ପଦ୍ମପୁର, ୧୪।୪ (ଡି.ଏନ.ଏ.): ଧୂ ଧୂ ଖରାବେଳେ ଏକ ସାଇକେଲରେ ବନ୍ଧା ହୋଇଛି ମାଟିଘୋଡ଼ା ଓ ଭଳିକି ଭଳି ମାଟିରେ ତିଆରି ଠେକି। ମା’ ଘୋଡ଼ା ନେବ ଘୋଡ଼ା, ମାଟି ତିଆରି ଘୋଡ଼ା, ଠେକି ନେବ ଠେକି ମାଟି ଠେକି, ପିତୃପୁରୁଷଙ୍କୁ ପଣା ଦେବ। ଖରାକୁ ଭ୍ରୁକ୍ଷେପ ନ କରି ଡାକି ଚାଲନ୍ତି। ଏଭଳି ଭାବେ ନିଆରା ଢଙ୍ଗରେ ମାଟି ଘୋଡ଼ା ଓ ଠେକି ସମେତ ମାଟିରେ ତିଆରି ବିଭିନ୍ନ ସାମଗ୍ରୀ ବିକ୍ରି କରୁଛନ୍ତି ଭଦ୍ରକ ସଦର ବ୍ଲକ ନୂଆନନ୍ଦ ଗ୍ରାମର ନିରଞ୍ଜନ ବେହେରା। ବୟସ ୫୫ ହେଲାଣି। ବିଗତ ତିନିପିଢ଼ି ଧରି ମାଟିରେ ତିଆରି ବିଭିନ୍ନ ସାମଗ୍ରୀ ସେ ବିକ୍ରି କରିଆସୁଛନ୍ତି। ପଣା ସଂକ୍ରାନ୍ତି ଓ ଚଇତି ପର୍ବରେ ଓଡ଼ିଆ ଘରର ସଂସ୍କୃତି ଅନୁଯାୟୀ ବିଭିନ୍ନ ଦେବଦେବୀଙ୍କ ମନ୍ଦିରରେ ଘୋଡ଼ା ଦେଇ ପୂଜାର୍ଚ୍ଚନା କରାଯାଇଥାଏ। ନିରଞ୍ଜନ କହନ୍ତି, ଆଗରୁ ବେପାର ଭଲ ହେଉଥିଲା, ଏବେ ଆଧୁନିକ ଯୁଗରେ ଆଗଭଳି ବେପାର ହେଉନାହିଁ। ଦିନସାରା ଖରାରେ ବୁଲି ବୁଲି ବିକ୍ରି କରି ୪ ଶହରୁ ୫ଶହ ଟଙ୍କା ରୋଜଗାର ହୁଏ। ଏଥିରେ ୫ ପ୍ରାଣୀ କୁଟୁମ୍ବ ପୋଷିବା କଷ୍ଟକର ହେଉଛି। ବଜାର ଦର ହୁ ହୁ ହୋଇ ବଢ଼ୁଥିବା ବେଳେ କୁମ୍ଭକାରଙ୍କ ଜୀବିକା ଏବେ ବିପଦରେ। ଏହି ବୃତ୍ତି ଆମ କୁଟୁମ୍ବ ପୋଷିଥାଏ। ସରକାର କୁମ୍ଭକାରମାନଙ୍କୁ କିଛି ସୁବିଧା ସୁଯୋଗ ଯୋଗାଇ ନ ଦେଲେ କୌଳିକ ବୃତ୍ତି ବୁଡ଼ିଯିବ। ସରକାର ଏଥିପ୍ରତି ଦୃଷ୍ଟି ଦେବା ପାଇଁ ସେ ନିବେଦନ କରିଛନ୍ତି।