ରାୟପୁର, ୫।୪: ଛତିଶଗଡ଼ର ବିଜାପୁର ଏନ୍କାଉଣ୍ଟର ବେଳେ ନିଖୋଜ ଥିବା ସିଆର୍ପିଏଫ୍ ଯବାନ ରାକେଶ୍ୱର ସିଂ ମନ୍ହାସ ମାଓବାଦୀମାନଙ୍କ କବ୍ଜାରେ ରହିଥିବା ଜଣେ ଅଜଣା ବ୍ୟକ୍ତି ଫୋନ୍ ଯୋଗେ ସୂଚନା ଦେଇଛନ୍ତି। ତେବେ ତାଙ୍କୁ ଫେରାଇ ଦେବା ବଦଳରେ ମାଓବାଦୀମାନଙ୍କ ତରଫରୁ ଏପର୍ଯ୍ୟନ୍ତ କୌଣସି ଦାବି କରାଯାଇନାହିଁ। ଶନିବାରଠାରୁ ସିଆର୍ପିଏଫ୍ କୋବ୍ରା ବାଟାଲିୟନର ଏହି ୩୫ ବର୍ଷୀୟ କନ୍ଷ୍ଟେବଲ ଏନ୍କାଉଣ୍ଟରସ୍ଥଳରୁ ନିଖୋଜ ଅଛନ୍ତି। ମାଓବାଦୀଙ୍କ କବଳରେ ଥିବା ରିପୋର୍ଟ ମିଳିବା ପରେ ଜମ୍ମୁର ଏହି ଯବାନଙ୍କ ଜୀବନ ପ୍ରତି ବିପଦ ଆଶଙ୍କା କରାଯାଉଛି। ରାକେଶ୍ୱରଙ୍କୁ ନିରାପଦରେ ଫେରାଇ ଆଣିବା ଲାଗି ତାଙ୍କ ସ୍ତ୍ରୀ ମୀନୁ ମାନ୍ହାସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହାଙ୍କୁ ନିବେଦନ କରିଛନ୍ତି। ତେବେ ସରକାରଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ବୁଝାମଣା ପ୍ରକ୍ରିୟା ଆରମ୍ଭ ହୋଇ ନ ଥିବା ଏକ ସୂତ୍ରରୁ ଜଣାପଡ଼ିଛି।
ଫୋନ୍ କରି ରାକେଶ୍ୱରଙ୍କ ସମ୍ପର୍କରେ ସୂଚନା ଦେଇଥିବା ବ୍ୟକ୍ତି ଜଣକ ନିଜକୁ ହିଡମା (ଦୁର୍ଦ୍ଧର୍ଷ ମାଓବାଦୀ କମାଣ୍ଡର) ବୋଲି କହିଛି। ସୋମବାର ସେ ବିଜାପୁରର ଜଣେ ଖବରଦାତାଙ୍କୁ ଫୋନ୍ କରି ଯବାନ ସୁରକ୍ଷିତ ଏବଂ ମାଓବାଦୀଙ୍କ କବ୍ଜାରେ ରହିଥିବା ସୂଚନା ଦେଇଥିଲେ। ସିଆର୍ପିଏଫର କେତେଜଣ ଅଫିସର ରାକେଶ୍ୱରଙ୍କ ଘରକୁ ଯାଇ ପରିବାର ସଦସ୍ୟଙ୍କୁ ଭେଟିଛନ୍ତି। ଖବରଦାତାଙ୍କ ସୂଚନାର ସତ୍ୟାସତ୍ୟ ଜାଣିବା ପାଇଁ ଉଦ୍ୟମ କରାଯାଉଥିବା ସେମାନେ ପରିବାରକୁ ଆଶ୍ୱାସନା ଦେଇଛନ୍ତି।