ନିରାକାରପୁର,୨୮ା୭(ମାନସ ଚନ୍ଦ୍ର ପଟ୍ଟନାୟକ): ଖୋର୍ଦ୍ଧା ଜିଲା ନିରାକାରପୁର ପଞ୍ଚାୟତସ୍ଥିତ ଆର୍ଡି କାର୍ଯ୍ୟାଳୟ ନିକଟରେ ରହିଛି ପ୍ରାଣୀ ଚିକିତ୍ସାଳୟ। ନିରାକାରପୁର, ଡିଆ, ରାମେଶ୍ୱର, ଲେଣ୍ଡୋ ଆଦି ପଞ୍ଚାୟତର ଗୃହପାଳିତ ପ୍ରାଣୀ ଓ ପକ୍ଷୀଙ୍କ ସମେତ ବିଭିନ୍ନ ସମୟରେ ଦୁର୍ଘଟଣାର ଶିକାର ହୋଇଥିବା ଷଣ୍ଢ, ଗାଈଗୋରୁଙ୍କୁ ଚିକିତ୍ସା ପାଇଁ ଏହି ପ୍ରାଣୀ ଚିକିତ୍ସାଳୟକୁ ଅଣାଯାଇଥାଏ। ସ୍ଥାନୀୟ ଅଞ୍ଚଳରେ ଏହି ପ୍ରାଣୀ ଚିକିତ୍ସାଳୟ ଗୁରୁତ୍ୱ ବହନ କରୁଥିବା ବେଳେ ଏବେ ଏହି ଚିକିତ୍ସାଳୟ ବିଭିନ୍ନ ସମସ୍ୟା ଘେରରେ ରହିଛି। ପ୍ରକାଶ ଯେ, ଏହି ପ୍ରାଣୀ ଚିକିତ୍ସାଳୟରେ ପିଇବା ପାଣିର ବ୍ୟବସ୍ଥା ନାହିଁ। ଫଳରେ ଗୃହପାଳିତ ପ୍ରାଣୀଙ୍କୁ ଚିକିତ୍ସା ପାଇଁ ଆଣୁଥିବା ଲୋକେ ପିଇବା ପାଣି ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଚିକିତ୍ସା କରୁଥିବା କର୍ମଚାରୀ ହାତ ଧୋଇ ହେବାକୁ ସୁବିଧା ନାହିଁ। ଏନେଇ ଉପରିସ୍ଥ ଅଧିକାରୀଙ୍କ ନିକଟରେ ଅଭିଯୋଗ ହେଉଥିଲେ ମଧ୍ୟ ସୁଫଳ ମିଳୁନାହିଁ। ଚିକିତ୍ସାଳୟକୁ ଲାଗି ଦୀର୍ଘବର୍ଷ ଧରି ରହିଥିବା ଏକ ମୁକୁଳା କୂଅ ରହିଥିବା ବେଳେ ଏହାର ସୁରକ୍ଷା ପାଚେରି ପାଇଁ କୌଣସି ପଦକ୍ଷେପ ନିଆଯାଉନାହିଁ। ଫଳରେ ବିଭିନ୍ନ ସମୟରେ ବୁଲାଗୋରୁ, ଷଣ୍ଢ, କୁକୁର ଏଥିରେ ପଡୁଥିବା ନଜିର ରହିଛି। ବିଶେଷକରି ଉକ୍ତ କାର୍ଯ୍ୟାଳୟର ସୁରକ୍ଷା ପାଚେରି ନ ଥିବାରୁ ସର୍ବସାଧାରଣଙ୍କଠାରୁ ଆରମ୍ଭ କରି କେତେଜଣ ଦୋକାନୀ ଏଠାରେ ଅଳିଆ ପକାଉଛନ୍ତି। ସନ୍ଧ୍ୟା ହେଲେ ଏହି କାର୍ଯ୍ୟାଳୟ ପରିସର ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଛି। ଏହି ଚିକିତ୍ସାଳୟ ଉପରେ ୪ଟି ପଞ୍ଚାୟତ ନିର୍ଭର କରୁଥିବା ବେଳେ ଏଠାରେ ଜଣେ ସ୍ଥାୟୀ ଡାକ୍ତରଙ୍କୁ ନିଯୁକ୍ତି ଦେବା ସହିତ ପାନୀୟଜଳ ଓ ସୁରକ୍ଷା ପାଚେରି କରିବା ପାଇଁ ଅଞ୍ଚଳବାସୀଙ୍କ ପକ୍ଷରୁ ଦାବି ହୋଇଛି।