ରାଇରଙ୍ଗପୁର,୨୫ା୭(ଡି.ଏନ୍.ଏ.): ମୟୂରଭଞ୍ଜ ଜିଲା ରାଇରଙ୍ଗପୁର ଉପକାରାଗାରରେ ଏକ ହତ୍ୟା ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିବା ଜନୈକ କଏଦୀ ଚିକିତ୍ସା ପାଇଁ ବାରିପଦା ଯାଇ ଫେରିବା ବେଳେ ଚମ୍ପଟ ମାରିଥିବା ସୂଚନା ମିଳିଛି। କଏଦୀ ଜଣକ ହେଲେ ବହଳଦା ବ୍ଲକ ଝରାଡ଼ିହି ଅଞ୍ଚଳର ଡମାନ ମାରାଣ୍ଡି। ତାଙ୍କୁ ଯକ୍ଷ୍ମା(ଟିବି) ହୋଇଥିବାରୁ ସବ୍ଜେଲର କର୍ମଚାରୀ ଏକ ଗାଡ଼ିରେ ବାରିପଦାସ୍ଥିତ ମୁଖ୍ୟ ଚିକିତ୍ସାଳୟକୁ ଶୁକ୍ରବାର ଚିକିତ୍ସା ପାଇଁ ଯାଇଥିଲେ। ସେଠାରୁ ସନ୍ଧ୍ୟା ପ୍ରାୟ ୫ଟା ବେଳେ ଫେରୁଥିବା ସମୟରେ ବିଶୋଇ ଥାନା କୁନ୍ଦୁଳିଆ ନିକଟରେ ଶୌଚ ପାଇଁ କହି ଗାଡ଼ିରୁ ଓହ୍ଲାଇଲେ। ସେହି ସମୟରେ ଚମ୍ପଟ ମାରିଥିଲେ। ରାଇରଙ୍ଗପୁର ଜେଲର ଓ କର୍ମଚାରୀମାନେ ଫେରାର କଏଦୀ ଡମାନଙ୍କୁ ଖୋଜୁଥିବା ସୂଚନା ମିଳିଛି।
ସୂଚନାଯୋଗ୍ୟ, ୨୦୧୩ ମସିହାରେ ଏକ ହତ୍ୟା ମାମଲାରେ ତିରଙ୍ଗ ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇ ହତ୍ୟାକାରୀ ଡମାନ ମାରାଣ୍ଡିଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା। ୨୦୧୬ ଡିସେମ୍ବର ୧୯ରେ ରାଇରଙ୍ଗପୁର ଜିଲା ଅତିରିକ୍ତ ଦୌରାଜଜ୍ ଡମାନଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ।
