଣ କିମ୍ବା ହତ୍ୟା କରାଯିବ ବୋଲି ଧମକ ଦିଆଯାଉଛି।
ନେଦରଲ୍ୟାଣ୍ଡର ପ୍ରଧାନମନ୍ତ୍ରୀ ମଧ୍ୟ ତାଙ୍କ ପୋଷ୍ଟରେ # ଇଣ୍ଡିଆ ବ୍ୟବହାର କରିଛନ୍ତି। ସୂଚନାଯୋଗ୍ୟ, ନିକଟରେ ସେ ‘କୁରାନ ଉପରେ ପ୍ରତିବନ୍ଧକ’ ଏବଂ ‘ମୁସଲମାନମାନେ ଦ୍ୱିତୀୟ ଶ୍ରେଣୀର ନାଗରିକ’ ଭଳି ବିବାଦୀୟ ବୟାନ ଦେଇଛନ୍ତି। ଏହାପୂର୍ବରୁ ଗତ ବର୍ଷ ମେ’ରେ ଭାରତରେ ପୌଗମ୍ବର ମହମ୍ମଦଙ୍କ ଉପରେ ବିତର୍କ ସମୟରେ ନୁପୁର ଶର୍ମାଙ୍କୁ ସମର୍ଥନ କରି ସେ ହେଡଲାଇନରେ ଆସିଥିଲେ।