ପୁରୀ ଅଫିସ,୮।୮: କରୋନା କଟକଣା ଯୋଗୁ ବନ୍ଦ ରହିଥିବା ଶ୍ରୀମନ୍ଦିର ଐତିହ କରିଡ଼ର କାର୍ଯ୍ୟ ଶନିବାର ପୁଣି ଆରମ୍ଭ ହୋଇଛି। ଶ୍ରୀମନ୍ଦିର ପ୍ରଶାସନ ପକ୍ଷରୁ ଚତୁଃପାର୍ଶ୍ୱ ଉଚ୍ଛେଦ ପ୍ରକ୍ରିୟାରେ ପଶ୍ଚିମଦ୍ୱାର ସମ୍ମୁଖ ବାସେଳି ସାହି ମୌଜାର ୩ଟି ବେସରକାରୀ ଘରକୁ ଭଙ୍ଗା ଯାଇ କାର୍ଯ୍ୟ ଆରମ୍ଭ କରାଯାଇଛି। ଲକ୍ଡାଉନ ଓ ଶଟ୍ଡାଉନ ଲାଗି ଉଚ୍ଛେଦ କାର୍ଯ୍ୟ ଧିମେଇ ଯାଇଥିବାବେଳେ ପ୍ରଶାସନ ପୁଣିଥରେ ତତ୍ପରତା ଦେଖାଇଛି। ୭୫ମିଟର ବଳୟ ଭିତରେ ଉତ୍ତର ଦ୍ୱାର ଓ ଦକ୍ଷିଣ ଦ୍ୱାରରେ ଅଧିକାଂଶ ଉଚ୍ଛେଦ କାର୍ଯ୍ୟ ଶେଷ ହୋଇଯାଇଥିବା ବେଳେ ଏବେ ପଶ୍ଚିମଦ୍ୱାରଠାରେ ଉଚ୍ଛେଦ କାର୍ଯ୍ୟ ଚାଲିଛି। ଉପଜିଲାପାଳ ଭବତାରଣ ସାହୁଙ୍କ ଉପସ୍ଥିତିରେ ଉଚ୍ଛେଦ କାର୍ଯ୍ୟ ଚାଲିଥିବା ବେଳେ ଏଣିକି କ୍ରମାଗତ ଚାଲୁରହିବ। ବାକି ରହିଥିବା ସମସ୍ତ କାର୍ଯ୍ୟ ତ୍ୱରିତ ବେଗରେ ହେବ ବୋଲି ଉପଜିଲାପାଳ ସୂଚନା ଦେଇଛନ୍ତି। ଉଚ୍ଛେଦ ପ୍ରକ୍ରିୟାର ୯୫ ପ୍ରତିଶତ କାର୍ଯ୍ୟ ଶେଷ ହୋଇଥିବା ବେଳେ ମାତ୍ର ୫ ପ୍ରତିଶତ ବାକି ରହିଛି। ତେବେ ଏହି ଉଚ୍ଛେଦ ପ୍ରକ୍ରିୟାକୁ ନେଇ କେତେଜଣ ଘର ମାଲିକଙ୍କର ସମସ୍ୟା ଥିବା ହେତୁ ମାମଲା ହାଇକୋର୍ଟରେ ରହିଛି। ସମ୍ପୃକ୍ତ ମାମଲାର ସମାଧାନ ହାଇକୋର୍ଟର ନିର୍ଦ୍ଦେଶ ଅନୁଯାୟୀ ହେବ। ମହାପ୍ରଭୁ ଶ୍ରୀଜଗନ୍ନାଥଙ୍କ କାର୍ଯ୍ୟରେ ପୁରୀ ସହରବାସୀ ଉପଯୁକ୍ତ ସହଯୋଗ କରୁଛନ୍ତି ଓ ସଭିଁଙ୍କ ସହଯୋଗ ବଳରେ ଉଚ୍ଛେଦ କାର୍ଯ୍ୟ ସୁରୁଖୁରୁରେ ଶେଷ ହେବ। ସେହିଭଳି ଗୋଟିଏ ପ୍ଲାଟୁନ୍ ଫୋର୍ସ ଓ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଉଚ୍ଛେଦ କାର୍ଯ୍ୟ ଚାଲୁ ରହିଥିବା ସେ କହିଛନ୍ତି। ଏହି ପ୍ରକ୍ରିୟା ଶେଷ ହେବା ପରେ, ଆଗାମୀ ଦିନରେ ଶ୍ରୀମନ୍ଦିର ଚାରିପାଖରେ ଥିବା ମଠଗୁଡ଼ିକର ନବୀକରଣ ଓ ଉନ୍ନୟନମୂଳକ କାର୍ଯ୍ୟ ଆରମ୍ଭ କରାଯିବ।